សៀមរាប: ចាប់ពីដើមឆ្នាំ២០១៦មក មានគូស្វាមីភរិយាថ្មីប្រមាណជា ៧ ០០០គូ រួចមកហើយ ដែលបានផ្ញើឆ្នោតផ្សងសំណាងមកកាន់ក្រុមហ៊ុនភេសជ្ជៈកម្ពុជា(កូកា-កូឡា) ។ នេះជាឆ្នាំទី៣ នៃកម្មវិធីអាពាហ៍ពិពាហ៍ឈ្នះរង្វាន់របស់ក្រុមហ៊ុនភេសជ្ជៈកម្ពុជា(កូកា-កូឡា) ។ ដើម្បីបានចូលរួមកម្មវិធីពិសេសនេះ ដោយគ្រាន់តែគូស្វាមីភរិយាថ្មីដែលរៀបអាពាហ៍ពិពាហ៍ ឬគ្រោងនឹងរៀបអាពាហ៍ពិពាហ៍បានជាវផលិតផលចម្រុះរបស់ក្រុមហ៊ុនក្នុងចំនួនកំណត់ណាមួយ ដែលត្រូវទទួលបានសន្លឹកឆ្នោតចូលរួមផ្សងសំណាង ។
នេះបើតាមការបញ្ជាក់ឲ្យដឹងដោយ កញ្ញា ឡាវ ស្រីដែត ប្រធានផ្នែកផ្សព្វផ្សាយ និងគំនិតច្នៃប្រឌិតថ្មីរបស់ក្រុមហ៊ុនភេសជ្ជៈកម្ពុជា(កូកា-កូឡា)នារសៀលថ្ងៃទី០៨ ខែមីនា ឆ្នាំ២០១៦ ក្នុងឱកាសចាប់ឆ្នោត ប្រកាសឈ្មោះអ្នកឈ្នះរង្វាន់ចំនួន២៤គូ លើកទី២ នៅផ្សារទំនើបឡាក់គីម៉ល ក្រុងសៀមរាប ។ កញ្ញា ឡាវ ស្រីដែត បានឲ្យដឹងបន្ថែមថា ៖ រង្វាន់ផ្សងសំណាងទាំងនោះរួមមាន ម៉ូតូ ទូរស័ព្ទដៃស្មាតហ្វូន ម៉ាស៊ីនបោកគក់សម្លៀកបំពាក់ ទូរទឹកកក និង ម៉ាស៊ីនថតរូប ។ ជាមួយការចាប់រង្វាន់ផ្សងសំណាងនោះ កញ្ញាប្រធានទីផ្សាររូបនោះ ក៏បានបញ្ជាក់ប្រាប់ឲ្យដឹងដែរថា ការចាប់រង្វាន់លើកទី១ សម្រាប់គូស្វាមីភរិយាថ្មី ២៤គូ បានធ្វើឡើងកាលពីថ្ងៃទី០៨ ខែមករា ឆ្នាំ២០១៦ នៅផ្សារទំនើបអ៊ីអន(រាជធានីភ្នំពេញ) ហើយក្រុមហ៊ុន មានគម្រោងចាប់ឆ្នោតផ្សងសំណាងនេះ ជាលើកទី៣ នាថ្ងៃទី០៨ ខែកក្កដា ឆ្នាំ២០១៦ ចំនួន២៤គូបន្តទៀត នៅផ្សារទំនើបបូរីថ្មី ក្រុងបាត់ដំបង ។ 
កញ្ញា ឡាវ ស្រីដែត ប្រធានផ្នែកផ្សព្វផ្សាយនោះ ក៏បានឲ្យដឹងបន្ថែមដែរថា ៖ អតិថិជន ដែលជាគូស្វាមីភរិយាថ្មីរៀបអាពាហ៍ពិពាហ៍ ដែលបានជាវភេសជ្ជៈចម្រុះពីក្រុមហ៊ុនភេសជ្ជៈកម្ពុជា(កូកា-កូឡា)មានឱកាសឈ្នះរង្វាន់ពីរដង ដែលការឈ្នះរង្វាន់លើកទី១ គឺដោយការកោសសន្លឹកឆ្នោតឈ្នះរង្វាន់ភ្លាមៗ ដូចជា ដំណើរក្រេបទឹកឃ្មុំរយៈពេល ២យប់ ៣ថ្ងៃ គូប៉ុងសម្រាប់ចាក់សាំង គូប៉ុងសម្រាប់ពិសា ភីហ្សា និង ធុងទឹកកក កូកា-កូឡា ៕ដោយគឿនវេត
