មណ្ឌលគិរី៖ នៅព្រឹថ្ងៃទី០៦ខែមេសាឆ្នាំ២០១៦នេះ នៅសាលប្រជុំរដ្ឋបាលខេត្តមណ្ឌលគិរី បានកិច្ចប្រជុំ ស្តីពីការពង្រឹងវិធានការប្រយុទ្ធប្រឆាំងគ្រឿងញៀន ក្រោមវត្តមាន ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិ ប្រឆាំងគ្រឿងញៀន ឯកឧត្តម ស្វាយ សំអ៊ាង អភិបាលខេត្តមណ្ឌលគិរី ។
យោងតាមរបាយការណ៍របស់លោក យឹម លុច្ស ប្រធានលេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀនខេត្តមណ្ឌលគិរីបានឲ្យដឹងថា មុខសញ្ញាប្រើប្រាស់នូវសាធាតុញៀនខុសច្បាប់ ចាប់ពីអាយុ១៨ដល់អាយុ៤៥ឆ្នាំ ច្រើនប្រមូលផ្តុំនៅក្នុងក្រុងសែនមនោរ្យ ស្រុកកែវសីមា និងស្រុកកោះញែក ក្នុងនោះកម្លាំងការិយាល័យជំនាញ បានសហការជាមួយកម្លាំងនគរបាលនៅតាមមូលដ្ឋាន បានធ្វើការស្រាវ
ជ្រាវ និងបង្ក្រាប បានចំនួន០៩លើក គាត់ខ្លួនជនសង្ស័យចំនួន៣៤នាក់ ស្រី៧នាក់ វត្ថុតាងសារធាតុញៀនមេតំហ្វេតាមីន (ICE)ចំនួន០,៩៨ក្រាម រថយន្តចំនួន០២គ្រឿង ម៉ូតូមំនួន០៣គ្រឿង ។
ឯកឧត្តមស្វាយ សំអ៊ាង អភិបាលខេត្តមណ្ឌលគិរីបានប្រសាសន៍ថា ដោយផ្អែកលើការស្រាវជ្រាវ និងបង្ក្រាបបទល្មើសគ្រឿងញៀនកន្លងមកនេះ សកម្មភាពនៃការជួញដូរ និងចែកចាយគ្រឿងញៀន នៅក្នុងខេត្តមណ្ឌលគិរី មានកំរឹតតិចតួច ហើយពួកឈ្មួញដែលរកស៊ីជួញដូរគ្រឿងញៀន ច្រើននាំចូលមកពីភ្នំពេញ និងមួយចំនួនទៀតមកពីបណ្តាខេត្តជិតខាង ហើយប្រភេទពពួកគ្រឿងញៀនរួមមាន មេតំហ្វេតាមីនក្រាមម្សៅ(ICE) ហៅម៉ាទឹកកក ចំណែកពពួកគ្រឿងញៀនផ្សេងៗពុំឃើញមានវត្តមាននោះទេក្នុងខេត្តមណ្ឌលគិរី។ ឯកឧត្តមបានបន្តទៀតថា ដើម្បីពង្រឹងវិធានការនេះ កម្លាំងជំនាញពាក់ព័ន្ធត្រូវចុះបង្ក្រាប់ និងធ្វើការផ្សព្វផ្សាយដល់ម្ចាស់ផ្ទះសំណាក់ ភោជនីយដ្ឋាន និងប្រជាពលរដ្ឋ ព្រមទាំងអនុវត្តនូវច្បាប់ភូមិឃុំមានសុវត្ថិភាពទាំង០៩ចំនុចរបស់រាជរដ្ឋាភិបាល នៅតាមមូលដ្ឋានក្នុងក្រុងស្រុកទាំង៥ទូទាំងខេត្តមណ្ឌលគិរី។
នៅក្នុងកិច្ចប្រជុំនោះដែរ ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិ ប្រឆាំងគ្រឿងញៀន បានប្រសាសន៍ថាបើយោងតាមរបាយការណ៍របស់ គណៈកម្មាធិការត្រួតពិនិត្យគ្រឿងញៀនខេត្តមណ្ឌលគិរី បើប្រៀបធៀបទៅនឹងឆ្នាំមុនៗ ឃើញថាករណីការជួញដូរ និងប្រើប្រាស់គ្រឿងញៀនមានការថយចុះ ទាំងនេះដោយមានការខិតខំពីគណៈកម្មាធិការត្រួតពិនិត្យគ្រឿងញៀនខេត្តមណ្ឌលគិរី ដែលបានយកចិត្តទុកដាក់ខ្ពស់ ក្នុងការចុះបង្ក្រាប់ និងធ្វើការផ្សព្វផ្សាយបានទាន់ពេលវេលា ។ដោយ ប៊ូ ស្រា
