ភ្នំពេញ ៖បុរសជនជាតិកូរេម្នាក់ ទំនងជាស្រវឹងស្រាបានបើករថយន្តឡិចសុីសRX300
ក្នុងល្បឿនលឿន ដល់ផ្លូវបែកជាបួនចង្កូតបទមិនទាន់ ជ្រុលទៅបុកក្បាលនាគពុះចែកទ្រូងផ្លូវពេញទំហឹង បណ្ដាលឲ្យរងការខូចខាតចំនួន២កង់ ហើយអ្នកបើកបររងរបួសធ្ងន់។ ហេតុការណ៍នេះបានកើតឡើងកាលពីវេលាម៉ោង១១នឹង១០នាទីយប់ថ្ងៃទី៥ ខែមេសា ឆ្នាំ២០១៦ នៅចំណុចស្តុសន្ឋរមុខ តាមបណ្តោយផ្លូវកម្ពុជាក្រោម កែងនឹងផ្លូវុម៉ៅសេទុង ស្ថិតក្នុងសង្កាត់ទឹកល្អក់១ ខណ្ឌទួលគោក។
បើតាមប្រភពពត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តឡិចសុីសRX៣០០ ពណ៍ស ពាក់ស្លាកលេខ ភ្នំពេញ 2V-6920 បើកបរដោយបុរសម្នាក់ និងរួមដំណើរដោយនារីម្នាក់ទៀតតាមបណ្តោយផ្លូវកម្ពុជាក្រោមពីលិចទៅកើតក្នុងល្បឿនយ៉ាងលឿន ពេលមកដល់ចំណុចស្តុបសន្ឋរមុខដែលជាកន្លែងកើតហេតុ រថយន្តបានបត់ស្តាំដោយមិនបង្អង់ល្បឿនបានបុកក្បាលនាគពុះចែកទ្រូងផ្លូវពេញទំហឹងខូចខាត២កង់ បណ្តាលអោយអ្នកបើករថយន្តជាបុរសរបួសធ្ងន់ និងនារីរួមដំណើរជាមួយរបួសស្រាល ចំណេករថយន្តរងការខូចខាតយ៉ាងដំណំ។ សមត្ថកិច្ចបានអោយដឹងថា អ្នកបើករថយន្តដែលរងរបួសទាំង២នាក់ ត្រូវបានរថយន្តសាមុយដឹកយកទៅព្យាបាលនៅមន្ទីរពេទ្យភ្លាមៗផងដែរ។
ក្រោយពេលកើតហេតុ រថយន្តបង្កត្រូវបានសមត្ថកិច្ចជំនាញធ្វើការវាស់វែងស្ទូចយកទៅរក្សាទុកនៅការិយាល័យចរាចរណ័ជើងគោក រង់ចាំចាត់ការនាពេលក្រោយ។ដោយ៖ជីម ភារ៉ា
