ខេត្តកំពង់ឆ្នាំង៖បន្ទាប់ពីប្រជាពលរដ្ឋរាយការណ៍ថា មានគេឈូសឆាយរំលោភយកដីព្រៃរបស់រដ្ឋរាប់រយហិកតានៅក្នុងភូមិក្តុល ឃុំគ្រាំងស្គារ ស្រុកទឹកផុស នៅថ្ងៃទី២៣ ខែមីនា ឆ្នាំ២០១៦ លោក ឈួរ ច័ន្ទឌឿន អភិបាលខេត្តកំពង់ឆ្នាំង បានបញ្ជារអោយក្រុមការងារចំរុះថ្នាក់ខេត្ត ដឹកនាំដោយលោក ជុន ថារិទ្ធ ស្នងការរងនគរបាលខេត្ត បានចុះទៅពិនិត្យវាស់វែង និងធ្វើការស្រាវជ្រាវករណីប្រជាពលរដ្ឋចោទថា លោក សោម សុទ្ធ មេភូមិក្តុល និងឈ្មោះ ម៉ៅ វឿន ជាឈ្មួញគក់ជេរដី មានគ្រឿងចក្រលួចឈូសឆាយរំលោភយកដីព្រៃរដ្ឋខាងលើនេះ។
លោក ជុន ថារិទ្ធ ប្រធានក្រុមការងារចំរុះខេត្ត បានអោយដឹងថា៖ លោកអភិបាលខេត្តកំពង់ឆ្នាំងបានបញ្ជារអោយក្រុមការងារចំរុះដែលមាន មន្ទីរសុរិយោដីខេត្ត ខ័ណ្ឌរដ្ឋបាលព្រៃឈើ កងរាជអាវុធហត្ថស្រុកខេត្ត នគរបាលស្រុកខេត្ត និងអាជ្ញាធរស្រុកទឹកផុសផងដែរ ចុះស្រាវជ្រាវករណីឈូសឆាយដីចំណុចខាងលើនេះ។
លោកអភិបាលខេត្តបានអោយក្រុមការងារចំរុះពិនិត្យ៖ ទី១.ត្រួតពិនិត្យមើលទីតាំងដីគ្រប់ចំណុចឈូសឆាយរួច និងមិនទាន់ឈូសឆាយដែលប្រជាពលរដ្ឋបានរាយការណ៍ ២.ផ្ទៀងផ្ទាត់ទិន្នន័យរវាងរដ្ឋបាលព្រៃឈើ និងសុរិយោដី ៣.ស្រាវជ្រាវរកក្បាលដីដែលបានវាស់វែងរួច ក្បាលដីលេខប៉ុន្មាន ឈ្មោះអ្វី ដីណាជាដីធ្វើអនុប្រយោគ ដីណាជាដីប្រជាពលរដ្ឋ ដីណាជាដីព្រៃរដ្ឋ ៤.ដីដែលគេលបលួចឈូសឆាយរួចរាល់មានហិកតា អ្នកណាជាអ្នកឈូសឆាយ ទិញពីអ្នកណាពិតប្រាកដ មានច្បាប់អនុញាតិអោយឈូសឆាយឬទេ ៥.ពាក់ព័ន្ធទៅនឹងការចែកលុយក្នុង១គ្រួសារ១០០ដុល្លា អ្នកណាជាអ្នកចែក? បានលុយពីណា? មានគោលបំណងអ្វី? ៦. ស្រាវជ្រាវរកអ្នកនៅពីក្រោយរឿងហេតុនេះ ៧.ត្រូវធ្វើរបាយការណ៍ជូនគណៈបញ្ជាការឯកភាពរដ្ឋបាលខេត្តអោយបានឆាប់តាមដែលអាចធ្វើបាន។ ចំណែកការចុះស្រាវជ្រាវក្នុងថ្ងៃនេះក្រុមការងារចំរុះខេត្ត បានចុះវាស់និយាមកាមលើដីឈូសឆាយជាក់ស្តែងទាំងអស់ដើម្បីផ្ទៀងផ្ទាត់ទិន្ន័យជាមួយទិន្ន័យចាស់ និងក្តាប់ព័ត៌មានពីអ្នកពាក់ពន្ធ័ពុំទាន់បានទទួលលទ្ធផលនៅឡើយទេ។
ដោយឡែកតំណាងប្រជាពលរដ្ឋជាង៣០គ្រួសារ រស់នៅក្នុងភូមិក្តុល ឃុំក្រាំងស្គារ ស្រុកទឹកផុស សុំលាក់ឈ្មោះបានអោយដឹងថា៖ កន្លងមកមានឈ្មួញគក់ជេរដី និងលោកមេភូមិក្តុល បានឃុបឃិតគ្នាបោកប្រាស់ប្រជាពលរដ្ឋដោយយកលុយជាធ្នាក់ គឺគេបានយកលុយអោយប្រជាពលរដ្ឋក្នុង១គ្រួសារ១០០ដុល្លា ដោយប្រាប់ថាជាលុយសម្តេចតេជោ ហ៊ុន សែន ជួយប្រជាពលរដ្ឋក្រីក្រ និងបានអោយប្រជាពលរដ្ឋផ្តិតមេដៃទទួលយកលុយ ក្រោយមកគេបានយកស្នាមមេដៃប្រជាពលរដ្ឋ ទៅធ្វើឯកសារទិញដីលក់ទៅអោយឈ្មួញនៅចំណុចដក់ត្រី ភូមិក្តុល ហើយឈ្មោះ ម៉ៅ វឿន ដែលមានអាបុល៤គ្រឿង អេស្កាវ៉ាទ័រ១គ្រឿង និងត្រាក់ទ័រធំៗ៣គ្រឿង ក៏បានលួចឈូសឆាយដីព្រៃទាំងនោះជាបន្តបន្ទាប់រយះពេលជិត១ឆ្នាំបានប្រមាណ៤០០ហិកតាហើយ។ ទាក់ទងនិងរឿងនេះលោក សោម សុទ្ធ មេភូមិក្តុល បានអោយដឹងថា លោកមិនបានប្រព្រឹត្តដូចការចោទប្រកាន់របស់ប្រជាពលរដ្ឋឡើយ ចំពោះការទិញលក់ដីជារឿងអ្នកទិញដីជាមួយប្រជាពលរដ្ឋ។ដោយឡែកឈ្មោះ ម៉ៅ វឿន ជាអ្នកគួកជេរដីនិងឈូសឆាយដីព្រៃ មិនអាចសុំការបំភ្លឺបានទេជុំវិញការចោទប្រកាន់ខាងលើនេះ ព្រោះពេលតេចូលលោកបានបិតទូរស័ព្ទនៅល្ងាចថ្ងៃទី២៣ ខែមីនានេះ។
ជុំវិញរឿងខាងលើនេះគេឆ្ងល់ថា ចំណុចដក់ត្រីនេះត្រូវបានគេឈូសឆាយដីព្រៃជិត១ឆ្នាំមកហើយ ហេតុអីទើបតែមានការភ្ញាក់ផ្អើល ហើយនៅក្នុងរយះជិត១ឆ្នាំពេលនេះអាជ្ញាធរភូមិឃុំស្រុកម្តេចមិនដឹងនិងមិទប់ស្កាត់។ដោយឡែកមន្ត្រីសុរិយោដីខេត្តបានអោយដឹងថា ដីនៅចំណុចនេះមួយចំនួនក្រុមនិសិត្សបានវាស់វែងអោយប្រជាពលរដ្ឋ ករណីនេះពេលក្រុមការងារចំរុះវាស់វែងហើយយកទិន្ន័យនេះទៅផ្ទៀងផ្ទាត់ជាមួយនិងទិន្ន័យចាស់ និងទិន្ន័យរបស់រដ្ឋបាលព្រៃឈើខេត្ត ទើបដឹងថាដីព្រៃរដ្ឋដែលគេឈូសឆាយរំលោភយកទាំងអស់នោះមានប៉ុន្មានហិកតា ហើយអាជ្ញាធរខេត្តនិងត្រូវចាត់ការបែបណា៕
