ខេត្តព្រះវិហារ សេចក្តីរាយការណ៍ពីតំបន់ព្រំដែនប្រាសាទព្រះវិហារបានអោយដឹងថាកាលពីវេលាម៉ោង៤និង៣០នាទីរសៀលថ្ងៃទី០៤មេសា២០១៦មានមន្ត្រីកងទ័ព០២នាក់បានជិះម៉ូតូមួយគ្រឿងធ្លាក់ជ្រោះក្បែរផ្លូវទ្បើងទៅកាន់ច្រកទ្វារអានសេះស្ថិតក្នុងឃុំឈើទាលគងស្រុកជាំក្សាន្តជាប់ព្រំដែនថៃខណះពេលចុះបំពេញការងារ។
ហេតុការណ៍នេះបង្កអោយភ្ញាក់ផ្អើលដល់អាជ្ញាធរមូលដ្ឋានហើយបាននាំគ្នាចុះទៅជួយសង្គ្រោះបានទាន់ពេលវេលាផងដែរ។មន្ត្រីកងទ័ព២នាក់នោះសង្ស័យបំរើការងារក្នុងអង្គភាពវរសេនាតូចការពារព្រំដែនលេខ៤០៥ប្រចាំច្រកអានសេះចំណុះតំបន់ប្រតិបត្តិការសឹករងខេត្តព្រះវិហារ។
ប្រភពព័ត៌មានបានអោយដឹងថាហេតុការណ៍ធ្លាក់ជ្រោះនោះអាចសង្ស័យបណ្តាលមកពីរអិលកង់ម៉ូតូហើយជាន់ហ្វ្រាំងមិនជាប់ក៍រអិលធ្លាក់ចូលជ្រោះទាំងមនុស្សនិងម៉ូតូតែម្តងប៉ុន្តែសំណាងល្អមន្ត្រីកងទ័ពទាំង០២នាក់ដែលជួបហេតុការណ៍មិនគ្រោះថ្នាក់ដល់អាយុជីវិតនោះទេ។
អាជ្ញាធរមូលដ្ឋានបានអោយដឹងនៅថ្ងៃនេះថាទីតាំងជ្រោះដែលជនរងគ្រោះជាកងទ័ពធ្លាក់ចូលនោះមានជម្រៅប្រមាណ១៧ម៉ែត្របណ្តាលអោយរងរបួសធ្ងន់ត្រូវបានអាជ្ញាធរនាំគ្នាស្ទូចជនរងគ្រោះទាំង២នាក់ចេញពីជ្រោះហើយប្រញាប់ដឹកយកទៅសង្គ្រោះព្យាបាលនៅមន្ទីរពេទ្យសម្តេចតេជោ១៧៩ស្រអែមបានទាន់ពេលវេលា។រីឯអត្តសញ្ញាណជនរងគ្រោះទាំង២នាក់មិនត្រូវបានសមត្ថកិច្ចប្រាប់ឈ្មោះអោយដឹងនោះទេ៕
មង្គល
