បន្ទាយមានជ័យ៖ កម្លាំងនគរបាលជំនាញព្រហ្មទណ្ឌកំរឹតធ្ងន់នៃស្នងការនគរបាលខេត្តបន្ទាយមានជ័យបានឃាត់ខ្លួនយុវជនឈាមរាវចំនួន៥នាក់កាលពីវេលាម៉ោង១៧និង៣០នាទីល្ងាចថ្ងៃទី៧ខែមេសាឆ្នាំ២០១៦នៅតាមបណ្តោយមហាវិថី៧មករាចំណុចមុខសួនស្នេហ៍ជនបទស្ថិតក្នុងភូមិខ្លាកូនថ្មីសង្កាត់កំពង់ស្វាយក្រុងសិរីសោភ័ណបន្ទាប់ពីបានវាយកាប់ចាក់លើដៃគូប្រកួតរបស់ខ្លួនបណ្តាលអោយរងរបួសជាទំងន់។ ថ្លែងប្រាប់នៅកន្លែងធ្វើត្រាប់ឡើងវិញនៅល្ងាចថ្ងៃទី៨ខែមេសាម្ស៉ិលម៉ិញលោក សិទ្ធ ឡោះ ស្នងការរងនៃស្នងការដ្ឋាននគរបាលខេត្តបន្ទាយមានជ័យទទួលបន្ទុកការបង្ក្រាបនេះបានអោយដឹងថាកាលពីល្ងាចថ្ងៃទី០៧ខែមេសា មានក្មេងស្ទាវពីរក្រុមបានដេញកាប់ចាក់គ្នាចេញពីសួនស្នេហ៍ជនបទមកលើដងមហាវិថី៧មករា។យុវជនម្នាក់ឈ្មោះ ភួង ឡៃយីន អាយុ១៧ឆ្នាំរស់នៅភូមិខ្លាកូនចាស់សង្កាត់កំពង់ស្វាយក្រុងសិរីសោភ័ណបានជិះរត់ចេញដើម្បីគេចខ្លួនតែត្រូវបានភាគីប្រកួតយកដំបង កាំបិត វាយនិងកាប់បណ្តាលអោយដួលដេកលើដីរងរបួសជាទម្ងន់។ម៉ូតូជនរងគ្រោះក៏ត្រូវបានគេវាយកម្ទេចអោយរងការខូចខាតយ៉ាងដំណំនិងជិះយកទៅផ្លុងចោលនៅមាត់អូរក្រៅភូមិដើម្បីបំបាត់ដានសមត្ថកិច្ច។ តែដោយមានការស្រាវជ្រាវយ៉ាងម៉ឺងម៉ាត់ពីកម្លាំងជំនាញនគរបាលបានឃាត់បក្សពួកក្មេងទំនើងបាន៥នាក់ជាបន្តបន្ទាប់និងបានយកម៉ូតូជនរងគ្រោះមកវិញដោយឡែកបក្សពួកម្នាក់កំពុងគេចខ្លួន។
លោក សិទ្ធ ឡោះ បានបន្តថាក្មេងទំនើងទាំង៥ដែលឃាត់ខ្លួនបានមានឈ្មោះទី១ឈ្មោះ ប៉ាន នូលឿន ភេទ ប្រុស អាយុ ១៩ឆ្នាំ នៅភូមិភ្នំបាក់ សង្កាត់ទឹកថ្លា ក្រុងសិរីសោភ័ណ ” ទើបមកពីប្រទេសថៃ ” ជាជនដៃដល់ ទី២ ឈ្មោះ ប្រាក់ ឌិចសា ហៅ កាត់ ភេទ ប្រុស អាយុ ១៩ឆ្នាំ នៅភូមិនិងសង្កាត់ទឹកថ្លា ក្រុងសិរីសោភ័ណ ” ទើបមកពីប្រទេសថៃ ” ជាជនដៃដល់ ទី ០៣ ឈ្មោះ លើត និត ភេទ ប្រុស អាយុ ១៨ ឆ្នាំ នៅ ភូមិ បាណយ សង្កាត់ ទឹកថ្លា ក្រុងសិរីសោភ័ណ ជាបក្សពួក ទី ០៤ ឈ្មោះ ដាវ វុទ្ធី ភេទ ប្រុស អាយុ ១៩ ឆ្នាំ នៅភូមិ ភ្នំបាក់ សង្កាត់ទឹកថ្លា ក្រុង សិរី សោភ័ណ ជាបក្សពួក ទី ០៥ ឈ្មោះ ហួត ប៉ាវ ហៅ ឌី ភេទ ប្រុស អាយុ ២២ឆ្នាំ នៅភូមិនិងសង្កាត់ ព្រះពន្លា ក្រុង សិរីសោភ័ណ ជាបក្សពួក ទី ០៦ ឈ្មោះ យី មិនទាន់ស្គាល់ត្រកូល នៅភូមិភ្នំបាក់ សង្កាត់ទឹកថ្លា ក្រុងសិរីសោភ័ណ ជាបក្សពួក ” កំពុងរត់គេចខ្លួន “។ បច្ចុប្បន្នក្មេងទំនើងទាំង៥នាក់កំពុងស្ថិតក្រោមការសួរនាំរបស់សមត្ថកិច្ចការិយាល័យជំនាញដើម្បីកសាងសំណុំរឿងបញ្ជូនទៅតុលាការខេត្តចាត់ការតាមនីតិវិធីច្បាប់៕ដោយ៖ឃិន គន្ធា
