ខេត្តកំពង់ឆ្នាំង៖ «មន្ត្រីរាជការបាត់បង់សមត្ថភាពពលកម្ម និវត្តជន កុមារកំព្រាក្នុងខេត្ត ត្រូវបានរាជរដ្ឋាភិបាលកំពុងយកចិត្តទុកដាក់ជាប្រចាំ មិនដែលបោះបង់ចោលម្តងណាឡើយ»ឯកឧត្តម ឈួរ ច័ន្ទ ឌឿន អភិបាលខេត្តកំពង់ឆ្នាំង បានមានប្រសាសន៍បែបនេះនៅក្នុងពិធីសំណេះ សំណាល និងចែកអំណោយជូននិវត្តជន ជនបាត់បង់សម្បទាវិជ្ញាជីវៈ ជាអតីតមន្ត្រីរាជការស៊ីវិល ជាង៦០០នាក់ មកពីតាមសង្កាត់ទាំង៤នៅក្នុងក្រុងកំពង់ឆ្នាំង នៅព្រឹកថ្ងៃទី០១ ខែមេសា ឆ្នាំ២០១៦ក្នុងសាលាខេត្តកំពង់ឆ្នាំង។
ឯកឧត្តមបានបន្តថា៖ រាជរដ្ឋាភិបាលកម្ពុជាសព្វថ្ងៃដែលមានសម្តេចតេជោ ហ៊ុន សែន ជាប្រមុខ តែងតែខិតខំយកចិត្តទុកដាក់សម្របសម្រួលជាបន្តបន្ទាប់ចំពោះប្រាក់បៀរវត្សប្រចាំខែរបស់មន្ត្រីរាជការស៊ីវិល យោធា នគរបាល និងប្រាក់របបគោលនយោបាយរបស់អតីតយុទ្ធជន និងអតីតមន្ត្រីរាជការស៊ីវិលស្របតាមស្ថានភាពរីកចំរើននៃសេដ្ឋកិច្ចជាតិ។ ចាប់ពីឆ្នាំ២០០២មក រាជ រដ្ឋាភិបាលកម្ពុជាបានសម្រេចតំឡើងតម្លៃឯកតាសន្ទស្សន៍បៀវត្សមូលដ្ឋានជាបន្តបន្ទាប់ សម្រាប់មន្ត្រីរាជការស៊ីវិល យោធា នគរបាល និវត្តជន និងជនបាត់បង់សម្បទាគ្រប់ៗគ្នាផងដែរ។
ជាក់ស្តែងនៅថ្ងៃនេះក្មួយៗ បងប្អូនពូមីង ជាកុមារកំព្រា និវត្តជន ជនបាត់បង់សម្បទាវិជ្ជាជីវៈជាអតីតមន្ត្រីរាជការស៊ីវិលជាង៦០០នាក់ ត្រូវបានទទួលអំណោយជាអង្ករ និងថវិកា ដែលសកម្មភាពនេះបានបញ្ជាក់ពីការយកចិត្តទុកដាក់ និងទទួលខុសត្រូវខ្ពស់របស់រាជរដ្ឋាភិបាលចំពោះបងប្អូន។ ក្នុងឱកាសនោះដែរ ឯកឧត្តម ឈួរ ច័ន្ទឌឿន បានពាំនាំនូវការផ្តាំផ្ញើសួរសុខពីសំណាក់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដល់កុមាកំព្រានៅក្នុងមណ្ឌលកុមារកំព្រាខេត្តអោយខិតខំយកចិត្តទុកដាក់រៀនសូត្រ ដើម្បីក្លាយជាពលរដ្ឋល្អ និងជាធនធានមនុស្សដែលសង្គមត្រូវការ។ ដោយឡែកបងប្អូនពូមីងជានិវត្តជន និងជនបាត់បង់សម្បទាវិជ្ជាជីវៈវិញ ត្រូវខិតខំថែរក្សាសុខភាពអោយបានល្អ ហើយត្រូវដាស់តឿនកូនៗអោយខំរៀនសូត្រយកចំណេះវិជ្ជា ត្រូវជៀសអោយឆ្ងាយពីគ្រឿងញៀន ល្បែងស៊ីសង អំពើហឹង្សា បទល្មើស និងត្រូវចូលរួមគោរពច្បាប់ចរាចរណ៍អោយបានខ្ជាប់ខ្ជួន។
លោក ថោង ចំរើន ប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តកំពង់ឆ្នាំង បានបញ្ជាក់អោយដឹងថា៖ មន្ទីរស.អ.យ គឺជាសេនាធិការអោយក្រសួងសង្គមកិច្ច អតីតយុទ្ធជន និងយុវនិតិសម្បទា និងសាលាខេត្តកំពង់ឆ្នាំងក្នុងការគ្រប់គ្រង ដឹកនាំ និងអនុវត្តលើវិស័យធំៗចំនួន៣ គឺវិស័យសង្គមកិច្ច វិស័យអតីតយុទ្ធជន និងវិស័យយុវនិតិសម្បទា។ វិស័យទាំង៣នេះមានតួនាទីសំខាន់ណាស់នៃគោលនយោបាយរបស់រាជរដ្ឋាភិបាល សំដៅបង្កើតនូវសេវាសាធារណៈ ដើម្បីជួយដល់ជនរងគ្រោះ និងងាយរងគ្រោះក្នុងសង្គម និងបង្កើតនូវប្រព័ន្ធសុវត្ថិភាពសង្គមរបស់មន្ត្រីរាជការស៊ីវិល អតីតយុទ្ធជន និងប្រជាពលរដ្ឋទូទៅនៅក្នុងខេត្ត៕
