សៀមរាប: មន្ត្រីនគរបាលជាតិចំនួន៤៦នាក់ ត្រូវបានប្រកាសតែងតាំងមុខតំណែង និងបំពាក់ឋានន្តរសក្តិ នៅក្នុងឱកាសបិទសន្និបាតបូកលទ្ធផលប្រតិបត្តិការថែរក្សាសន្តិសុខ របស់ស្នងការដ្ឋាននគរបាលខេត្តឧត្តរមានជ័យ ! នាយឧត្តមសេនីយ៍ ខេង សុមេធ ផ្ញើសារឲ្យមន្ត្រីនគរបាលជាតិ បន្តការពង្រឹងវិន័យ អភិវឌ្ឍន៍សមត្ថភាពជំនាញ និង ស្មោះត្រង់បំរើប្រជាពលរដ្ឋ ។នាយឧត្តមសេនីយ៍ ខេង សុមេធ អគ្គស្នងការរង និងជាមេបញ្ជាការនគរបាលជាតិប្រចាំទិសភូមិភាគទី៤ និងទី៥ បានផ្តាំផ្ញើថា ៖ មន្ត្រីនគរបាលជាតិទាំងអស់ ដែលកំពុងស្ថិតក្នុងតួនាទី បើទោះជាស្ថិតក្នុងឋានៈមុខតំណែងខ្ពស់ទាបយ៉ាងណាក៏ដោយ គឺបាននឹងកំពុងទទួលប្រាក់បៀវត្សរ៍ពីរាជរដ្ឋាភិបាល ហើយប្រាក់បៀវត្សទាំងនោះ គឺបានមកពីការបង់ពន្ធរបស់ប្រជាពលរដ្ឋ ។ ដូច្នេះ គឺមិនត្រឹមតែមន្ត្រីនគរបាលជាតិនោះទេ ដែលត្រូវបំពេញភារកិច្ចបំរើរាស្ត្រ បំរើជាតិ គឺមន្ត្រី-បុគ្គលិករាជការទាំងអស់ត្រូវតែមានកាតព្វកិច្ចបំរើរាស្ត្រដោយស្មោះត្រង់ ។
លោក បានបន្តថា ៖ ដើម្បីអនុវត្តន៍បានយ៉ាងដូច្នេះប្រកបដោយគុណភាពកាន់តែល្អប្រសើរឡើង ដោយឡែកក្នុងជួរកងកម្លាំងនគរបាលជាតិ ត្រូវមានវិន័យ ក្រមសីលធម៌វិជ្ជាជីវៈ ហើយខិតខំបំរើប្រជាពលរដ្ឋទាំងអស់គ្នា ។ ជាមួយគ្នានេះដែរ ដើម្បីប្រសិទ្ធិភាពការងារនោះ ! ការលើកសរសើរ តម្លើងឋានន្តរសក្តិ ដោយផ្អែកលើគុណសម្បត្តិនិងអតីតភាពការងារ គឺជាប្រការចាំបាច់ដែលមិនអាចមើលរំលងបាននោះឡើយ ។ លោក បានសង្កត់ធ្ងន់ថា ៖ នៅតាមបណ្តាខេត្ត លោកស្នងការគឺជាសេនាធិការរបស់អគ្គស្នងការដ្ឋាននគរបាលជាតិ ត្រូវមើលឲ្យបានឆ្ងាយ នឹងត្រូវផ្តល់ភាពយុត្តិធម៌សម្រាប់មន្ត្រីនគរបាលជាតិដែលមានអតីតភាពការងារ និងមានគុណសម្បត្តិការងារល្អប្រសើរ យើងមិនគប្បីទេ ដែលទុកឲ្យមន្ត្រីល្អៗ មានអារម្មណ៍ថា គេមិនត្រូវការគុណភាពការងាររបស់ខ្លួននោះ ។ លោក បញ្ជាក់ថា ៖ ការកសាងធនធានមនុស្ស វាមិនមែនជាកិច្ចការសាមញ្ញពេកទេ នោះឡើយ ។
បើទោះជាមានការក្រើនរំលឹកយ៉ាងដូច្នេះក្តី នាយឧត្តមសេនីយ៍ ខេង សុមេធ បានថ្លែងនូវការកោតសរសើរ ជូនចំពោះលោកស្នងការនគរបាលនៃបណ្តាខេត្តទូទាំងភូមិភាគទី៤ និងទី៥ ដែលក្នុងរយៈពេល២ឆ្នាំកន្លងមកនេះ ( ២០១៤-២០១៥ )បានបំពេញតួនាទី អនុវត្តភារកិច្ចបានល្អក្នុងការស្រាវជ្រាវរកឃើញមន្ត្រីនគរបាលជាតិដែលមានគុណភាពក្នុងអតីតភាពការងារ ប្រមាណជាង១ម៉ឺននាក់ នឹងបានបំពាក់ឋានន្តរសក្តិ ស្របតាមគោលការណ៍របស់ក្រសួងមហាផ្ទៃ និងរាជរដ្ឋាភិបាលកម្ពុជា ៕ដោយគឿនវេត
