បន្ទាយមានជ័យ ៖ ពលរដ្ឋប្រមាណជា១០០គ្រួសារ បានប្រតិកម្ម និងសម្តែងការមិនពេញចិត្តទៅលើកសិដ្ឋានចិញ្ចឹមទាមួយកន្លែងកណ្តាលទីប្រជុំជន ត្រង់ចំណុចស្តង់ទឹកកក ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បង្ករក្លិនស្អុយប៉ះពាល់ដល់ការរស់នៅប្រចាំថ្ងៃរបស់ពួកគាត។
តាមការអោយដឹងពីប្រជាពលរដ្ឋរងផលប៉ះពាល់ពីកសិដ្ឋានខាងលើ បានអោយដឹងថា កសិដ្ឋានខាងលើជារបស់ឈ្មោះ រ៉ា បានចិញ្ចឹមទាដោយប្រើកាកសំណល់សល់ពីកាស៊ីណូមកអោយទាស៊ី ប្រមាណ៤០០ក្បាលនិងបង្ករក្លិនស្អុយនេះជាង៣ឆ្នាំមកហើយ ។ ដោយឡែកនៅពេលដែលពួកគាត់នាំគ្នាទៅប្តឹងលោកមេភូមិ ហើយលោកមេភូមិបានកោះហៅ និងណែនាំដល់ម្ចាស់កសិដ្ឋានអោយប្តូរទីតាំងពីកណ្តាលក្រុងទៅក្រៅក្រុងដើម្បីជៀសវាង បង្ករផលប៉ះពាល់ដល់ការរស់នៅរបស់ប្រជាពលរដ្ឋ បែរជាម្ចាស់សកិដ្ឋាននិយាយថា បើចង់អោយគេប្តូរទីតាំងលុះត្រា រកទីតាំងថ្មីអោយគេមក ទើបគេប្តូរ ។
លោក សេង ឡុង មេភូមិគីឡូម៉ែត្រលេខ៤បានអោយដឹងថា ចំពោះម្ចាស់ទីតាំងខាងលើ ក្រោយត្រូវបានលោកកោះហៅធ្វើការណែនាំជាច្រើនលើក តែនៅតែមិនព្រមស្តាប់ លោកបានរាយការទៅខាងសង្កាត់ រួចរាល់ហើយ ហើបច្ចុប្បន្ននៅចាំតែងខាងសង្កាត់មានវិធានការវិញម្តង។
សូមបញ្ជក់ថាទីក្រុងប៉ោយប៉ែតជាទីក្រុងជាប់និងប្រទេសថៃដើមឡើយមិនទាន់មានហេដ្ឋារចនាសម្ព័ន្ធត្រឹមត្រូវតែសំបូរទៅដោយមនុស្សមកពីខេត្តផ្សេងរស់នៅយ៉ាងច្រើនដែលងាយនិងរងផលប៉៉ះពាល់ពីបរិស្ថានដោយសាមនុស្សជានាក់បង្កើត។
