ខេត្តកំពង់ឆ្នាំង៖ លោក ស៊ុប រ៉ា អគ្គនាយកអន្តរជាតិទទួលបន្ទុកអាហារហាឡាល់នៃក្រសួងពាណិជ្ជកម្ម និងជាប្រធានក្រុមប្រឹក្សានាយកក្លឹបយុវជនមូស្លីមកម្ពុជាបានថ្លែងថា« សិស្សានុសិស្សទាំងអស់ត្រូវតែខិតខំរៀនសូត្រ ព្រោះពេលវេលាគឺជាមាសប្រាក់ ចំណែកលោកគ្រូអ្នកគ្រូជាដំបូលដែលយើងជ្រកសំរាប់ក្រេបជញ្ជក់យកចំណេះវិជ្ជាកសាងអនាគតរបស់ខ្លួន និងកសាងជាតិ » លោកបានថ្លែងបែបនេះនៅក្នុងពិធីជួបជុំ និងសំណេះសំណាលអតីតសិស្សវិទ្យាល័យ ប៊ុន រ៉ានី ហ៊ុនសែន រលាប្អៀរ ជាមួយសាស្ត្រាចារ្យ និងសិស្សានុសិស្សថ្នាក់ទី១២ ជាង២០០នាក់ នាព្រឹកថ្ងៃទី២៦ ខែមីនា ឆ្នាំ២០១៦។
លោកបានបន្តទៀតថា៖ មនុស្សគ្រប់រូបកើតមក គ្មានអ្នកណាចេះដឹងខ្លួនឯងនោះទេ គឺចេះមកពីប្រឹងរៀន ហើយក្លាយជាអ្នកមានមកពីប្រឹងរក។ លោកផ្តាំផ្ញើផងដែរដល់សិស្សានុសិស្សទាំងអស់អោយតស៊ូខិតខំរៀនសូត្រ ត្រូវជៀសឆ្ងាយពីគ្រឿងញៀន ល្បែងស៊ីសង ព្រោះបញ្ហាទាំងអស់នេះជាកត្តានាំអោយបាត់បង់ការរៀនសូត្រ បាត់បង់អនាគត និងធ្វើអោយសង្គមស្អប់ខ្ពើម។ ម្យ៉ាងទៀតត្រូវថែទាំសុខភាពអោយបានល្អ ទើបរៀនសូត្រពូកែ ពិសេសត្រូវនាំគ្នាគោរពច្បាប់ចរាចរណ៍អោយបាន ដើម្បីជៀសផុតពីគ្រោះថ្នាក់ចរាចរណ៍ និងទើបធ្វើអោយក្រុមគ្រួសារមានសេចក្តីសុខ។ 
ដោយឡែកនៅក្នុងពិធីសំណេះសំណាលនេះដែរ សមាគមន៍យុវជនមូស្លីមកម្ពុជានិងអតីតសិស្សបានជួយផ្តល់អាហាររូបករណ៍ថ្នាក់ឧត្តមសិក្សា ដល់សិស្សថ្នាក់ទី១២ក្នុងវិទ្យាល័យប៊ុនរ៉ានីហ៊ុនសែនរលា ប្អៀរ ដែលប្រឡងជាប់ចំនួន១៥០នាក់ សំរាប់ឆ្នាំសិក្សា២០១៦ , ២០១៧ខាងមុខនេះ និងក៏បានជួយឧបត្ថមអណ្តូងស្នប់១គ្រឿងផងដែរសំរាប់ប្រើប្រាស់នៅក្នុងវិទ្យាល័យមួយនេះ។
លោក ខៀវ រិទ្ធី នាយកវិទ្យាល័យប៊ុន រ៉ានី ហ៊ុនសែន រលាប្អៀរ បានថ្លែងអំណរគុណយ៉ាងជ្រាលជ្រៅដល់ក្រុមការងារអតីតសិស្សវិទ្យាល័យដែលបានរៀបចំពិធីជួបជុំនេះឡើង ដើម្បីរំលឹកគុណលោកគ្រូអ្នកគ្រូដែលបានខិតខំបង្ហាត់បង្រៀនអោយពួកលោកមានចំណេះដឹងខ្ពង់ខ្ពស់ និងមានការងារធ្វើដ៍ល្អប្រ សើរនៅក្នុងពេលនេះ ទន្ទឹមនេះដែរក៍បានចូលរួមផ្តល់បទពិសោធន៍ល្អៗដល់សិស្សជំនាន់ក្រោយនៅក្នុងវិទ្យាល័យអោយខិតខំរៀនសូត្រ ដើម្បីមានអនាគតល្អប្រសើរ ជួយអភិវឌ្ឍន៍ប្រទេសជាតិអោយសំបូរសប្បាយរុងរឿង ជាមួយប្រមុខរាជរដ្ឋាភិបាលកម្ពុជា។
ក្នុងពេលនោះដែរ អតីតសិស្សដែលរៀនពូកែនៅក្នុងវិទ្យាល័យចំនួន២នាក់ បានឡើងបង្ហាញ និងចែករំលែកបទពិសោធន៍ល្អៗនៃការខិតខំរៀនសូត្ររបស់ពួកគាត់រហូតក្លាយជាបណ្ឌិត និងជាគ្រូថ្នាក់ឧត្តមសិក្សាមានប្រាក់ខែខ្ពស់ ដល់សិស្សានុសិស្សដែលបានចូលរួមក្នុងពិធីនោះថា៖ ដើម្បីទទួលជោគជ័យក្នុងការសិក្សា ជាដំបូងយើងត្រូវមានសុខភាពល្អ ជៀសវាងគ្រឿងញៀន គ្រឿងស្រវឹង អពើអបាយមុខផ្សេងៗ និងត្រូវមករៀនសូត្រអោយទាន់ពេលវេលា ត្រូវស្តាប់លោកគ្រូអ្នកគ្រូក្នុងពេលសិក្សា ត្រូវមានទិសដៅ និងគោលដៅរបស់ខ្លួន ដោយរៀនផងស្រាវជ្រាវផង ដើម្បីជោគជ័យទៅថ្ងៃអនាគត។
នៅក្នុងពិធីនេះដែលលោក ស៊ុប រ៉ា និងអតីតសិស្សបានចែកការដូអនុស្សាវរីយ៍ ដល់លោកគ្រូអ្នកគ្រូក្នុងវិទ្យាល័យចំនួន៦០នាក់ ដើម្បីជាការដឹងគុណគ្រូដែលបានខិតខំផ្តល់ចំណេះដឹងអោយពួកគាត់មានអនាល្អ និងមានការងារធ្វើដ៏ប្រសើរនៅក្នុងពេលនេះ៕
