ភ្នំពេញ ៖ រនាំងដែកពុះចែកទ្រូងផ្លូវចំនួន១០ផ្ទាំង បានបាក់រ៉ាយប៉ាយពេញផ្លូវ ដោយសារតែបុរសម្នាក់ទំនងជាស្រវឹងស្រា បើករថយន្តហាយឡែនឌ័ររេចង្កូតបុករះពេញទំហឹង កាលពីវេលាម៉ោង១១នឹង៣០ នាទីយប់ថ្ងៃទី២ ខែមេសា ឆ្នាំ២០១៦ នៅចំណុចមុខអាកាសយាន្តដ្ឋានអន្តរជាតិភ្នំពេញ តាមបណ្តោយផ្លូវសហព័ន្ឋរ៉ុស្សី ស្ថិតក្នុងសង្កាត់កាកាប ខណ្ឌពោធិ៍សែនជ័យ ។ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្ត ហាយឡែនឌ័រ ពណ៍ស្ករ ពាក់ស្លាកលេខ ភ្នំពេញ 2AA-6326 បើកបរដោយបុរសម្នាក់ទំនងជាស្រវឹងស្រា តាមបណ្តោយផ្លូវសហព័ន្ឋរ៉ុស្សី ទិសដៅពីត្បូងទៅជើង ពេលមកដល់ចំណុចកើតេហតុ បានរេចង្កូតបុរះរនាំងដែកពុះចែកទ្រូងផ្លូវបាក់អស់១០ផ្ទាំង ចំណែករថយន្តរងការខូចខាតផ្នែកខាងមុខយ៉ាងដំណំ ។ បន្ទាប់ពីបង្កហេតុអ្នកបើករថយន្តបង្កបានគេចខ្លួនបាត់ស្រមោល ដោយបន្សល់ទុកតែរថយន្តនៅនឹងកន្លែងកើតហេតុ ហើយហេតុការណ៍នេះក៏មិនបង្កឱ្យនណារម្នាក់រងរបួសនោះទេ ។ ក្រោយមកសមត្ថកិច្ចជំនាញបានចុះមកធ្វើការវាស់វែង យករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕ជីម ភារ៉ា
