លោកជំទាវ ម៉ែន សំអន ថ្លែងក្នុងពិធីផ្ទេរនិងចូលកាន់តំណែងរដ្ឋមន្ត្រីក្រសួងធម្មការ និងសាសនាថ្ងៃទី៦ខែមេសាឆ្នាំ២០១៦សូមក្រាបថ្វាយបង្គំសម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជ គណៈមហានិកាយ នៃព្រះរាជាណាចក្រ កម្ពុជា ជាទីគោរពសក្ការៈ!សូមថ្វាយបង្គំ សម្តេចព្រះអភិសិរីសុគន្ធា មហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ គណៈធម្មយុត្តិកនិកាយ នៃព្រះរាជាណាចក្រកម្ពុជា ជាទីគោរពសក្ការៈ!សូមថ្វាយបង្គំសម្តេចព្រះមហាសុមេធាធិបតី នន្ទ ង៉ែត សម្តេច ព្រះសង្ឃនាយក នៃព្រះរាជាណាចក្រកម្ពុជា ជាទីគោរពសក្ការៈ!
សូមថ្វាយបង្គំសម្តេចព្រះសង្ឃនាយករង សម្តេច ព្រះមហាថេរ ព្រះរាជាគណៈ ព្រះមេគណ ព្រះអនុគណ ព្រះថេរានុត្ថេរៈ គ្រប់ ព្រះអង្គ!ឯកឧត្តមទេសរដ្ឋមន្ត្រី មិន ឃិន
ឯកឧត្តមហ៊ឹម ឆែម ទេសរដ្ឋមន្ដ្រី រដ្ឋមន្ត្រីក្រសួងធម្មការ និងសាសនាឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការលោក លោកស្រី ថ្នាក់ដឹកនាំ និងមន្ត្រីរាជការនៃ ក្រសួងធម្មការ និងសាសនាតាងនាមសម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រី នៃព្រះរាជាណាចក្រកម្ពុជា រាជរដ្ឋាភិបាល និងរូបខ្ញុំផ្ទាល់ ខ្ញុំមានសេចក្តីរីករាយដោយបានចូលរួមជាមួយឯកឧត្តម លោកជំទាវ លោក លោកស្រី និងមន្ត្រីរាជការទាំងអស់ក្នុងពិធីផ្ទេរ-ប្រគល់តំណែងរដ្ឋមន្ត្រីក្រសួងធម្មការ និងសាសនា នាពេលនេះ។ការផ្ទេរតំណែង ឬការរុះរើ 
កែសម្រួលគណៈរដ្ឋមន្ត្រីនេះ គឺធ្វើឡើងចំពេលដែលរាជរដ្ឋាភិបាលកម្ពុជា ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន បានដំណើរការពាក់កណ្តាលអាណត្តិ ក្រោយពីការបោះឆ្នោត ជ្រើសតាំងរដ្ឋសភា នីតិកាលទី៥នេះ ដើម្បីបន្តការងារឆ្ពោះទៅអណត្តិក្រោយៗទៀត។ការផ្ទេរតំណែងនេះ គឺជាកិច្ចការធម្មតារបស់រាជរដ្ឋាភិបាល ដើម្បីពង្រឹងប្រសិទ្ធភាពការងារក្នុងកិច្ចការកំណែទំរង់រដ្ឋបាល និងការអនុវត្តយុទ្ធសាស្ត្រចតុកោណដំណាក់កាលពី៣ របស់ខ្លួន។ឯកឧត្តមលោកជំទាវ លោក លោកស្រីជាទីមេត្រីវិស័យធម្មការ និងសាសនា ពិតជាមានសារៈសំខាន់ណាស់ ក្នុងការអភិវឌ្ឍន៍សង្គមកម្ពុជា ព្រោះប្រជាជនកម្ពុជាទាំងមូល មាន ជំនឿសាសនាតាមការនិយមប្រតិបត្តិ និងតាមប្រពៃណីរបស់ខ្លួន ដែលជាផ្នែកមួយនៃអត្តសញ្ញាណរបស់ជាតិយើង។
មាត្រា៤៣ នៃរដ្ឋធម្មនុញ្ញ នៃព្រះរាជាណាចក្រកម្ពុជា របស់យើង បានបញ្ជាក់យ៉ាងច្បាស់ថា ប្រជាពលរដ្ឋទាំងពីរភេទ មាន សិទ្ធពេញទីខាងជំនឿ។ សេរីភាពខាងជំនឿ និងការប្រតិបត្តិ ខាងផ្លូវ សាសនាត្រូវបានរដ្ឋធានាក្នុងលក្ខខណ្ឌ ដែលមិនប៉ះពាល់ដល់ជំនឿ ឬសាសនាដទៃទៀត និងដល់សណ្តាប់ធ្នាប់ និង សន្តិសុខសាធារណៈ។ ដោយហេតុនេះ ចាប់ពីថ្ងៃ៧មករា ឆ្នាំ១៩៧៩ មកទល់បច្ចុប្បន្នប្រជាពលរដ្ឋកម្ពុជាយើងទាំងអស់គ្នាមានសិទ្ធិនិងសេរីភាពគ្រប់បែបយ៉ាងហើយសេរីភាពនៃជំនឿសាសនាក៏បានកកើតឡើងវិញ និងរីកចំរើនជាលំដាប់។ប្រជាពលរដ្ឋកម្ពុជាគ្រប់រូបមានឱកាស និងសិទ្ធិពេញ បរិបូរណ៍ ក្នុងការធ្វើបុណ្យតាមប្រពៃណីជំនឿសាសនារៀងៗខ្លួន ។
ដូច្នេះក្រសួងធម្មការ និងសាសនា ដែលជាសេនាធិការ របស់ រាជរដ្ឋាភិបាលពិតជាមានតួនាទីស្នូល ក្នុងការគ្រប់គ្រង សម្របសម្រួល និងអភិវឌ្ឍន៍វិស័យធម្មការ និងសាសនា ដើម្បីរួមចំណែកកសាងប្រទេសជាតិយើង។
រាជរដ្ឋាភិបាលបានខិតខំប្រឹងប្រែងក្នុងការអភិវឌ្ឍន៍វិស័យ ធម្មការនិងសាសនា ជាពិសេស ព្រះពុទ្ធសាសនា ដែលជា សាសនា របស់រដ្ឋ ដើម្បីជាប្រយោជន៍ក្នុងការរួមចំណែកពង្រឹងសាមគ្គីភាព ការលើកកម្ពស់វប្បធម៌នៃការយោគយល់គ្នាក្នុង ចំណោមពុទ្ធសាសនិក ក៏ដូចជាប្រជាជនកម្ពុជារបស់យើងទាំងអស់ នៅពេលអនាគត។ ក្រៅពីព្រះពុទ្ធសាសនា រាជរដ្ឋាភិបាលក៏បានយកចិត្តទុកដាក់ និង អនុញ្ញាតិឲ្យប្រជាពលរដ្ឋយើងគោរពសាសនាដ៏ទៃទៀតដូចជា ឥស្លាម សាសនា គ្រឹស្តសាសនា និងសាសនាដ៏ទៃទៀត និងត្រូវធានាថា សាសនាទាំងអស់នឹងមិនបង្កទំនាស់ និងគំរាមកំហែងដល់ស្ថិរភាពនិងសន្តិសុខជាតិជាដាច់ខាត។
ឆ្លៀតឱកាសនេះ ខ្ញុំសូមកោតសរសើ ដល់ឯកឧត្តមទេសរដ្ឋមន្ដ្រី មិន ឃិន ដែលបានបំពេញការងារជារដ្ឋមន្ត្រីដឹកនាំក្រសួងមួយនេះប្រកបដោយជោគជ័យ ជំនះបានឧបសគ្គនិងការប្រឈមជាច្រើន និងទទួលបាន សមិទ្ធិផលធំៗ ដូចដែលបានរៀបរាប់ក្នុងរបាយការណ៍។ ខ្ញុំក៏សូមធ្វើ ការវាយតម្លៃខ្ពស់ចំពោះថ្នាក់ដឹកនាំ និងមន្ត្រីជំនាញនិងរដ្ឋបាលទាំងអស់ នៃក្រសួង ដែលបានបំពេញការងារយ៉ាងសកម្មតាមតួនាទីរបស់ខ្លួន។
សម្តេច ឯកឧត្តមលោកជំទាវ លោក លោកស្រី
ពេលនេះ ទោះជាមានការផ្ទេរតំណែងរដ្ឋមន្ត្រីថ្មី ក៏ដោយ ក៏ក្រសួងធម្មការ និងសាសនា នឹងនៅតែបន្តដំណើរការដោយរលូន ដោយគ្មានការផ្លាស់ប្តូរចនាសម្ព័ន្ធ។ ម្យ៉ាងទៀត ក្រសួងនេះ ពិតជាមាន សំណាង ដោយបានឯកឧត្តមទេសរដ្ឋមន្ដ្រី ហ៊ឹម ឆែម រដ្ឋមន្ត្រីថ្មី ដែលបន្តតំណែង គឺជាឥស្សរជនជើងចាស់មួយរូបមានសមត្ថភាព និងបទពិសោធន៍ក្នុង ការងារដឹកនាំ និងគ្រប់គ្រង ព្រោះគាត់ធ្លាប់ធ្វើជារដ្ឋមន្ត្រី ក្រសួងវប្បធម៌ និងវិចិត្រសិល្បៈ។ ខ្ញុំសង្ឃឹមថាឯកឧត្តមពិតជាមានសមត្ថភាព ដឹកនាំក្រសួងនេះដោយការខិតខំបំពេញការងារ បន្តកិច្ចសហការ រក្សាបាននិរន្តរភាព ដើម្បីទទួលបានជោគជ័យថ្មីៗថែមទៀត ជូនរាជរដ្ឋាភិបាល និងមិនធ្វើឲ្យសម្តេចតេជោនាយករដ្ឋមន្ត្រី ខកបំណងឡើយ។ខ្ញុំពិតជាជឿជាក់ថា មន្ត្រីរាជការទាំងអស់ ក្រោមឱវាទក្រសួង នឹងនៅចងចាំ និងនឹករលឹកដល់ឯកឧត្តមទេសរដ្ឋមន្ដ្រី មិន ឃិន និងគ្រួសារ ជាពិសេសចំពោះអំពើល្អ និងសមិទ្ធផលនានាដែលឯកឧត្តមបានខិតខំកសាង ក្នុងរយៈពេលដែលឯកឧត្តមបានដឹកនាំជារដ្ឋមន្ត្រីក្រសួងនេះ។ ម្យ៉ាងទៀត ខ្ញុំក៏សង្ឈឹមថា ដើម្បីធានានិរន្តរភាពឯកឧត្តមទេសរដ្ឋមន្ដ្រី ហ៊ឹម ឆែម ប្រាកដជាខិតខំ អនុវត្តបន្តនូវការងារនិងគំរោងទាំងឡាយ ដែលមិនទាន់បានបញ្ចប់ និងទទួលបានជោគជ័យថ្មីៗថែមទៀតក្នុងការអភិវឌ្ឍន៍វិស័យធម្មការ និងសាសនា។
ដើម្បីឲ្យការរីកចំរើននេះមានចីរភាពខ្ញុំសូមស្នើដល់ ថ្នាក់ដឹកនាំថ្មី ត្រូវ៖
១.ពង្រឹងកម្លាំងសាមគ្គីគ្នាជាធ្លុងមួយ ដោយមិនប្រកាន់ខ្សែស្រឡាយអ្នកថ្មី ឬចាស់ គ្រួសារនិយម និងបន្តកិច្ចសហប្រតិបត្តិការឲ្យបានល្អជាមួយ ស្ថាប័ននានាជាពិសេស ជាមួយដៃគូអភិវឌ្ឍន៍ដើម្បីសម្រេចផែនការ និងយុទ្ធសាស្ត្រដែលរាជរដ្ឋាភិបាលបានប្រគល់ជូន។
២.ស្តាប់មតិមន្ត្រីរាជការក្រោមឱវ៉ាទ ឲ្យបានច្រើន វិភាគសភាពការណ៍រកឬសគល់នៃបញ្ហា ឲ្យបានស៊ីជម្រៅ និងធ្វើសុភវិនិច្ឆ័យយ៉ាងល្អិតល្អន់មុននឹងធ្វើសេចក្តីសម្រេចអ្វីមួយ។
៣.ប្រកាន់ឥរិយាបទសុភាពរាបសារ ទន់ភ្លន់ តែម៉ឺងម៉ាត់ ក្នុងការងារដឹកនាំ ដើម្បីធ្វើឲ្យបុគ្គលិក មន្ត្រីរាជការក្រោមឱវ៉ាទគោរពស្រឡាញ់ និងរួមគ្នាធ្វើការក្រោមបទបញ្ជារបស់ថ្នាក់ដឹកនាំប្រកបដោយប្រសិទ្ធភាព។
៤.រួមសហការជាមួយក្រសួង ស្ថាប័ន អាជ្ញាធរពាក់ព័ន្ធ បន្តដោះស្រាយ ឲ្យមានប្រសិទ្ធភាពនូវបញ្ហាប្រឈម និងបញ្ហាសេសសល់ទាំងឡាយ ក្នុងវិស័យទទួលខុសត្រូវរបស់ក្រសួងឲ្យបានល្អប្រសើរ។
ជាថ្មីម្តងទៀត តាងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងរូបខ្ញុំផ្ទាល់ ខ្ញុំសូមវាយតម្លៃខ្ពស់ចំពោះឯកឧត្តមទេសរដ្ឋមន្ដ្រី មិន ឃិន ក្នុងការបំពេញការងារប្រកបដោយប្រសិទ្ធភាព និងការទទួលខុសត្រូវ ក្នុងរយៈពេលកន្លងមក និងជូនពរដល់ឯកឧត្តមទទួលបានជោគជ័យថ្មីៗថែមទៀត ក្នុងការងារថ្មីនាពេលអនាគត។
ខ្ញុំក៏សូមសំដែងនូវការអបអរសាទរ និងប្រសិទ្ធពរបវរប្រសើរជូនចំពោះឯកឧត្តមទេសរដ្ឋមន្ដ្រី ហ៊ឹម ឆែម ដែលទើបទទួលការតែងតាំងថ្មី សូមឲ្យទទួលបានជោគជ័យក្នុងភារកិច្ចថ្មីនេះ។
ជាចុងក្រោយខ្ញុំសូមប្រសិទ្ធពរជូន ឯកឧត្តម លោកជំទាវ លោក លោកស្រី មន្ត្រីរាជការ ដែលមានវត្តមាន ក្នុងពេលនេះ សូមទទួលបានជោគជ័យក្នុងការងារនាពេលខាងមុខ និងសូមប្រកបដោយពុទ្ធពរបួនប្រការគឺអាយុវណ្ណៈសុខៈពលៈកុំបីឃ្លៀងឃ្លាតឡើយ។
