ភ្នំពេញ ៖ ជនសង្ស័យម្នាក់មានមុខរបរជាអ្នករើសអេតចាយបានបែកគំនិតកាត់សោរច្រវ៉ាក់បំណងលួចរទេះលក់ផ្លែឈើ តែត្រូវម្ចាស់តាមទាន់ដេញចាប់បាន ហើយប្រជាពលរដ្ឋវាយម្នាក់មួយដៃមួយជើង ទើបប្រគល់អោយសមត្ថកិច្ច ។ ហេតុការណ៍នេះបានកើតឡើងកាលពីចេលាម៉ោង១នឹង១០នាទីរំលងអាធ្រាតឈានចូលថ្ងៃទី៧ ខែមេសា ឆ្នាំ២០១៦ តាមបណ្តោយផ្លូវលេខ២០០២ ស្ថិតក្នុងសង្កាត់ទឹកថ្លា ខណ្ឌសែនសុខ។ជនសង្ស័យមានឈ្មោះ ហ៊ួត ចំរើន ហៅជា អាយុ៣៣ឆ្នាំ មានមុខរបរជាអ្នករើសអេតចាយ មានទីលំនៅមិនពិតប្រាកដ។
ប្រភពពត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានលឺសម្លេងដូចជាមានមនុស្សធ្វើអ្វីមួយនៅខាងក្រៅផ្ទះ ពេលនោះមានបុរសម្នាក់បានចេញក្រៅមកមើល ហើយក៏បានឃើញជនសង្ស័យម្នាក់បានកាត់ច្រវ៉ាក់សោរ និងរៀបយករទេះលក់ផ្លែឈើរបស់ខ្លួន ពេលនោះគាត់ក៏ស្រែកឆោឡោរឡើង បង្កការភ្ញាក់ផ្អើល និងដេញចាប់បាន ហើយប្រជាពលរដ្ឋនាំគ្នាវាយម្នាក់មួយដៃមួយជើង រួចទើបប្រគល់អោយសមត្ថកិច្ច។
ក្រោយមកសមត្ថកិច្ចបាននាំជនសង្ស័យទៅប៉ុស្តិ៍នគរបាលរដ្ឋបាលទឹកថ្លា ដើម្បីចាត់ការតាមនីតិវិធី។ដោយ៖ជីម ភារ៉ា
