ខេត្តព្រះវិហារ វីរកងទ័ពនិងកំលាំងនគរបាលវរះការពារព្រំដែនគោកទាំងអស់ដែលមានកាតព្វកិច្ចបំរើមាតុភូមិនៅតំបន់ព្រំដែនប្រាសាទព្រះវិហារកំពុងបំពេញការងារជាធម្មតា។ប៉ុន្តែអ្វីដែលយើងមានការកត់សម្គាល់ជាងគេនោះគឺចាប់ពីចុងខែមីនាដល់កៀកជិតចូលឆ្នាំប្រពៃណីយខ្មែរតែងតែមានអំណោយស្បៀងអាហារភេសជ្ជះនិងបន្លែផ្លែឈើពីសប្បុរសជននានាយកចែកជូនដើម្បីតបស្នងលើកទឹកចិត្ត។
តាមដឹងច្បាស់សាលាខេត្តព្រះវិហារបានពាំនាំអំណោយស្បៀងអាហារភេសជ្ជះនិងបន្លែផ្លែឈើមួយចំនួនយកទៅធ្វើពិធីចែកជូនកងកំលាំងដែលឈរជើងយ៉ាងរឹងមាំនៅតំបន់ព្រំដែនប្រាសាទព្រះវិហាររួចរាល់ហើយកាលពីពេលថ្មីៗនេះ។
រៀងរាល់បុណ្យចូលឆ្នាំខ្មែរកងទ័ពនិងកំលាំងនគរបាលវរះការពារព្រំដែនគោកកម្រនឹងបានធ្វើដំណើរទៅលេងស្រុកកំណើតដើម្បីជួបជុំឪពុកម្តាយបងប្អូនដូចបងប្អូនប្រជាពលរដ្ឋនៅទូទាំងប្រទេសនោះទេព្រោះពួកគាត់ជាប់កាតព្វកិច្ចការពារបូរណភាពទឹកដីនៅតំបន់ព្រំដែនប្រាសាទព្រះវិហារដើម្បីសុខសន្តិភាព។
សេចក្តីរាយការណ៍ពីតំបន់ព្រំដែនប្រាសាទព្រះវិហារបានអោយដឹងថាថ្មីៗនេះសប្បុរសជនមកពីស្ថាប័នរដ្ឋបានពាំនាំយកអំណោយស្បៀងអាហារអង្ករ,មី,ទឹកក្រូច,ស្រាបៀរ,នំអន្សម,បន្លែនិងផ្លែឈើមួយចំនួនធំទៅប្រគល់ជូនកងទ័ពនិងកំលាំងនគរបាលព្រំដែនគោកនៅចំណុចបន្ទាយ៩៥។អំណោយទាំងនោះកងកំលាំងអាចបរិភោគបំប៉នបានយ៉ាងបបូរច្រើនថ្ងៃចាប់ពីដើមខែមេសា២០១៦រហូតដល់ចប់ពិធីបុណ្យចូលឆ្នាំប្រពៃណីយខ្មែរនាពេលដ៍ខ្លីខាងមុខនេះ។
អ្នកសារព័ត៌មានកម្ពុជាថ្មីប្រចាំខេត្តព្រះវិហារព្រមទាំងគ្រប់ថ្នាក់ដឹកនាំកាសែតកម្ពុជាថ្មីសូមជូនពរដល់បងប្អូនវរកងទ័ពនិងកំលាំងនគរបាលវរះការពារព្រំដែនគោកដែលកំពុងឈរជើងនៅតំបន់ព្រំដែនប្រាសាទព្រះវិហារទាំងអស់សូមមានសុខភាពល្អកំលាំងកាយមាំមួននិងជោគជ័យគ្រប់ភារកិច្ចដែលប្រមុខរាជរដ្ឋាភិបាលប្រគល់ជូននាឱកាសបុណ្យចូលឆ្នាំថ្មីប្រពៃណីយខ្មែរខាងមុខនេះ៕
