បន្ទាយមានជ័យ ៖ មិនថាម៉ូតូ រថយន្តតូចធំ ដឹកសំពីងសំពង និងមានសម្លេងលឺខ្លាំង ត្រូវបាននគរបាលចរាចរជើងគោកនៃស្នងការនគរបាលខេត្តបន្ទាយមានជ័យ បន្តចាប់អោយផ្លាស់ប្តូរស៊ីម៉ាំង និងរុះរើ និងអប់រំបញ្ឈប់ការដឹកលើសចំណុះ និងកែច្នៃស៊ីម៉ាំង ។
លោក សួន នីប៉ូ នាយរងការិយាល័យនគរបាលចរាចរជើងគោកនៃស្នងការនគរបាលខេត្តបន្ទាយមានជ័យ បានអោយដឹងថា ដោយអនុវត្តន៍តាមផែនការណ៍ណែនាំរបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានចាត់អោយការិយាល័យជំនាញ ធ្វើយ៉ាងណាឃាត់ចាប់ម៉ូតូ និងរថយន្តដែលកែច្នៃស៊ីម៉ាំងលឺសម្លេងខ្លាំង និងរថយន្តដឹកសំពីងសំពង ក្នុងនោះជាបន្តបន្ទាប់លោកបានឃាត់ម៉ូតូ និងរថយន្តតូចធំបានជាច្រើនគ្រឿង នាំយកមកការិយាល័យ អោយដោះដូរស៊ីម៉ាំងនិងធ្វើកិច្ចសន្យា អោយត្រឡប់ទៅវិញ ។ ក្រៅពីនោះ ក៏បានឃាត់រថយន្តធន់តូចប្រភេទកាមរី នីសាន់ ដែលដឹកលើសចំណុះធ្វើការផាកពិន័យតាមផ្លូវច្បាប់ ។
លោក ឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានអោយដឹងដែរថា មូលហេតុដែលអោយសមត្ថកិច្ចជំនាញធ្វើការឃាត់រថយន្ត ឬម៉ូតូដែលកែច្នៃអោយសម្លេងលឺ ព្រោះតែវារំខានដល់ការរស់របស់ប្រជាពលរដ្ឋ ជាពិសេសនៅពេលយប់ ដែលរំខានដំនេក និងប៉ះពាល់សណ្តាប់ធ្នាប់សាធារណៈ ។
ម៉ូតូដែលភាគច្រើនកែច្នៃ ជាម៉ូតូសេរីទំនើបលេខអូតូធន់ធំដែលភាគច្រើនអ្នកបើកជាយុវវ័យ ។ ក្នុងនោះលោកក៏បាន អំពាវនាវដល់យុវវ័យសម័យថ្មីធ្វើយ៉ាងណាកុំបំពានច្បាប់ចរាចរ បើកបរដោយពាក់មួកសុវត្ថិភាព និងបើកបរមិនលើសល្បឿនកំណត់ ៕ អ,ពៅ ២៩ មីនា ២០១៦
