ស្នើសុំមន្ទីរពាក់ពន្ធ័ជួយចុះត្រួតពិនិត្យនិងទប់ស្កាត់អោយបានមុនថ្ងៃចូលឆ្នាំខ្មែរផង
ខេត្តកំពង់ឆ្នាំង៖ ថ្មីៗនេះប្រជាពលរដ្ឋនៅក្នុងក្រុងកំពង់ឆ្នាំង និងស្រុករលាប្អៀរបានអោយដឹងថា៖ ទឹកកកដើម និងទឹកកកអនាម័យពេលដាក់ក្នុងកែវរលាយជាទឹក គឺទឹកនោះសុទ្ធតែកករខ្វល់ពេញកែវ។ ករណីនេះពួកគាត់បានសំដែងនូវក្តីព្រួយបារម្ភពីសុខភាពខ្លាំងណាស់ ទាក់ទងនឹងការផលិតទឹកកកដែលគ្មានអនាម័យល្អបែបនេះ ហើយសំណូមពរលោកអភិបាលខេត្ត និងមន្ទីរពាក់ព័ន្ទទាំងអស់មេត្តាជួយពិនិត្យការផលិតទឹកកកតាមរោងច្រកនានានៅក្នុងខេត្ត និងជួយដោះស្រាយរឿងនេះអោយបានមុនពេលចូលឆ្នាំខ្មែរ ដើម្បីកុំអោយប៉ះពាល់សុខភាពរបស់ប្រជាពលរដ្ឋ។
ប្រជាពលរដ្ឋបានអោយដឹងទៀតថា៖ ចំពោះទឹកកកអនាម័យមួយចំនួន នៅពេលពួកគាត់ទិញមកផឹកមានសភាពល្អក់ ហើយនៅពេលរលាយក្លាយជាទឹកនៅក្នុងកែវ មានកករខ្វល់ មានទាំងអំបោះ សក់ និងកំទេចល្អិតៗពេញកែវ។ ចំណែកទឹកកកដើមវិញនៅស្នូលកណ្តាល គឺមានម្សៅពណ៌សនៅចំកណ្តាលដើមទឹកកក ដែលពួកគាត់សង្ស័យថាជាជីអៀរ៉េសំរាប់ដាក់ក្នុងដំណាំស្រូវ គឺគេយកមកដាក់ដើម្បីអោយទឹកកកឆាប់កក។ ចំពោះទឹកកកដើមនេះត្រូវបានគេយកទៅកិនឬវាយអោយម៉ត់ប្រើប្រាស់តាមហាងកាហ្វេ និងតាមទីតាំងផ្សេងៗទៀត ដែលធ្វើអោយប៉ះពាល់ដល់សុខភាពប្រជាពលរដ្ឋ។
ទាក់ទងរឿងខាងលើនេះ លោក ទិត ណាន ប្រធានមន្ទីរឧស្សាហកម្មខេត្ត បានបញ្ជាក់អោយដឹងនៅព្រឹកថ្ងៃទី០៨ ខែមេសា ឆ្នាំ២០១៦ នេះថា៖ នៅក្នុងក្រុងកំពង់ឆ្នាំងមានកន្លែងផលិតទឹកកកដើម និងទឹកកកអនាម័យចំនួន៤កន្លែង ហើយមុនពេលបើកផលិតទឹកកកចេញលក់តាមទីផ្សារ គឺខាងមន្ទីរពាក់ព័ន្ធទាំងអស់បានត្រួតពិនិត្យទាំងគុណភាពទឹក ម៉ាស៊ីនផលិត និងសម្ភារៈផ្សេងៗទៀត ដើម្បីអោយការផលិតទឹកកកមានស្តង់ដាត្រឹមត្រូវ មិនប៉ះពាល់ដល់សុខភាពប្រជាពលរដ្ឋ។ ចំពោះសំណូមពរប្រជាពលរដ្ឋខាងលើនេះ លោកនឹងចុះទៅពិនិត្យគ្រប់ទីតាំងផលិតទឹកកកទាំងអស់ ដើម្បីអោយដឹងថា គេបានអនុវត្តតាមគោលការណ៍ដែរឬទេ និងថាតើទឹកកកដែលកំពុងមានបញ្ហនោះចេញមកពីកន្លែងណា។
លោក ប្រាក់ វ៉ុន ប្រធានមន្ទីរសុខាភិបាលបានអោយដឹងថា៖ ទាក់ទងព័ន្ធនឹងចំណីអាហារ ទឹកកកអាចមានសារធាតុគីមី បើការផលិតចេញមិនស្អាតនោះ គឺជាសមត្ថកិច្ចរបស់កាំកុងត្រូល មន្ទីរពាណិជ្ជកម្ម ឧស្សហកម្ម និងបរិស្ថានដែលត្រូវចុះទៅពិនិត្យដល់កន្លែងផលិត។ ចំណែកមន្ទីរសុខាភិបាលវិញ គឺត្រូវពិនិត្យនៅពេលប្រជាពលរដ្ឋពុល ឬក៏រាគក្អួត តែសំខាន់នោះគឺសូមអោយប្រជាពលរដ្ឋទាំងអស់យកចិត្តទុកដាក់ការពារសុខភាពរបស់ខ្លួននៅខែចូលឆ្នាំ ព្រោះរដូវនេះជារដូវក្តៅ អាចប្រឈមនឹងការរាគរូសចំពោះបញ្ហាទឹកកក ប្រសិនបើអាចជៀសវាងបានគឺកុំពិសារអី គ្រាន់តែដាក់ក្លាសេបានហើយ។
លោក ពៅ ប៊ុនថន ប្រធានមន្ទីរបរិស្ថានខេត្តបានអោយដឹងដែរថា៖ ករណីនេះលោកមិនបានដឹងឡើយ ក្រោយពីទទួលបានព័ត៌មាននេះ លោកនឹងបញ្ជូនមន្ត្រីជំនាញចុះទៅពិនិត្យកន្លែងផលិតទឹកកកទាំង៤កន្លែងនៅក្នុងក្រុងកំពង់ឆ្នាំង តែលោកដឹងថា កន្លងមកទីតាំងផលិតទឹកកកទាំង៤កន្លែងនេះគឺសុទ្ធតែប្រើប្រាស់ទឹកស្អាតរបស់ក្រុមហ៊ុនអានកូ ទើបមន្ទីរពាក់ព័ន្ធអនុញាតិអោយធ្វើអាជីវកម្ម។ ប្រសិនបើរកឃើញភាពមិនប្រក្រតីណាមួយ ធ្វើអោយប៉ះពាល់ដល់សុខភាពប្រជាពលរដ្ឋ ក្រុមការងារនឹងស្នើអាជ្ញាធរខេត្ត បិតទ្វាររោងចក្រផលិតទឹកកកនោះជាបណ្តោះអាសន្ននិងចាត់ការតាមផ្លូវច្បាប់។
ចំណែកលោក ឈួរ ច័ន្ទថន ប្រធានមន្ទីរពាណិជ្ជកម្មខេត្ត មិនអាចសុំការបំភ្លឺបានទេក្នុងរឿងនេះ ព្រោះទូរស័ព្ទរបស់លោកបានតេចូល តែលោកមិនទទួល។
នៅព្រឹកថ្ងៃទី០៨ ខែមេសា ឆ្នាំ២០១៦នេះ ម្ចាស់រោងចក្រទឹកកកបឹងធំបានអនុញាតិអោយអ្នកយកព័ត៌មានយើងចូលថតរូបភាព ដោយគាត់បានបញ្ជាក់អោយដឹងថា៖ សព្វថ្ងៃនេះទឹកកកអនាម័យដែលយកមកលក់ក្នុងខេត្តកំពង់ឆ្នាំង គឺគេបានដឹកចូលមកពីគ្រប់ទីកន្លែងទាំងក្នុងខេត្តនិងក្រៅខេត្តដោយគ្មានការត្តួតពិនិត្យឬទប់ស្កាត់ឡើយ។ ដោយឡែកការផលិតទឹកក
កអនាម័យកន្លែងលោក គឺបានប្រើប្រាស់ទឹកស្អាតក្រុមហ៊ុនអានកូ ដោយនៅក្នុង១ខែៗគាត់បានចំណាយទិញទឹកស្អាតអស់ប្រាក់ជាង៦លានរៀល។ចំពោះការល្បីថាទឹកកកដើមដាក់ជីអៀរ៉េនោះគឺមិនមានទេនៅកន្លែងលោក ព្រោះថាពពុះសៗនៅកណ្តាលដើមទឹកកក គឺមកពីអ្នកផលិតមិនបានប្រើខ្យល់ផ្លុំពពុះចេញតែប៉ុណ្ណោះ។
ករណីនេះទោះបីជាមានការបកស្រាយពីអ្នកពាក់ពន្ធ័យ៉ាងណាក្តី ប្រជាពលរដ្ឋនៅតែទទូចស្នើសុំដល់លោកអភិបាលខេត្ត និងមន្ទីរពាក់ពន្ធ័ មេត្តាចុះត្រួតពិនិត្យតាមរោងចក្រផលិតអោយបានត្រឹមត្រូវ ព្រោះថាបើទឹកកកគ្មានអនាម័យគឺពិតជាប៉ះពាល់ធ្ងន់ធ្ងរណាស់ដល់សុខមាលភាពរបស់ប្រជាពលរដ្ឋដែលជាអ្នកប្រើប្រាស់នៅរដូវក្តៅនេះ៕
