(បន្ទាយមានជ័យ)៖ ផ្ទះសង្ក័សីចំនួន៣៥៦ខ្នងត្រូវបានប្រគល់ជូនដល់ប្រជាពលរដ្ឋដែល
មានជីវភាពខ្វះខាតក្នុងស្រុកអូរជ្រៅក្រោយជួសជុលរួចជាស្ថាពរ។ការប្រគល់ជូននេះធ្វើឡើងដោយឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិគណបក្សប្រេជាជនកម្ពុជាចុះជួយខេត្តបន្ទាយមានជ័យនិងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀននាព្រឹកថ្ងៃទី៩ ខែមេសា ឆ្នាំ២០១៦ នៅក្នុងបរិវេណផ្សារអូរជ្រៅថ្មី ស្ថិតនៅភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។ថ្លែងការសំណេះសំណាលជាមួយប្រជាពលរដ្ឋចំនួន៧២០នាក់ ឧបនាយករដ្ឋមន្ត្រីកែ គឹមយ៉ាន ក៏បានពាំនាំយកការសួរសុខទុក្ខពីសំណាក់សម្តេចតេជោ ហ៊ុនសែន និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែនផងដែរ។ក្នុងនោះលោកឧបនាយករដ្ឋមន្ត្រីបានផ្តាំផ្ញើរអោយពលរដ្ឋដែលទទួលបានផ្ទះថ្មីសូមអោយចេះថែរក្សាអោយយូរអង្វែង ត្រូវចេះប្រុងប្រយ័ត្នខ្ពស់ចំពោះបញ្ហាភ្លើង ព្រោះអីបច្ចុប្បន្ននេះជារដូវរីងស្ងួត ក្តៅហែង ហើយវាងាយនឹងបង្កការឆេះឆាបខ្លាំងណាស់។
ក្នុងនោះពលរដ្ឋចំនួន៣៥៦ខ្នងផ្ទះរស់នៅស្រុកអូរជ្រៅ ទទួលបានកន្ទេល១ ម៉ុង១ ឆ្នាំងបាយ១ ចានបាយ១ឈុត ទឹកស៊ីអ៊ិវ ទឹកត្រី អំបិល ប៊ីចេង នំធុង សារុង១ ក្រមា១ និងថវិការមួយចំនួន ។ សម្រាប់ពលរដ្ឋ និវត្តន៍ជន និងអតីតយុទ្ធជនចំនួន១២១នាក់ ទទួលបាន សារុង១ វែនតា១ និងថវិការមួយចំនួន ។សម្រាប់ពលរដ្ឋចូលរួមចំនួន២៤៣នាក់ទទួលបានសរុង១ និងថវិការមួយចំនួន៕
