បន្ទាយមានជ័យ៖ លោក លី សារី សមាជិកអចិន្ត្រៃយ៍គណបក្សប្រជាជន កម្ពុជាខេត្តបន្ទាយមានជ័យ នឹងជាប្រធានក្រុមការងារថ្នាក់ខេត្តចុះជួយក្រុងសិរីសោភ័ណព្រមទាំងក្រុមការងារ នៅរសៀលថ្ងៃទី០៥ខែមេសាឆ្នាំ២០១៦នេះបានអញ្ជើញចុះសួរសុខទុក្ខដល់កុមារីម្នាក់ កំព្រាឪពុករស់នៅជាមួយម្តាយដែលមានជីវភាពក្រីក្រក្រោយជួសជុលផ្ទះមួយខ្នងអោយរួចរាល់។
លោក លី សារី បានអោយដឹងថាដោយមើលឃើញពីការលំបាកវេទនារបស់គ្រួសារកុមារី ថូ ចរិយា ដែលមានម្តាយជាស្ត្រីមេម៉ាយរកព្រឹកខ្វះល្ងាចជ្រកក្រោមខ្ទមប្រកស្បូវដាច់រហែក នោះលោកនិងក្រុមការងារក៏បានសម្រេច ជួយជួសជុលដោយរុះរើដំបូលស្បូវហើយប្រកមកវិញនូវស័ង្កសីដើម្បីសំរួលដល់ការរស់នៅបានសមរម្យ។មួយវិញទៀតបន្ទាប់ពីមើលឃើញថាកុមារី ថូ ចរិយា មានការខិតខំក្នុងការរៀនសូត្ររហូតទទួលបានចំណាត់លេខ១ជារៀងរាល់ខែពិសេសពិបាកដល់ការធ្វើដំណើរទៅសាលារៀនផងនោះ នៅថ្ងៃនេះលោកក៏បានផ្តល់កង់មួយគ្រឿងបន្ថែមទៀតដើម្បីសំរួលដល់ការរៀនសូត្រ។
ជាការថ្លែងអំណរគុណចំពោះក្រុមការងារកុមារី ថូ ចរិយា រៀននៅថ្នាក់ទី៦នៃសាលាបឋមសិក្សា ឈូកស្ថិតក្នុងសង្កាត់ម្កាក់ក្រុងសិរីសោភ័ណបាននិយាយទាំងក្តុកក្តួលនិងលាយឡំទឹកភ្នែកថាខ្ញុំតែងតែដើរទៅរៀនរាល់ថ្ងៃមិនដែលមានអ្វីជិះទេ ពីព្រោះតែម្តាយខ្ញុំក្រពេក តែពេលនេះខ្ញុំមានកង់ជិះនឹងគេហើយ ខ្ញុំអាចទៅរៀនបានទាន់ពេលវេលានិងអាចជួយការងារម្តាយខ្ញុំបាន។ដើម្បីតបស្នងចំពោះក្រុមការងារខ្ញុំសូមសន្យាខិតខំរៀនសូត្រនិងរក្សាចំណាត់ថ្នាក់នេះគ្រប់ខែនិងគ្រប់ថ្នាក់។
