ខេត្តសៀមរាប នៅរសៀលថ្ងៃទី០៣ខែ មេសា ឆ្នាំ២០១៦ចុងសប្តាហ៍នេះ ប្រតិភូពាណិជ្ជកម្មនៃខេត្តកាណាហ្កាវ៉ា ប្រទេស ជប៉ុនដឹកនាំដោយលោកហូរីអេ ណូរីយូគីតំណាងរាស្ត្រខេត្តកាណាហ្កាវ៉ានិង សហការី បានអញ្ជើញចូលជួបសម្តែងការគួសមពិភាក្សាជាមួយលោកប៊ុន ថាប្ញទ្ធិអភិបាលរងនៃគណៈអភិបាលខេត្តរួមនឹងអស់លោកជានាយក រដ្ឋបាលខេត្ត ប្រធានមន្ទីរ អង្គភាពផងដែរ នៅសាលប្រជុំលេខ៣ នៃរដ្ឋបាលសាលាខេត្តសៀមរាប។
សូមបញ្ជាក់ផងដែរថាខេត្តកាណាហ្កាវ៉ាប្រទេសជប៉ុន ត្រូវបានចងសម្ព័ន្ធមេត្រីភាពជាមួយខេត្តសៀមរាប ដោយបានធ្វើការចុះអនុស្សរណៈយោគយល់ក្នុងកិច្ចសហប្រតិបត្តិការនឹងគ្នា កាលពីខែ ធ្នូ ឆ្នាំ២០១៥ ។
មានប្រសាសន៍នោះដែរលោកហូរីអេ ណូរីយូគីក៏បានធ្វើការបញ្ជាក់ពីគោលបំណងទស្សនកិច្ចរបស់ប្រតិភូពាណិជ្ជកម្មនៃខេត្តកាណាហ្កាវ៉ា ក្នុងកិច្ចទំនាក់ទំនងសហប្រតិបត្តិការរវាងខេត្តទាំងពីរ។ ក្នុងនោះឯកឧត្តមក៏មាន ចំណាប់អារម្មណ៍ ទៅ បញ្ហាថាមពល និងបរិស្ថាន ដោយលោក តែងតែព្យាយាមផ្តល់នូវយោបល់ចូលរួមនូវរាល់សកម្មភាពដើម្បីស្វែង រកដំណោះស្រាយល្អៗ សម្រាប់ការថែរក្សាបរិស្ថាននិង ថាមពលដែលខេត្តកាណាហ្កាវ៉ា សហគ្រាសរោងចក្រ រួម សហការណ៍និងក្រុមជំនាញ ដែលកំពុងប្រឹងប្រែងរួមគ្នាក្នុងគោលដៅដើម្បីកាត់បន្ថយ ឧស្ម័នផ្ទះកញ្ចក់ក្នុងខេត្ត។ ឯកឧត្តមបានបន្តទៀតថា គោលបំណងរបស់ប្រតិភូមកកាន់ខេត្តសម្ព័ន្ធមេត្រីក្នុងការ ចែករំលែកនូវចំណេះដឹង និង បច្ចេកវិទ្យា ដល់មន្ត្រីខេត្តសៀមរាប ។ លោកហូរីអេ ណូរីយូគីក៏បានគូសបញ្ជាក់ ផងដែរថា ខេត្តកាណាហ្កាវ៉ាបានកំពុងតែអនុវត្តយ៉ាងសកម្ម នូវបច្ចេកវិទ្យាបម្លែងសំណល់បំពុលបរិស្ថានផ្សេងៗ ឲ្យ ក្លាយទៅជាថាមពលសម្រាប់តម្រូវការជួយកាត់បន្ថយបន្ទុកបំពុលបរិស្ថាន ។ សូមបញ្ជាក់ផងដែរថា លោកហូរីអេ ណូរីយូគីក៏ជាសកម្មជនជំនាញ ផ្នែកតស៊ូមតិ និងមានចំណេះដឹងចំណាប់អារម្មណ៍យ៉ាងមុះមុត ដើម្បីរកដំណោះ ស្រាយល្អៗ សម្រាប់ការកាត់បន្ថយឧស្ម័នផ្ទះកញ្ចក់ (ហ្កាសកាបូនិក) សម្រាប់បរិស្ថានល្អ និង ទីក្រុងល្អ ។ ឯកឧត្តមក៏បានលើកផងដែរថា ខេត្តសៀមរាបជាប្រភពប្រមូលផ្តុំភ្ញៀវទេសចរណ៍ដោយពីមួយឆ្នាំទៅមួយឆ្នាំកំណើន ភ្ញៀវ មានការកើនឡើង ហើយការប្រឈមនឹងបញ្ហាបរិស្ថានក៏កាន់តែមានចំណោទចោតឡើងផងដែរ។លោកហូរីអេ ណូរីយូគីក៏បានលើកនូវបទ ពិសោធន៍កន្លងមក ដែលឯកឧត្តមបានជួបប្រទះនូវចំណុចវិជ្ជមាននិង អវិជ្ជមាន ។ ក្នុងនោះក្រុមប្រតិភូក៏មានចំណាប់អារម្មណ៍ផ្តោតយ៉ាងសំខាន់ផងដែរ ទៅលើបញ្ហាប្រើប្រាស់ទឹកក្រោមដីក្នុងការចាប់ដៃគូរលើការងារបរិស្ថាននិងថាមពលផងដែរ ។ដោយថាមពលមួយចំនួនក៏ត្រូវបានទាញយកពីកាកសំណល់និងបរិស្ថានធម្មជាតិ ដោយមិនធ្វើឲ្យប៉ះពាល់បរិស្ថានធម្មជាតិឡើយ។
មានប្រសាសន៍នោះដែរលោកប៊ុន ថាប្ញទ្ធិក៏បានលើកផងដែរ ពីការព្រួយបារម្ភចំពោះមុខនៅពេល កំណើនភ្ញៀវទេសចរណ៍កើនខ្ពស់ និងប្រឈមទៅនឹងបញ្ហាបរិស្ថាននៅខេត្តសៀមរាប។ ឯកឧត្តមក៏បានបន្តទៀត ថា ក្នុងរយៈពេលកន្លងមកប្រជាជនរាជរដ្ឋាភិបាលជប៉ុន បានផ្តល់ដល់ខេត្តសៀមរាបនូវស្ថានីយ៍ចម្រោះទឹកស្អុយ ស្ថានីយ៍ទឹកស្អាត និងផ្លូវថ្នល់ អគ្គិសនី នៅឆ្នាំ២០១៧រាជរដ្ឋាភិបាលជប៉ុននិងធ្វើស្ថានីយ៍ទឹកស្អាតដែល ផលិតទឹក បាន ក្នុងមួយថ្ងៃ ៦ម៉ឺនម៉ែត្រគូប ដែលនឹងសាងសង់រួចរាល់នៅដំណាច់ឆ្នាំ២០១៨។ ក្នុងនោះដែរ ឯកឧត្តមក៏បាន បញ្ជាក់ ជូនដល់ប្រតិភូផងដែរថា ចំពោះបញ្ហាទឹកក្រោមដី អណ្តូងមួយចំនួនដែលជាជំនួយប្រទេសជប៉ុនសម្រាប់ ធ្វើ ការបូមផលិតទឹកស្អាត សម្រាប់ផ្គត់ផ្គង់ក្រុងសៀមរាប ត្រូវបានគោករីង។បញ្ហាទាំងនេះក៏បង្កឡើងពីការប្រែប្រួលអាកាស ធាតុ ដែលធ្វើឲ្យប្រភពទឹកក្រោមដី មានការបាត់បង់ ដែលជាបញ្ហាព្រួយបារម្ភរបស់ខេត្តសម្រាប់ការផ្គត់ផ្គង់ បម្រើជូន ប្រជាពលរដ្ឋ និង សណ្ឋាគារជាដើម ។ ក្នុងនោះដែរលោកប៊ុន ថាប្ញទ្ធិក៏បានលើកឡើងថារយៈពេល កន្លងមក ខេត្តទាំងពីរ ក៏បានធ្វើការចុះហត្ថលេខាលើកិច្ចព្រមព្រៀងសហប្រតិបត្តិការទំនាក៉ទំនងនឹងគ្នា ដោយផ្តោត យ៉ាង សំខាន់លើការងារបរិស្ថាននិងថាមពល ព្រមទាំងបានបើកអង្គសិក្ខាសាលាផ្សព្វផ្សាយពីការប្រើប្រាស់ម៉ូតូអគ្គិសនី និងប្រើប្រាស់កញ្ចក់សូឡាទៀតផង។ក្នុងនោះលោកក៏មានសង្ឃឹមផងដែរថាតាមរយៈក្នុងកិច្ចសហ-ប្រតិបត្តិការរវាងខេត្តសៀមរាបនិងខេត្តកាណាហ្កាវ៉ានឹង ធ្វើឲ្យការកាត់បន្ថយពីផលប៉ះពាល់បរិស្ថានបានឆាប់រហ័ស។ ម្យ៉ាងទៀតកិច្ចសហប្រតិបត្តិការលើការងារបរិស្ថាននេះគឺមានសារៈសំខាន់បំផុតសម្រាប់ប្រទេសកម្ពុជា ពិសេសខេត្តសៀមរាបដែលជាខេត្តគោលដៅនៃភ្ញៀវទេសចរលើពិភពលោកចូលមកទស្សនាកម្សាន្ត។ ការផ្លាស់ប្តូរចែករំលែកបទពិសោធន៍អំពីបញ្ហាបរិស្ថាននាពេលនេះស្របពេលដែលខេត្តសៀមរាប រៀបចំព្រឹត្តិការណ៍អង្គរសង្គ្រាន្តដើម្បីឲ្យមន្ត្រីយើងទទួលបាននូវបទពិសោធន៍និងចំណេះដឹង សម្រាប់យកទៅប្រើប្រាស់នៅពេលថ្ងៃខាងមុខនេះផងដែរ។ក្នុងនោះលោកប៊ុន ថាប្ញទ្ធិក៏បានសំណូមពរដល់ប្រតិភូសូមជួយធ្វើការផ្សព្វផ្សាយជូនដល់ អ្នកវិនិយោគប្រទេសជប៉ុនសម្លឹងឆ្ពោះមកខេត្តប្រវត្តិសាស្ត្រសៀមរាបដើម្បីចូលរួមក្នុងកិច្ចអភិវឌ្ឍន៍ខេត្ត និងបង្កើននូវការងារជូនដល់ប្រជាជនកម្ពុជា សំខាន់យុវជនកម្ពុជា៕
