រាជធានីភ្នំពេញ ៖ រថយន្តមិនចាំម៉ាកមួយគ្រឿងបានបើកក្នុងល្បឿនលឿន ហើយជ្រុលចង្កូយទៅបុកប្រុសស្រី២នាក់កំពុងជិះម៉ូតូឌុបគ្នាចំពីក្រោយពញទំហឹងនិងផ្លោងអូសជិត៥០ម៉ែត្របណ្ដាលឲ្យបុរសម្នាក់បានបោកក្បាលស្លាប់ភ្លាមនៅនឹងកន្លែងកើតហេតុ ហើយស្ត្រីម្នាក់ទៀតរងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ ។ហេតុការណ៍គ្រោះថ្នាក់ចរាចរណ៍គួរឱ្យរន្ឋត់នេះបានកើតឡើងកាលពីវេលាម៉ោង ៧នឹង៥០នាទីយប់ថ្ងៃទី៩ ខែមេសា ឆ្នាំ២០១៦ តាមបណ្តោយផ្លូវជាតិលេខ២ មុខរោងចក្រឆ្នាំង ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ។ប្រភពពីកន្លែងកើតហេតុបានឲ្យដឹងថា ជនរងគ្រោះមានឈ្មោះ អ៊ឹម ស៊ីធន់ ភេទប្រុស អាយុ៤៣ឆ្នាំ មុខរបរជាអ្នករត់ម៉ូតូឌុប មានស្រុកកំណើតនៅឃុំព្រៃឈរ ស្រុកកំពង់ត្របែក ខេត្តព្រៃវែង និងបច្ចុប្បន្នស្នាក់នៅផ្ទះជួលម្តុំបឹងត្របែក ខណ្ឌចំការមន ។
យោងតាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា នៅមុនពេលកើតហេតុគេបានឃើញបុរសម្នាក់ ជិះម៉ូតូម៉ាកហុងដាឌ្រីម សេ១២៥ ពណ៍ខ្មៅ សេរីឆ្នាំ២០០៩ ពាក់ស្លាកលេខ កណ្តាល 1l-0674 ជិះឌុបស្ត្រីម្នាក់ តាមបណ្តោយផ្លូវជាតិលេខ២ ទិសដៅពីជើងទៅត្បូង ពេលមកដល់ចំណុចកើតហេតុ ស្រាប់តែមានរថយន្តមិនចាំម៉ាក បើកក្នុងល្បឿនលឿមកពីក្រោយបានបុកម៉ូតពេញទំហឹង បណ្តាលឱ្យអ្នកជិះម៉ូតូទាំង២នាក់ផ្លោង ប្រមាណ៥០ម៉ែត្រ បុរសជាអ្នកឌុបបោកក្បាលស្លាប់ភ្លាមៗ ក្នុងធ្លុកឈាមនៅនឹងកន្លែងកើតហេតុ ចំណែកស្ត្រីអង្គុយពីក្រោយរងរបួសធ្ងន់ ហើយត្រូវបានរថយន្តសាមុយមកដឹកយកទៅសង្គ្រោះនៅមន្ទីរពេទ្យភ្លាមៗ ចំណែករថយន្តបង្កបានបើកគេចខ្លួនបាត់ស្រមោល ។
ក្រោយពេលកើតហេតុ សមត្ថកិច្ចជំនាញបានចុះមកធ្វើការវាស់វែងយកម៉ូតូទៅរក្សាទុកនៅអធិការដ្ឋានគរបាលខណ្ឌមានជ័យ ចំណែកសពបុរសរងគ្រោះសមត្ថកិច្ចទំនាក់ទំនងទៅក្រុមគ្រួសារ ឱ្យមកទទួលយកទៅធ្វើបុណ្យតាមប្រពៃណី ៕ ដោយ៖ជីម ភារ៉ា
