ខេត្តព្រះវិហារ លោកអៀសុខាប្រធានមន្ទីរបរិស្ថានខេត្តព្រះវិហារបានអោយដឹងនៅល្ងាចថ្ងៃទី២២ខែមិនាឆ្នាំ២០១៦ថាលោកកំពុងធ្វើការជាមួយលោកព្រះរាជអាជ្ញាអមសាលាដំបូងខេត្តព្រះវិហារដើម្បីមានវិធានការតាមផ្លូវច្បាប់ដើម្បីនាំយករថយន្តរ៉េវចំនួន០២គ្រឿងដែលដឹកឈើមូលសរុបចំនួន៨ដើមនោះមករក្សាទុកវិញ។រថយន្តរ៉េវ២គ្រឿងដែលដឹកជញ្ជូនឈើមូល០៨ដើមនោះត្រូវបានប្រជាសហគមន៍ឃាត់ទុកកាលពីថ្ងៃទី១៨មិនា២០១៦ ស្ថិតនៅភូមិពោធិ៍រវៀងឃុំគូលែនជើងស្រុកគូលែន ថ្មីៗនេះ។
លោកអៀសុខាបានបន្តថាក្រុមពលរដ្ឋទាំងនោះធ្វើការឃាត់ទុកបទល្មើសព្រៃឈើដោយខ្លួនឯងអស់រយះពេល៤ថ្ងៃមកហើយដោយពួកគាត់មិនបានរាយការណ៍អោយមន្ត្រីជំនាញបរិស្ថានបានដឹងនោះទេ។ប្រជាសហគមន៍នោះមិនទាន់ប្រកាសទទួលស្គាល់តាមផ្លូវច្បាប់នៅទ្បើយទេ។
លោកអៀសុខាថ្លែងដូច្នេះថារថយន្តរ៉េវ២គ្រឿងនិងឈើមូលចំនួន០៨ដើមជារបស់ក្រុមហ៊ុនកូម៉ូលីដែលមានអាជ្ញាប័ណ្ណប្រមូលកាកសំណល់ព្រៃឈើក្នុងក្រុមហ៊ុនដីសម្បទានសេដ្ឋកិច្ចប្ល៊ូហ៊ីវវិនមានមូលដ្ឋានក្នុងស្រុកគូលែនគឺខាងនាយកដែនជម្រកព្រៃឈើគូលែនព្រហ្មទេពទើបដឹងច្បាស់អំពីទំហំផ្ទៃដីវិនិយោគ។
អាជ្ញាធរស្រុកគូលែនបានអោយដឹងផងដែរថាពិតជាមានករណីប្រជាសហគមន៍ឃាត់ទុករថយន្តរ៉េវចំនួន២គ្រឿងដឹកឈើមូលប្រាកដមែនកាលពីថ្ងៃទី១៨មិនា២០១៦ស្ថិតនៅភូមិពោធិ៍រវៀងឃុំគូលែនជើងស្រុកគូលែនប៉ុន្តែពួកគាត់មិនបានសហការជាមួយអាជ្ញាធរស្រុកទេ។ពួកគាត់មិនព្រមប្រគល់រថយន្តនិងឈើមូលទាំងនោះមកអោយសាលាស្រុករក្សាទុកនោះទេរហូតមកដល់ថ្ងៃទី២២មិនានេះ។
អាជ្ញាធរស្រុកថ្លែងដូច្នេះថាក្រុមហ៊ុនកូម៉ូលីបានស្នើសុំអោយលោកអភិបាលស្រុកគូលែនជួយចុះសម្របសម្រួលដើម្បីសុំរថយន្តរ៉េវទាំង០២គ្រឿងនោះមកវិញប៉ុន្តែត្រូវអាជ្ញាធរស្រុកឆ្លើយថាវាជាការងាររបស់ជំនាញបរិស្ថានខាងអាជ្ញាធរស្រុកបានត្រឹមតែបញ្ជូនកំលាំងសមត្ថកិច្ចអោយទៅការពារនិងឃ្លាំមើលគ្រឿងចក្រប៉ុណ្ណោះ។
រីឯសេចក្តីរាយការណ៍ពីប្រជាពលរដ្ឋនៅមូលដ្ឋានបានអោយដឹងថាប្រជាសហគមន៍បានចុះល្បាតការពារសហគមន៍ព្រៃឈើកាលពីថ្ងៃទី១៨មិន២០១៦ហើយបានប្រទះឃើញរថយន្តរ៉េវចំនួន០២គ្រឿងកំពុងដឹកឈើមូលសរុបចំនួន០៨ដើមរួមទាំងមានរណាយន្ត១គ្រឿងថែមទៀតក៍នាំគ្នាឃាត់ទុកតែម្តងស្ថិតនៅភូមិពោធិ៍រវៀងឃុំគូលែនជើងស្រុកគូលែន។ឈានចូលថ្ងៃទី២០មិនា២០១៦ខាងជំនាញបរិស្ថានដែនគូលែនព្រហ្មទេពបានចុះទៅសុំយកវត្ថុតាងរថយន្តនិងឈើមូលទាំងនោះយកទៅរក្សាទុកនៅទីស្នាក់ការបរិស្ថានវិញប៉ុន្តែត្រូវបានប្រជាសហគមន៍ព្រៃឈើបដិសេធមិនព្រមប្រគល់អោយនោះទេ។
ប្រភពព័ត៌មានដដែលលើកទ្បើងថាខាងសហគមន៍ព្រៃឈើមានមូលហេតុរបស់ខ្លួនវិញថាការដែលមិនព្រមប្រគល់វត្ថុតាងបទល្មើសព្រៃឈើអោយមន្ត្រីជំនាញបរិស្ថានរក្សាទុកនោះដោយសារលើកមុនៗបានឃាត់ទុកនិងបានដោះស្រាយគ្នាប្រគល់អោយក្រុមហ៊ុនកូម៉ូលីវិញប៉ុន្តែមិនមានប្រសិទ្ធភាពឈប់ធ្វើសកម្មភាពទេ។ប្រភពព័ត៌មានបានដកស្រង់រឿងរ៉ាវនោះអោយដឹងថាភាគីសហគមន៍មិនពេញចិត្តទាល់តែសោះចំពោះខាងក្រុមហ៊ុននៅតែរំលោភចូលទៅកាប់ឈើមូលដដែលៗក្នុងដែនសហគមន៍ព្រៃឈើសរុបអស់ប្រមាណ៥៣ដើមរួចមកហើយនាពេលកន្លងមក។លើកនេះតំណាងសហគមន៍នឹងយករថយន្តនិងឈើទាំងនោះរួមទាំងរណាយន្ត០១គ្រឿងទៅប្រគល់ជូនតុលាការខេត្តព្រះវិហារផ្ទាល់ដៃតែម្តង។
អ្នកសារព័ត៌មានមិនអាចសុំការបំភ្លឺពីលោកប្រធានក្រុមហ៊ុនកូម៉ូលីបានទេនៅថ្ងៃនេះពាក់ព័ន្ធទៅនឹងរឿងអាស្រូវខាងលើហើយចង់ដឹងថាតើខាងក្រុមហ៊ុនពិតជាបានរំលោភចូលកាប់ឈើរបស់ប្រជាសហគមន៍អស់ចំនួន៥៣ដើមប្រាកដមែនឬមួយយ៉ាងណា?។អ្នកសារព័ត៌មានរង់ចាំទទួលនូវការបំភ្លឺពីតំណាងក្រុមហ៊ុនប្រមូលកាកសំណល់ព្រៃឈើឈ្មោះកូម៉ូលីជានិច្ច។
គួរបញ្ជាក់ថាសន្ទសន៍ហាងឆេងទីផ្សារទិញលក់គ្រឿងឈើលេខ២ប្រភេទឈើផ្តៀកក្នុងស្រុកត្រូវបានគេដឹងថាមានតំលៃប្រមាណ៤០០ដុល្លារអាមេរិកក្នុង១ម៉ែត្រគូបនិងឈើលេខ១ប្រភេទគគីរមានតំលៃប្រមាណ៥០០ដុល្លារអាមេរិកក្នុង១ម៉ែត្រគូបឯណោះ។កត្តានេះបានអោយកើតមានក្រុមហ៊ុនដឹកឈើអារលេខ១និងលេខ២ច្រើនផងដែរទៅតាមមហិច្ឆតាលោភចង់កើបលុយរបស់មនុស្សព្រោះវាអាចចំណេញលុយយ៉ាងច្រើនឆាប់ក្លាយទៅជាអ្នកមានថែមទៀត៕
