ឧត្តរមានជ័យ៖ កាលពីវេលាម៉ោង២០និង៣០នាទី ថ្ងៃទី២០ ខែមិនា ឆ្នាំ២០១៦ មានករណីគ្រោះថ្នាក់ចរាចរណ៍ មួយកើតឡើងនៅលើកំណាត់ផ្លូវជាតិលេខ១៧៤ ចំណុចមុខផ្លូវចូលវត្តថ្លាត ស្ថិតនៅក្នុងភូមិួួលក្រឡាញ់ ឃុំថ្លាត ស្រុកអន្លង់វែង ខេត្តឧត្តរមានជ័យ ដោយរថយន្តកាមរី បុកជាមួយម៉ូតូវ៉េវយ៉ាងពេញទំហឹងបណ្តាលឲ្យរងរបួសធ្ងន់និងស្រាល២នាក់។សមត្ថកិច្ចប៉ូលិស បានឲ្យដឹងថា ភាគីម៉ូតូឈ្មោះ ឆេង សុខ ភេទស្រី អាយុ៣៤ឆ្នាំ រស់នៅភូមិទួលក្រឡាញ់ ឃុំថ្លាត ស្រុកអន្លង់វែង រងរបួសធ្ងន់ផ្នែកខាងក្បាល អ្នករួមដំណើរម្នាក់ជាកូនឈ្មោះលី ឆេង អ៊ាង ភេទប្រុសអាយុ៤ឆ្នាំរងរបួសស្រាល។សមត្ថកិច្ចយើង បានអោយដឹងទៀតថា ដោយភាគីរថយន្តឈ្មោះ តេត ឃឿន ភេទប្រុស អាយុ៣៦ឆ្នាំ រស់នៅភូមិឯកភាព ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ បើកបររថយន្តម៉ាក កាមរី សេរី១៩៩៣ ពណ៍ក្រហមក្រម៉ៅ ពាក់ស្លាកលេខភ្នំពេញ ២c៣៥៦៥ បណ្តាលឲ្យខូចខាតផ្នែកខាងមុខ។
សមត្ថកិច្ចបានឲ្យដឹងទៀតថា មូលហេតុ ករណីគ្រោះថ្នាក់ចរាចរណ៍ ខាងលើបណ្តាលមកពីរថយន្តបើកបរលឿនមិនប្រយ័ត្ននៅពេលយប់។សមត្ថកិច្ច បានបន្តថា ករណីនេះ ក្រោយពេលកើតហេតុ អធិការនគរបាលស្រុក បានចាត់តាំងកម្លាំងជំនាញ ចុះធ្វើកំណត់ហេតុនិងជួយអន្តរាគមន៍ យកជនរងគ្រោះទៅកាន់មន្ទីរពេទ្យបង្អែកស្រុក រីឯម៉ូតូនិងរថយន្តត្រូវបានសមត្ថកិច្ច យកមករក្សាទុកនៅអធិការដ្ឋាននគរបាលស្រុកអន្លង់វែងរងចាំដោះស្រាយគ្នាទៅតាមច្បាប់៕
