ខេត្តព្រះវិហារ សេចក្តីរាយការណ៍បានអោយដឹងថាលំនៅដ្ឋាន០១ខ្នងទំហ៊ំ៦ម៉ែត្រគុណនឹង៧ម៉ែត្រធ្វើពីឈើប្រក់ស័ង្កសីត្រូវអគ្គិភ័យឆាបឆេះខ្ទេចគ្មានសល់កាលពីវេលាម៉ោង០៥រសៀលថ្ងៃទី២៤មិនា២០១៦ស្ថិតនៅភូមិគោកឃុំរំដោះស្រុកជាំក្សាន្តព្រមទាំងបំផ្លាញទ្រពសម្បត្តិអស់មួយចំនួន។ឧប្បត្តិហេតុភ្លើងឆេះផ្ទះនោះមិនបណ្តាលអោយគ្រោះថ្នាក់ដល់មនុស្សណាម្នាក់នោះទេ។អាជ្ញាធរមូលដ្ឋានបានអោយដឹងថាដើមហេតុភ្លើងឆេះផ្ទះនោះបង្កទ្បើងដោយសារភ្លើងចង្ក្រានដែលដាំបាយទុកចោល។ស្ដ្រីម្ចាស់ផ្ទះឈ្មោះពិននងអាយុ៥៣ឆ្នាំមុខរបរកសិករជាស្ដ្រីម៉េម៉ាយរស់នៅភូមិគោកឃុំរំដោះស្រុកជាំក្សាន្តខេត្តព្រះវិហារ។
ប្រភពព័ត៌មានដដែលបានបន្តថាហេតុការណ៍ភ្លើងឆេះផ្ទះនេះអ្នកភូមិបាននាំគ្នាជួយដងទឹកពន្លត់ភ្លើងដែរប៉ុន្តែមិនរលត់សោះដោយសារស្របពេលជាមួយគ្នានោះមានខ្យល់ហើយអាកាសធាតុក្តៅខ្លាំងថែមទៀត។ទីបំផុតត្រូវអគ្គិភ័យឆាបឆេះបំផ្លាញផ្ទះនិងទ្រព្យសម្បត្តិទាំងស្រុង។
អាជ្ញាធរបញ្ជាក់ថាទ្រពសម្បត្តិដែលត្រូវភ្លើងឆេះបំផ្លាញរួមមានលុយចំនួន៣លានរៀលស្រូវពូជចំនួន១០ការ៉ុងនិងសំលៀកបំពាក់មួយចំនួនទៀត។បន្ទាប់មកអាជ្ញាធរមូលដ្ឋានបានយកអំណោយកាកបាទក្រហមខេត្តមួយចំនួនទៅជួយឧបត្ថម្ភដល់ស្ដ្រីម៉េម៉ាយខាងលើផងដែរដើម្បីជួយសម្រាលទុក្ខលំបាកមួយគ្រា។
គួររំលឹកថាកាលពីឆ្នាំ២០១៤ប្តីរបស់គាត់ឈ្មោះសៀនប៊ុនឈឿនជានាយទាហានឋានន្តរសក្តិវរះសេនីយទោបានស្លាប់បាត់បង់ជីវិតនៅតាមខ្សែត្រៀមសមរភូមិមុខដោយសារដើរជាន់មីនតោន។រំលងទើបបាន២ឆ្នាំមកដល់ពេលនេះអកុសលត្រូវអគ្គិភ័យឆាបឆេះផ្ទះជាកេរតំណែលរបស់ប្តីថែមទៀត៕
មង្គល
