ខេត្តសៀមរាបដើម្បីធ្វើឲ្យក្រុងប្រវត្តិសាស្ត្រសៀមរាប ឲ្យកាន់តែមានសោភណ្ឌភាពកាន់តែស្រស់ត្រកាល ក្នុងការទទួល ស្វាគមន៍ភ្ញៀវទេសចរណ៍ជាតិ អន្តរជាតិ ក្នុងឱកាសប្រជាពលរដ្ឋកម្ពុជា ទទួលសាទរទេវតាឆ្នាំថ្មី ឆ្នាំវក អដ្ឋស័ក ព.ស ២៥៦០ ដែលគ្រោងនឹងប្រារព្ធឡើង ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០១៦ ខាងមុខនេះ ។ នេះក៏ជាលើកទី៤ហើយ ក្នុងការរៀបចំនូវព្រឹត្តិការណ៍អង្គរសង្ក្រាន្ត នៅលើទឹកដីប្រវត្តិសាស្ត្រសៀមរាប ដែល បានប្រព្រឹត្តទៅ ចំនួន៣លើកមកហើយ ដែលធ្វើឲ្យមានកិត្តិសព្ទ័ប្រពៃណីជាតិបានល្បីល្បាញនៅលើពិភពលោក ព្រមទាំងទទួល បានជោគជ័យលើវិញ្ញាសារសំខាន់ៗ នៅក្នុងព្រឹត្តិការណ៍អង្គរសង្ក្រាន្តទៀតផង ។
នៅព្រឹកថ្ងៃទី២២ ខែ មីនា ឆ្នាំ ២០១៦នេះ គណៈ កម្មការរៀបចំសោភណ្ឌភាពក្រុងសៀមរាប.អង្គរ បាន បើកកិច្ចប្រជុំរបស់ខ្លួន នៅរដ្ឋបាលសាលាខេត្តសៀមរាប ក្រោមកិច្ចដឹកនាំរបស់លោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្ត ។
មានប្រសាសន៍ក្នុងកិច្ចប្រជុំនោះលោកបណ្ឌិត ឃឹម ប៊ុនសុង ដើម្បីទទួលសាទរបុណ្យចូលឆ្នាំថ្មី ប្រពៃណី ជាតិនាពេលខាងមុខនេះ ក្នុងការទទួលស្វាគមន៍ភ្ញៀវជាតិ អន្តរជាតិ និង ប្រតិភូថ្នាក់ដឹកនាំកំពូលៗជាតិ អន្តរជាតិ ខេត្តត្រូវធ្វើការរៀបចំកែលម្អនូវសោភណ្ឌភាពក្រុង នៅតាមបណ្តាដងផ្លូវសាធារណៈ ទីប្រជុំជន ដើម្បីធានាឲ្យបាន នូវសុវត្ថិភាព សន្តិសុខ សណ្តាប់ធ្នាប់ អនាម័យ បរិស្ថាន នៃក្រុងប្រវត្តិសាស្ត្រ ។ ក្នុងនោះដែរឯកឧត្តមបណ្ឌិត ក៏ បានលើកនូវផែនការមួយចំនួន ដល់ផ្នែកជំនាញ និង អាជ្ញាធរក្រុងសៀមរាប ក្នុងការរៀបចំនូវបរិស្ថាន អនាម័យ តាមដងស្ទឹងប្រវត្តិសាស្ត្រសៀមរាប ដងវិថីនានា សំខាន់នៅជុំវិញបរិវេណព្រះវិហារព្រះអង្គចេកព្រះអង្គចម ដែល ជាទីតាំងដ៏មានសារៈសំខាន់នៅក្នុងពិធីអង្គរសង្ក្រាន្តនាថ្ងៃខាងមុខ ទាំងថ្នាក់ដឹកនាំ និង ប្រជាពលរដ្ឋចូលធ្វើពិធី បូជា ផ្កាភ្ញី ទៀនធូក ដើម្បីសុំសេចក្តីសុខសប្បាយ ។ លោកបណ្ឌិត ឃឹម ប៊ុនសុង ក៏បានគូសបញ្ជាក់ថា ដើម្បីឲ្យក្រុង យើងមានសោភណ្ឌភាពប្រកបទៅដោយសម្រស់បៃតង មន្ទីរពាក់ព័ន្ធ និង អាជ្ញាធរក្រុង ត្រូវធ្វើការផ្សព្វផ្សាយ បំផុស ដល់ប្រជាពលរដ្ឋ ឲ្យចូលរួមក្នុងការធ្វើបរិស្ថាន អនាម័យ និង តុបតែងនៅតាមមុខលំនៅដ្ឋាន ក្នុងការទទួលនូវសិរី សួស្តីឆ្នាំដល់គ្រប់ក្រុមគ្រួសារមន្ត្រីរាជការ និង ប្រជាពលរដ្ឋ ។ ក្នុងនោះឯកឧត្តមបណ្ឌិតក៏បានសង្កត់ធ្ងន់ចំពោះ ផ្នែក ជំនាញបច្ចេកទេស ក្នុងការរៀបចំតុបតែងនូវភ្លើងលម្អ និង ភ្លើងបំភ្លឺតាមដងផ្លូវ និង ទីប្រជុំជនសាធារណៈ ព្រមទាំង សូមឲ្យមន្ទីរបរិស្ថាន ធ្វើការរៀបចំដាក់នូវធុងសម្រាមនៅតាមទីប្រជុំជនសំខាន់ៗ ក្នុងការរៀបចំពិធី និង ដាក់នូវបង្គន់ អនាម័យចល័ត និង ការផ្គត់ផ្គង់ទឹកទៀតផង ។ ក្នុងនោះឯកឧត្តមបណ្ឌិតបាន ដាក់នូវផែនការមួយចំនួន ដល់លោក នាយកទីចាត់ការហិរញ្ញវត្ថុ សាលាខេត្ត ត្រូវធ្វើការរៀបចំ តុបតែងលម្អនៅតាមក្លោងទ្វារ និង រៀបចំដាំផ្កាបន្ថែមនៅ តាមសួនច្បារទ្រូងផ្លូវក្នុងក្រុង និង រៀបចំភ្លើងនៅតាមដើមឈើ ឲ្យមានសម្រស់នៅក្នុងពេលរាត្រីទៀតផង ។
លោកបណ្ឌិត ឃឹម ប៊ុនសុង ក៏បានឲ្យដឹងផងដែរថា ក្នុងព្រឹត្តិការណ៍អង្គរសង្ក្រាន្តឆ្នាំ២០១៦នេះ ដោយមាន ការអញ្ជើញចូលរួមពីភរិយាឥស្សរជនថ្នាក់ដឹកនាំជាន់ខ្ពស់ជាតិ ក្នុងការប្រកួតលើវិញ្ញាសារផ្សេងៗផងដែរ ។ សូម បញ្ជាក់ផងដែរថា កម្មវីធីអង្គរសង្ក្រាន្ត នៅលើទឹកដីអង្គរនៃយើង ឆ្នាំ២០១៦នេះ ប្រព្រឹត្តបើកទៅក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី និង សម្តេច គតិព្រឹត្តបណ្ឌិត ប៊ុន រ៉ានី ហ៊ុន សែន ៕ ដោយគឿនវ៉េត
