ខេត្តកំពង់ឆ្នាំង៖ ដើម្បីអបអរសាទរស្វាគមន៍បុណ្យចូលឆ្នាំថ្មីប្រពៃណីជាតិក្នុងពេលដ៏ខ្លីខាងមុខនេះ និងសម្រួលចរាចរណ៍ពេលយប់ផងដែរនោះ លោក ឈួរ ច័ន្ទឌឿន អភិបាលខេត្តកំពង់ឆ្នាំង បានដាក់ផែនការអោយប្រធានមន្ទីររ៉ែនិងថាមពលខេត្ត សហកាជាមួយប្រធានមន្ទីរសាធារណៈការនិងដឹកជញ្ជូនខេត្ត ធ្វើការរៀប ចំដាក់បង្គោលអគ្គីសនីបំភ្លឺតាមដងផ្លូវសាធារណៈមួយចំនួននៅក្នុងក្រុងកំពង់ឆ្នាំង ជាពិសេសនៅតាមជុំវិញសួនច្បារវិមានឯករាជ្យខេត្ត ដែលជាកន្លែងអង្គុយលេងកំសាន្តរបស់ប្រជាពលរដ្ឋ។
ដោយឡែកនៅយប់ ថៃ្ងទី០៦ ខែមេសា ឆ្នាំ២០១៦ លោកអភិបាលខេត្ត បានចុះពិនិត្យមើលការដាក់បង្គោលភ្លើងបំភ្លឺនៅសួនច្បារវិមានឯករាជ្យ ដោយមានការចូលរួមពីលោក អ៊ុក រស់ ប្រធាន មន្ទីររ៉ែនិងថាមពលខេត្ត , លោកនាយករងរដ្ឋបាលសាលាខេត្ត និងមន្ត្រីមន្ទីរសាធារណៈការខេត្តផងដែរ។
លោក អ៊ុក រស់ ប្រធាន មន្ទីររ៉ែនិងថាមពលខេត្ត បានអោយដឹងថា៖ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងដោយមានការយកចិត្តទុកដាក់គិតគូរ របស់ឯកឧត្តម ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង បានធ្វើអោយទីក្រុងកំពង់ឆ្នាំង កំពុងមានសោភ័ណភាពល្អ ដោយការអភិវឌ្ឍន៍ នៅគ្រប់ទីកន្លែងទាំងផ្លូវថ្នល់ សួនច្បារ ទីផ្សារ មាត់ទន្លេ ហើយនៅពេលនេះក៏កំពុងរៀបចំដាក់បង្គោលភ្លើងបំភ្លឺក្នុងពេលរាត្រី តាមទីសាធារណៈ ដើម្បីសម្រួលចរាចរណ៍ពេលយប់ និងអបអរសាទរបុណ្យចូលឆ្នាំថ្មីខាងមុខនេះផងដែរ។ 
លោក អ៊ុក រស់ បានអោយដឹងទៀតថា៖ ក្រោយពីមានការឯកភាពពីលោកអភិបាលនៃគណៈអភិ បាលខេត្តកំពង់ឆ្នាំង នៅក្នុងពេលថ្មីៗនេះសាលាខេត្តកំពង់ឆ្នាំងបានចំណាយថវិកាអោយក្រុមហ៊ុនអគ្គីសនីក្នុងខេត្តរៀបចំបង្គោលដងគោមអគ្គីសនីបំភ្លឺ តាមផ្លូវនៅក្នុងក្រុងកំពង់ឆ្នាំងចំនួន៣ខ្សែគឺ៖ ខ្សែទី១ចេញពីមុខសាលាខេត្តទៅផ្សារក្រោម ខ្សែទី២ពីចេញមន្ទីរបរិស្ថានខេត្តត្រង់ទៅដល់ក្រោយឃ្លាំងសូរ៉ាប៉ាខេត្ត មុខវត្តអាញ្ញ ខ្សែទី៣ចេញពីចំណុចស្ថានីយប្រេងឥន្ទៈត្រពាំងគងទៅលើផ្សារដើមគរ ចុងភូមិម៉ុងបារាំង សង្កាត់ប្អេរ បត់ទៅលើផ្លូវជាតិលេខ៥ចំណុចផ្ទះសំណាក់ផ្កាយព្រឹក ក្នុងភូមិឡទឹកត្រី សង្កាត់កំពង់ឆ្នាំង និងជាពិសេសជុំវិញ សួនច្បារវិមានឯករាជ្យ សួនច្បារមុខមន្ទីរពេទ្យ សួនច្បារមុខសាលាខេត្ត សួនច្បារមាត់ទន្លេផ្សារក្រោម និងសួនច្បារឆ្នាំងមាសដំរីស។
ការដាក់បង្គោលភ្លើងនៅតាមទីសាធារណៈទាំងអស់នេះ ជាប្រយោជន៍កែប្រែសោភ័ណភាពក្នុងក្រុងកំពង់ឆ្នាំង ដើម្បីបំភ្លឺដល់ភ្ញៀវទេសចរណ៍និងបងប្អូនប្រជាពលរដ្ឋក្នុងខេត្តមកលេងកំសាន្ត និងសម្រួ
លដល់អ្នកបើកបរយានយន្តគ្រប់ប្រភេទ បញ្ចៀសបាននូវគ្រោះថ្នាក់ចរាចរណ៍ពេលយប់ និងចូលរួមអបអរសាទរបុណ្យចូលឆ្នាំថ្មីប្រពៃណីជាតិក្នុងពេលខាងមុខនេះ៕
