( រូបភាពវីដេអូ) Champions League វគ្គផ្តាច់ព្រ័ត្រជាមួយ Real Madrid ក្លិប Atletico Madrid កំពុងតែមានក្តីព្រួយបារម្ភថា ក្លិបនឹងត្រូវបាត់បង់ខ្សែប្រយុទ្ធ Diego Costa និងកីឡាករ ដ៏សំខាន់ មួយរូបទៀតគឺ Arda Turan ក្នុងការប្រកួត Champions League វគ្គផ្តាច់ព្រ័ត្រជាមួយ Real Madrid នៅចុងសប្តាហ៍ក្រោយ ។ Costa បានរងរបួសភ្លៅហើយត្រូវបានប្តូរចេញក្នុងជំនួបជាមួយ Barcelona នៅទឹកដី Camp Nou កាលពីយប់ ថ្ងៃសៅរ៍ក្រោយពេលចូលលេងបានត្រឹម ១៤ នាទីប៉ុណ្ណោះ ។
យោងតាមប្រធានក្លិប Atletico លោក Enrique Cerezo បាននិយាយឲ្យដឹងថា កីឡាករសញ្ជាតិអេស្ប៉ាញ ដើមកំណើតប្រេស៊ីលរូបនេះអាចនឹងត្រូវអវត្តមានយ៉ាងតិចណាស់ក៏ពីរសប្តាហ៍ដែរ ។ ស្របពេលជាមួយគ្នានោះ កីឡាករ Turan ក៏ត្រូវបានប្តូរចេញផងដែរនៅនាទីទី២៣ដោយសារតែបញ្ហារបួស ត្រគាក បន្ទាប់ពីប៉ះទង្គិចជាមួយកីឡាករ Cesc Fabregas ។ គួរបញ្ជាក់ថា កីឡាករទាំងពីររូបនេះនឹងត្រូវធ្វើការពិនិត្យសុខភាពនៅ២៤ម៉ោងក្រោយ ៕
