កាលពីចុងសប្តាហ៍កន្លងទៅ ឯកឧត្តម ច័ន្ទ សុផលអភិបាលខេត្តបាត់ដំបង បានអញ្ជើញជាអធិបតីនៅក្នុងពិធីសម្ពោធដាក់ឲ្យដំណើរការនូវភូមិគ្រឹះ រ៉ាវន ប៊ូទិករីសត និងភោជនីយដ្ឋានដែលទើបបើកថ្មីមួយកន្លែង ស្ថិតក្នុង ភូមិអូរខ្ជាយ សង្កាត់ព្រែកព្រះស្តេច ក្រុង – ខេត្តបាត់ដំបង ដោយមានបន្ទប់ស្នាក់នៅ ចំនួន ១៦បន្ទប់បំពាក់នូវគ្រឿងសង្ហាររឹមដ៏ទាន់សម័យ ប្រកបដោយផាសុខភាព សោភ័ណភាព ស៊ីវិល័យ មានអនាម័យនិងបរិស្ថានល្អ និងមានអាងហែលទឹកកំសាន្តផងដែរ។ភូមិគ្រឹះ រ៉ាវន ប៊ូទិក រីសត នឹងចាប់ដំណើរការបំរើសេវាកម្មទទួលភ្ញៀវទេសចរណ៍ជាតិ អន្តរជាតិ ចាប់ពីថ្ងៃនេះតទៅ។
លោក អ៊ូចអ៊ុ ភីនីស្សារ៉ា ប្រធានមន្ទីរទេសចរណ៍ខេត្តបាត់ដំបងបានឲ្យដឹងថា៖វិស័យទេសចរណ៍ខេត្តបាត់ដំបង មានការរីកចម្រើនជាលំដាប់ ក្នុងប៉ុន្មានឆ្នាំនេះ ជាក់ស្តែងក្នុងឆ្នាំ២០១៥កន្លងទៅនេះ វិស័យឧស្សាហកម្មទេសចរណ៍ក្នុងខេត្ត មានភ្ញៀវទេសចរដែលបានមកទស្សនាខេត្តបាត់ដំបងក្នុង ឆ្នាំ២០១៥ សរុប ៥៩៥.៧០៨នាក់ មានការកើនឡើង ១៣,១៤% បើប្រៀបធៀបទៅនិង ឆ្នាំ២០១៤ ដែលមានចំនួន៥២៦.៤៩៧នាក់។ដោយក្នុងនោះ ភ្ញៀវទេសចរជាតិសរុប ៥០១.២៦០នាក់ និងភ្ញៀវទេសចរអន្តរជាតិសរុប ៩៤.៤៤៨នាក់ ។ 
ដោយឡែកសណ្ឋាគារមានចំនួន៤០កន្លែង និងបន្ទប់ចំនួន១.៧៤៨បន្ទប់, ផ្ទះសំណាក់មាន ៨៦កន្លែង និង បន្ទប់ចំនួន១.០៨៤បន្ទប់។ ក្នុងចំណោមសណ្ឋាគារទាំង៤០កន្លែង នោះគឺ៖ មានសណ្ឋាគារលំដាប់ផ្កាយចំនួន០៧កន្លែង ផងដែរ ដូចជា៖លំដាប់ផ្កាយ២ ចំនួន០៣កន្លែង, លំដាប់ផ្កាយ៣ ចំនួន០៣កន្លែង និងលំដាប់ផ្កាយ៤ ចំនួន០១កន្លែង។លោកប្រធានមន្ទីរទេសចរណ៍ខេត្តបាត់ដំបង អ៊ូចអ៊ុ ភីនីស្សារ៉ា ក៏បានសង្កត់ធ្ងន់បន្ថែមទៀតថា៖ វិស័យទេសចរណ៍បានផ្តល់ផលប្រយោជន៍យ៉ាងច្រើនដល់សេដ្ឋកិច្ចសង្គម វប្បធម៌និងបរិស្ថាន ព្រមទាំងដោយផ្ទាល់និងដោយប្រយោល។ ហើយវិស័យទេសចរណ៍ ក៏ជា ចលករ ដ៏មានសារៈសំខាន់មួយផងដែរ ក្នុងការរួមចំណែកជម្រុញកំណើនសេដ្ឋកិច្ច តាមរយៈការទទួលបានភ្លាមៗនូវប្រភពចំណូលបរទេសក្នុងចរន្តសេដ្ឋកិច្ចកម្ពុជា ព្រមទាំងបង្កើតនិងបង្កើនការងារមុខរបរ និងចំណូលដល់ប្រជាពលរដ្ឋថែមទៀតផង ។
សមិទ្ធិផលថ្មលើទឹកបាត់ដំបងនាពេលនេះ ពិតជាបានបង្ហាញពី ការអនុវត្តសំដៅពង្រឹងការលើកកម្ពស់វិស័យទេសចរណ៍ឲ្យបានសមស្របតាមគោលនយោបាយរបស់រាជរដ្ឋាភិបាល និងក្រសួងទេសចរណ៍ ជាពិសេស ដោយទទួលបាននូវការគាំទ្រពីឯកឧត្តមច័ន្ទ សុផល អភិបាល នៃ គណៈអភិបាលខេត្តបាត់ដំបង ផងនោះ។ មន្ទីរទេសចរណ៍ខេត្តបាត់ដំបង បានជម្រុញនិងផ្សព្វផ្សាយយុទ្ធនាការ“ កម្ពុជា ព្រះរាជាណាចក្រ អច្ឆរិយៈ ” និងចលនាប្រឡងប្រណាំង“ ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ច ” ដែលជាយន្តការដ៏មានប្រសិទ្ធភាពក្នុងការគ្រប់គ្រង និងពង្រឹងគុណភាពផលិតផលទេសចរណ៍តាមរយៈភាពសកម្មក្នុងការអនុវត្ត ដែលបច្ចុប្បន្នកំពុងតែទទួលបាននូវការគាំទ្រ ការចូលរួម ជម្រុញនិងយកចិត្តទុកដាក់អនុវត្តពីគ្រប់ស្ថាប័នពាក់ព័ន្ធនៅក្នុងខេត្ត ទាំងផ្នែកឯកជន អង្គការជាតិ និងអន្តរជាតិ ជាពិសេសប្រជាពលរដ្ឋក្នុងខេត្តទាំងមូល ៕
