ខេត្តសៀមរាប៖ នៅថ្ងៃទី២៣ខែមិនាឆ្នាំ២០១៦វិទ្យុអេហ្វអឹមជាតិនគរភ្នំ103នៃមន្ទីរព័ត៌មានខេត្តសៀមរាបសហការជាមួយនឹងសាជីវកម្មសោតទស្សន៍អូស្ត្រាលី( A.B.C)ដែលកំពុងអនុវត្តលើគម្រោងជួយប្រពន្ឋ័ផ្សព្វផ្សាយក្នុងកម្ពុជា(ccap)បានរៀបចំបើកសិក្ខាសាលាក្រោមប្រធានបទ៖ការប្រើប្រាស់វិទ្យុក្នុងការពង្រឹងអភិបាលកិច្ចល្អមូលដ្ឋានក្នុងបំណងពង្រឹងកិច្ចសហប្រតិបត្តិការរវាងអាជ្ញាធរដែលធ្វើការផ្ទាល់នៅមូលដ្ឋាននិងវិទ្យុជាតិនគរភ្នំដើម្បីធ្វើយ៉ាងណាចែករំលែកព័ត៌មានឱ្យបានកាន់តែទូលំទូលាយជាពិសេសធ្វើសេចក្តីរាយការណ៍អំពីភាពរីកចម្រើននិងបញ្ហាប្រឈមដែលកើតមានក្នុងមូលដ្ឋានឱ្យមានប្រសិទ្ឋិភាពនិងលើកឡើងបង្ហាញផងដែរពីសកម្មភាពដែលវិទ្យុនគរភ្នំបាននឹងកំពុងផលិតកម្មវិធីគឺកម្មវិធីសន្ទនាមតិនិងកម្មវិធីយើងអាចធ្វើបានក្នុងន័យរួមគ្នាក្នុងការពង្រឹងអភិបាលកិច្ចល្អនៅមូលដ្ឋាន។លោករត្ន័នាតាប្រធានគម្រោងជំនួយប្រពន្ឋ័ផ្សព្វផ្សាយកម្ពុជាccapស៊ីខាប់)បានលើកឡើងថា៖ជំនួយរដ្ឋាភិបាលអូស្ត្រាលីតាមរយៈស្ថាប័នសោតទស្សន៍អូស្ត្រាលី( A.B.C)មានគោលការណ៍នៃការអនុវត្តន៍គម្រោងគឺផ្តោតទៅលើការប្រើប្រាស់ប្រពន្ឋ័ផ្សព្វផ្សាយដើម្បីលើកកម្ពស់សម្លេងនិងការចូលរួមរបស់ប្រជាពលរដ្ឋការលើកកម្ពស់គណនេយ្យភាពនិងតម្លាភាពរបស់អាជ្ញាធរមូលដ្ឋានក្នុងការផ្តល់សេវាជូនប្រជាពលរដ្ឋនិងការរួមចំណែកកសាងទំនាក់ទំនងវិជ្ជាជីវៈរវាងប្រពន្ឋ័ផ្សព្វផ្សាយ។លោកបន្តថា៖តាមរយៈគម្រោងជួយប្រពន្ឋ័ផ្សព្វផ្សាយក្នុងកម្ពុជានេះស្ថាប័នសាជីវកម្មសោទទស្សន៍អូស្ត្រាលីបាននឹងកំពុងផ្តល់ការគាំទ្របច្ចេកទេសនិងការបណ្តុះបណ្តាលដល់មន្ត្រីនៃវិទ្យុហ្វេសអឹមជាតិនគរភ្នំខេត្តសៀមរាបកំពត បាត់ដំបងនិងកំពង់ចាមរួមជាមួយនឹងវិទ្យុសហគមន៍ស្ត្រីនៅខេត្តក្រចេះ។គម្រោងនេះកំពុងអនុវត្តន៍ដំណាក់កាលទី២បន្ទាប់ពីដំណាក់កាលទី១រយៈពេល៤ឆ្នាំ(២០១១ដល់២០១៥)។តាមរយៈលទ្ឋផលក្នុងដំណាក់កាលទី១ គម្រោងដំណាក់កាលទី២នេះនឹងផ្តោពីកំណើននៃការយល់ដឹងនិងការរាយការណ៍អីអំពើហិង្សាលើស្ត្រី រួមជាមួយវិធានការដោះស្រាយរបស់អាជ្ញាធរដែលបានកើតមានរួចមកហើយនៅក្នុងដំណាក់កាលទី១តាមរយៈកម្មវិធីដែលយើងអាចធ្វើបាន។កម្មវិធីទាំងពីរដែលវិទ្យុអេហ្វអឹមជាតិនគរភ្នំកំពុងដំណើការវាសមស្របទៅនឹងគោលដៅយុទ្ឋសាស្ត្ររបស់រាជរដ្ឋាភិបាល ក៍ដូចជាជួយបង្កើនសម្លេងរបស់អាជ្ញាធរពាក់ពន្ឋ័ទាំងអស់រួមទាំងប្រជាពលរដ្ឋក្នុងការរួមដៃគ្នាលើកកម្ពស់អភិបាលកិច្ចល្អនិងបញ្ចប់អំពើហិង្សាលើស្ត្រី។ក្នុងបទបង្ហារបស់ក្រុមការងារវិទ្យុអេហ្វអឹមជាតិនគរភ្នំបានបង្ហាញថា៖កន្លងមកជួបបញ្ហាលំបាកមួយចំនួនដូចជា៖វាគ្មិនមួយចំនួនតូចមិនអញ្ជើញចូលរួមតាមការអញ្ជើញក្នុងកម្មវិធីគ្មានសមត្ថភាពឬមិនត្រូវជំនាញដើម្បីពិភាក្សាវាគ្មិនជាស្ត្រីចូលរួមក្នុងកម្មវិធីមានចំនួនតិចតួចកង្វះខាតការទទួលបានព័ត៌មានពាក់ពន្ឋ័នឹងការងាររបស់មន្ទីរអង្គភាពស្ថាប័នឬអាជ្ញាធរលំបាកចុះទៅមូលដ្ឋានក្នុងការយកព័ត៌មាន។ថ្លែងក្នុងនាមអាជ្ញាធរខេត្តថ្នាក់ដឹកនាំខេត្ត លោក ប៊ុនថាឬទ្ឋិអភិបាលរងខេត្តបានសំណូមពរយ៉ាងទទូចដល់ស្ថាប័នអាជ្ញាធរ គ្រប់លំដាប់ថ្នាក់ វិស័យឯកជននិងអង្គការក្រៅរដ្ឋាភិបាលនានា ចូលរួមជាវាគ្មិន តាមសំណើរអញ្ជើញរបស់អាជ្ញាធរខេត្ត(កាលពីមុនប្រធានមន្ទីរជាអ្នកធ្វើលិខិតអញ្ជើញ តែចាប់ពីពេលនេះទៅប្រធានមន្ទីរ គ្រាន់តែធ្វើតារាងប្រក្រតីទិន បញ្ជូនមកអភិបាលនៃគណៈអភិបាលខេត្តៗនឹងចាត់តាំងចំៗមន្ត្រីដែលត្រូវចូលជាវាគ្មិន។ករណីនេះ ដើម្បីចៀសវាងការរកលេសគេចវេសឬក៍ឱ្យមន្ត្រីថ្នាក់ក្រោមទៅជំនួសដែលមិនអាចដោះស្រាយឬឆ្លើយតបបានសមរម្យទៅនឹងបញ្ហា។ លោក ប៊ុន ថាឬទ្ឋិ បានជម្រុញដល់មន្ត្រី អាជ្ញាធរពាក់ពន្ឋ័ទាំងអស់ ត្រូវចាត់ទុកកម្មវិធីសន្ទនាមតិថាជាវេទិកាសម្រាប់ស្ថាប័នជំនាញជួបជាមួយប្រជាពលរដ្ឋរួមដោះស្រាយក្តីកង្វល់របស់សង្គមដែលទាក់ទិនទៅនឹងវិស័យដែលយើងពាក់ពន្ឋ័ កម្មវិធីនេះមិនមែនជាវេទិកាជេរប្រមាថឬក៍ជាការឡើងជ្រុញនោះដែរ លើកលែងតែមន្ត្រីឆ្លើយតបឬដោះស្រាយមិនចំគោលដៅទើបសមជាសាច់ជ្រូកដែលត្រូវឡើងជ្រុញ។ លោកបានស្នើដល់ក្រុមការងារកម្មវិធីវិទ្យុ អេហ្វអឹមជាតិនគរភ្នំ ត្រូវស្រង់មតិយោបល់និងសំណូមពរផ្សេងៗរបស់ប្រិយមិត្តរួចផ្តល់ឱ្យសាលាខេត្ត ដើម្បីដាក់ជូនក្រុមប្រឹក្សានិងគណៈអភិបាលខេត្តពិចារណានិងដោះស្រាយតាមជាក់ស្តែង។
ក្នុងខេត្តសៀមរាបច្ចុប្បន្នមានវិទ្យុសរុបចំនួន៣៣ក្នុងនោះវិទ្យុផ្សាយផ្ទាល់ចំនួន២០ស្ថានីយ៍ ផ្សាយបន្តចំនួន១៣ស្ថានីយ៍ ។វិទ្យុអេហ្វអឹមជាតិនគរភ្នំ១០៣មេហ្កាហឺតជាវិទ្យុរបស់រដ្ឋ ចាប់ដំណើរការផ្សាយពីខែមករាឆ្នាំ២០១១រហូតមកនិងធ្វើការផ្សាយពីម៉ោង៥.៣០នាទីព្រឹក ដល់ម៉ោង១១យប់ ក្នុង១ថ្ងៃផ្សាយ១៧ម៉ោង កន្លះ។ក្នុងនោះផលិតកម្មវិធីព័ត៌មាន បទយកការណ៍ កម្មវិធីអប់រំ កម្មវិធីកំសាន កម្មវិធីកសិកម្ម កម្មវិធីវប្បធម៌កម្មវិធីអភិវឌ្ឍ កម្មវិធីច្បាប់ កម្មវិធីសន្ទនាមតិ និងកម្មវិធីយើងអាចធ្វើបាន។ ដោយគឿនវេត
