កំពង់ធំ= ស្ត្រីម្នាក់បានស្លាប់ភ្លាមៗនៅនឹងកន្លែងសំរាកព្យាបាលក្នុងផ្ទះលោកគ្រូពេទ្យឯកជនស្ទើភ្លើងខណៈដែលស្ត្រីរងគ្រោះបានជិះកង់ទៅចាក់ថ្នាំនៅផ្ទះលោកគ្រូពេទ្យម្នាក់ឈ្មោះ ខៀវ សួរ ថៃ កាលពីថ្ងៃចុងសប្តាហ៏នេះ នៅភូមិពង្រ ឃុំពង្រ ស្រុកបារាយណ៏ ខេត្តកំពង់ធំ ជ្រកក្រោមស្លាកយីហោពេទ្យឆ្មបមធ្យមឈ្មោះខៀវសុបិន្ត ជាកូនបង្កើតធ្វើពេទ្យនៅមណ្ឌលសុខភាពឃុំ ប្រភពព័ត៍មានពីក្រុមគ្រួសារជនរងគ្រោះនៅកន្លែងកើតហេតុបានបង្ហើបឲ្យដឹងថា នៅព្រឹកថ្ងៃកើតហេតុថ្ងៃទី១ខែមេសាឆ្នាំ២០១៦ស្ត្រីរងគ្រោះឈ្មោះអ៊ុតចាន់នីន អាយុៈ៤៣ឆ្នាំរស់នៅភូមិត្រដកពង ឃុំពង្រ ស្រុកបារាយណ៏ ខេត្តកំពង់ធំ មានអាការៈមិនស្រួលខ្លួនបានជិះកង់ទៅចាក់ថ្នាំនៅផ្ទះលោកគ្រូពេទ្យឯកជនឈ្មោះ ខៀវ សួរថៃ អាយុៈ៦០ឆ្នាំរស់នៅភូមិពង្រ ឃុំពង្រ ស្រាប់តែមួយសន្ទុះក្រោយមក ស្ត្រីរងគ្រោះបានដួលប្រកាច់ស្លាប់មួយរំពិចនៅក្នុងផ្ទះពេទ្យដែលមានស្លាកយីហោ ខៀវសុបិន្ត ត្រូវជាកូនស្រីបង្កើតជាមន្ត្រីពេទ្យឆ្មបមណ្ឌលសុខភាពឃុំ ពាក់ព័ន្ធលើករណីខាងលើនេះលោកញ៉ែម ពីង ប្រធានមន្ទីរពេទ្យបង្អែកស្រុកបារាយ- សន្ទុកបានបញ្ជាក់ប្រាប់ថា គ្លីនិក ព្យាបាលអ្នកជំងឺ១កន្លែងនេះគ្មានច្បាប់អនុញ្ញាតិទេព្រោះជាពេទ្យឯកជន លួចបើកស្ងាត់ៗ គឺ ខុសច្បាប់ទាំងស្រុង! ហើយនៅថ្ងៃកើតហេតុនោះលោកក៏បានបញ្ជាឲ្យអនុប្រធានមន្ទីរពេទ្យចុះទៅពិនិត្យធ្វើកោសលវិច្ច័យហើយដែរ ក្រោយពីចាក់ថ្នាំរួច ទំនងជា ជនរងគ្រោះមានជំងឺលើសឈាម បណ្តាលឲ្យដាច់សសៃឈាមផ្នែកក្បាល! លោកបន្តថានៅក្នុងខេត្តកំពង់ធំនៅមានពេទ្យជាច្រើនទៀតដែលអត់ច្បាប់ទម្លាប់ ចំនែកលោកអធិការរងស្រុកបារាយណ៏បាននិយាយថា ភាគីខាងជនរងគ្រោះមិនបានប្តឹងទេព្រោះលោកគ្រួពេទ្យថៃ បានចេញលុយធ្វើបុណ្យឲ្យ ព្រោះថាស្ត្រីរងគ្រោះនេះត្រូវជាក្មួយ។ជាមួយគ្នានេះ លោក អ៊ិត សុធា ព្រះរាជអាជ្ញាសាលាដំបូងខេត្តកំពង់ធំបានឲ្យដឹងថា រឿងគ្រូពេទ្យដែលចាក់ថ្នាំបង្កស្លាប់មនុស្សនេះលោកកំពុងតែបើកការស៊ើបអង្កេត ហើយចាត់ការតាមផ្លូវច្បាប់៕ ប៊ុន រិទ្ធី
