ស្ទឹងត្រែង៖សាលាក្រុងស្ទឹងត្រែងបានរៀបចំបរិស្ថាន និងពង្រឹងកំលាំងការពារសន្តិសុខក្នុងក្រុង ដើម្បីត្រៀមលក្ខណៈទទួល អបអរបុណ្យចូលឆ្នាំប្រពៃណីជាតិខ្មែរ នៅប៉ុន្មានថ្ងៃខាងមុខ ដើម្បីការពារសន្តិសុខឲ្យបានល្អជូនប្រជាពលរដ្ឋ និងភ្ញៀវទេសចរណ៏ដែលបានមក លេងនៅខេត្តស្ទឹងត្រែង។
លោកប៊ុនណារីអភិបាលក្រុង បានបញ្ជាក់នៅថ្ងែទី២៤មិនាឆ្នាំ២០១៦ថា៖យន្តការនេះ មន្ទីរអង្គភាព- ស្ថាប័នពាក់ព័ន្ធ និងផ្នែកជំនាញបានលើកផែនការ សំរាប់អនុវត្តក្នុងឆ្នាំនេះ មិនខុសពីឆ្នាំមុនៗទេ ។
លោកអភិបាលក្រុងបានអះអាងថា៖តបទៅនិងគោលការណ៏ខាងលើនេះសាលាក្រុងក៏បានលើកគោលការណ៏ការ ការពារសណ្តាប់ធ្នាប់សន្តិសុខ ការងារសម្អាតបរិស្ថាន ដើម្បីធ្វើឲ្យក្រុងមានសោភណ្ឌភាពផង បញ្ជៀសនៅឧបទ្ទវហេតុផ្សេងៗផង អញ្ចឹងយើងបានពង្រឹងកំលាំងប្រជាការពារ ដែលយើងបានបង្កើតហើយនោះបច្ចុប្បន្ននៅក្រុងស្ទឹងត្រែងទាំងមូលមានកំលាំងប្រជាការពារ៣៣៦នាក់អញ្ចឹងកំលាំងយើងអាចពង្រាយទៅតាមភូមិគ្រប់ភូមិទាំងអស់ដើម្បីចូលរួមជាមួយនគបាលសំរាប់ក្រុងស្ទឹងត្រែងយើងនេះយើងទប់ស្កាត់បានគ្រោះថ្នាក់ចរាចរណ៏ ទប់ស្កាត់បានចោរលួចចោរប្លន់ អញ្ចឹងយើងពង្រឹងកំលាងបន្តទៀតដើម្បីធ្វើយ៉ាងណាការងារការពារសន្តិសុខសណ្តាប់ធ្នាប់នេះជូនសុវត្ថិភាពក៏ដូចជាប្រជាពលរដ្ឋ។
លោកជា.វណ្ណចៅសង្កាត់ស្ទឹងត្រែងបញ្ជាក់ថា៖អាជ្ញាធរសង្កាត់តែងតែចូលរួមជារៀងរាល់ឆ្នាំរៀបចំក្រុមការងារការពារសន្តិសុខ រៀបចំក្រុងស្អាតនិងបានចាត់ចែង រៀបចំទីកន្លែងលេងកំសាននៅតាមទីអារាមទៅតាមប្រពែណីជាតិយើងតែប្រជាពលរដ្ឋមួយចំនួននិយមចេញទៅលេងនៅក្រៅខេត្តធ្វើឲ្យបាត់បង់និងភ្លេចប្រពៃណីរបស់ខ្លួន។
លោកបញ្ចាក់ថាឆ្នាំនេះសង្កាត់និងរៀបចំឲ្យបានប្រសើរជាងឆ្នាំមុន ដើម្បីគៀងគរប្រជាពលរដ្ឋឲ្យនៅលេងកំសានក្នុងទីអារាមចៀសវាងនាំគ្នាទៅលេងទៅឆ្ងាយ ដូចជានាំគ្នាទៅលេងទឹក-ទៅលេងខេត្តនានាចោលផ្ទះ- និងអាចចៀសវាងបានពីការគ្រោះថ្នាក់ចរាចរណ៏ផង។
លោកស្រីឃុន ស៊ាងប្រជាពលរដ្ឋលក់ដូរនៅក្រុងស្ទឹងត្រែង បានសាទរចំពោះការយកចិត្តទុកដាក់របស់សាលាក្រុង និងសង្កាត់ពីព្រោះការធ្វើបានបែបនេះ ប្រជាពលរដ្ឋយើងបានលេងកំសានសប្បាយនៅក្នុងវត្ត រក្សាបាននៅប្រពៃណីរបស់ខ្មែរយើង ដូចជារបែងរបាំចោលឈូងបោះអង្គុញជាដើម។លោកស្រីបន្ថែមថា៖ក្នុងនាមជាប្រជាពលរដ្ឋ ក៏ចូលរួមជួយអប់រំកូនចៅឲ្យប្រកាន់ខ្ជាប់ខ្ជួន នៅអំពើល្អវៀរចាកនូវអំពើអប្បាយមុខផ្សេងៗផងដែរ។
សូមបញ្ជាក់ថា៖គណៈកម្មការកែលំអរសោភណ្ឌភាពខេត្តក៏ដូចជាសាលាក្រុងបានកំណត់យកវត្តក្នុងក្រុងចំនូន៤ធ្វើជាទីកន្លែងកំសានរួមមានវត្តពោធិញ្ញាណ (ហៅវត្តព្រះអង្គធំ)វត្តស្រះកែវមុនីវណ្ណ(ហៅវត្តលើ)វត្តខត្តិយារាម(ហៅវត្តកណ្តាល)និងវត្តធម្មរង្សី (ហៅវត្តបាចុង)ដែលបងប្អូនប្រជាពលរដ្ឋយើងនិយមមកលេងជារៀងរាល់ឆ្នាំ៕
