មណ្ឌលគិរី៖ឯកឧត្តម ស្វាយ សំអ៊ាង អភិបាលខេត្តមណ្ឌលគិរីបានប្រសាសន៍ថា ក្នួយៗសិស្សានុសិស្សគឺជាទំពាំងស្នងឫស្សី ត្រូវតែខិតខំយកចិត្តទុកដាក់ក្នុងការសិក្សា ដើម្បីចូលរួមចំណែកអភិវឌ្ឍន៍ប្រទេសជាតិយើង ដូចឆ្នេះក្មួយៗត្រូវតែជៀសឲ្យផុតពីការប្រើប្រាស់សារធាតុញៀន និងល្បែងស៊ីសងផ្សេងៗដែលច្បាប់បានហាមឃាត់ ឯកឧត្តមបានថ្លែងបែបនេះនៅក្នុងពិធីសំណេះសំណាលជាមួយលោកតាលោកយាយ លោកគ្រូ អ្នកគ្រូ និងសិស្សានុសិស្សចំនួន២៥០នាក់ នៅរសៀលថ្ងៃទី០៧ខែមេសាឆ្នាំ២០១៦នេះ នៅអន្តេវាសិកដ្ឋានខេត្តមណ្ឌលគិរី។
ឯកឧត្តមបានបន្តទៀតថា បច្ចុប្បន្ននេះនៅតាមក្រុងស្រុកទូទាំងខេត្តមណ្ឌលគិរី សុទ្ធតែមានវិទ្យាល័យ សម្រាប់ឲ្យក្នួយៗងាយស្រួលក្នុងការក្រេបជញ្ជក់យកនូវចំណេះវិជ្ជា ទាំងនេះគឺជាការយកចិត្តទុដាក់របស់ប្រមុខរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
បន្ទាប់មកឯកឧត្តម បានថ្លែងអំណរគុណដល់មន្ទីរអប់រំយុវជន និងកីឡាដែលបានរៀបចំពិធីនេះឡើង ហើយឯកឧត្តមក៏បានសំណូមពរដល់ក្មួយៗសិស្សានុសិស្ស ត្រូវចូលរួមគោរពច្បាប់ចរាចរណ៍ ពេលបើកបរត្រូវពាក់មួកសុវត្ថិភាព និងត្រូវចេះគោរពគ្នាទៅវិញទៅមក ដើម្បីអាយុជិវិតយើងទាំងអស់គ្នា ។
នៅក្នុងពិធីសំណេះសំណាលនោះដែរ ឯកឧត្តមអភិបាលខេត្ត និងលោកជំទាវ ព្រមទាំងលោកជំទាវអភិបាលរងខេត្ត បានប្រគល់នូវចានស្រាក់ដល់លោកតា លោកយាយ ចំនួន១០០នាក់ក្នុងមួយនាក់ទទួលបានចាន់ស្រាក់១ ចំណែកលោកគ្រូ អ្នកគ្រូចំនួន១០នាក់ក្នុងមួយនាក់ទទួលបានថវិកាចំនួន៨ម៉ឺនរៀល សិស្សានុសិស្សចំនួន១៥០នាក់ក្នុងមួយនាក់ទទួលបានសៀវភៅ៥ក្បាល ប៊ិចចំនួន២ដើម និងថវិកាចំនួន៥ពាន់រៀល ព្រមទាំងពិសារបបរសាមគ្គីផងដែរ៕ដោយប៊ូស្រា
