ខេត្តរតនគិរី៖ កម្លាំងកងរាជអាវុធហត្ថ ស្រុកអូរយ៉ាដាវ ឃាត់ខ្លួនបុរសម្នាក់បន្ទាប់ពីកាន់គ្រាប់បែកកាលពីវេលាម៉ោង៤នឹង២៩នាទីល្ងាចថ្ងៃទី០១ខែមេសាឆ្នាំ២០១៦ ឃាត់ខ្លួនជនសង្ស័យម្នាក់ ករណីលាក់ទុកគ្រឿងផ្ទុះខុសច្បាប់នៅចំណុចភូមិ សោមត្រក់ចាស់ ឃុំសោមធំ ស្រុកអូរយ៉ាដាវ ខេត្តរតនគិរី។លោក វរសេនីយ៍ត្រី សុខ មីន មេបញ្ជការកងរាជអាវុធហត្ថស្រុកអូរយ៉ាដាវ បានប្រាប់ឲ្យដឹងថា ករណីឃាត់ខ្លួនបុរសនេះខណៈ ដែលកម្លាំងអាវុធហត្ថ ប្រទះឃើញជនសង្ស័យមាន គ្រាប់បែកដៃ១គ្រាប់ដាក់តាមខ្លួនកំពុងដើររកកន្លែងផឹកស៊ី។
លោកបានបន្តទៀតថា ជនសង្ស័យ មានឈ្មោះ រម៉ាម ដួល អាយុ៤០ឆ្នាំ ជនជាតិចារ៉ាយ មានទីលំនៅ កន្លែងកើតហេតុខាងលើ។ នៅព្រឹកថ្ងៃទី០២ ខែមេសា ឆ្នាំ២០១៦ នេះកម្លាំងកងរាជអាវុធហត្ថ ស្រុកអូរយ៉ាដាវបាន បញ្ជូនជនសង្ស័យ ខាងលើនិងវត្ថុតាងទៅ កាន់ទីបញ្ជាការកងរាជអាវុធហត្ថ ខេត្តរតនគិរី ដើម្បីចាត់ការ បន្តទៅតាមនិតិវិធីនៃច្បាប់៕ ដោយ យក្ស ឡោម
