ភ្នំពេញ ៖ បង្គោលភ្លើងបំភ្លឺផ្លូវមួយដើមនិងបង្គោលស្លាកសញ្ញាបង្ហាញផ្លូវមួយដើមបានបាក់រាបដល់ដី ដោយសារថយន្តមួយគ្រឿងបុករះចំពេញទំហឹង សំណាងដែលពុំមានមនុស្សរងគ្រោះថ្នាក់ ហើយរថយន្តបង្កបានបន្ថែមល្បឿនបើករត់គេចបាត់ស្រមោល ដែលហេតុការណ៍នេះបានកើតឡើងកាលពីវេលាម៉ោង៣និង១០នាទីរំលងអាធ្រាត្រឈានចូលថ្ងៃទី១៨ខែឧសភាឆ្នាំ២០១៤ នៅតាមបណ្ដោយមហាវិថីព្រះនរោត្ដមកែងផ្លូវលេខ២៨៨ ស្ថិតក្នុងសង្កាត់បឹងកេងកង៣ ខណ្ឌចំការមន។
បើតាមសំដីប្រជាពលរដ្ឋដែលបានឃើញហេតុបានអោយដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកតូយ៉ូតា ស៊ើប ពណ៌សំបកឪឡឹក មិនចាំស្លាកលេខ បើកបរដោយបុរសម្នាក់បានធ្វើដំណើរតាមបណ្ដោយមហាវិថីព្រះមុនីវង្ស ទិសដៅពីជើងទៅត្បូង ក្នុងល្បឿនលឿន ខណៈមកដល់ចំណុចកើតហេតុ រថយន្តបង្កក៏រេចង្កូតទៅខាងស្ដាំបុកបង្គោលស្លាកសញ្ញាបង្ហាញផ្លូវមួយដើមនិងជ្រុលទៅបុកបង្គោលភ្លើងបំភ្លឺផ្លូវមួយដើមទៀតបាក់រាបដល់ដី។
បន្ទាប់ពីកើតហេតុរថយន្តបង្កបានឈប់មួយសន្ទុះរួចក៏បន្ថែមល្បឿនទៅមុខគេចខ្លួនបាត់ស្រមោល សំណាងដែលនៅក្នុងហេតុការណ៍នេះពុំមានមនុស្សរងគ្រោះថ្នាក់។ ក្រោយពេលកើតហេតុសមត្ថកិច្ចមូលដ្ឋានបានចុះមកត្រួតពិនិត្យនិងកំពុងស្រាវជ្រាវស្វែងរករថយន្តបង្កដើម្បីដោះស្រាយតាមផ្លូវច្បាប់៕
