កំពត-ស្រុកកំពង់ត្រាច ៖ នៅថ្ងៃទី ១៣ ខែមេសា ឆ្នាំ២០១៦ វេលាម៉ោង ៩ៈ៣០នាទី មានប្រជាពលរដ្ឋបានរាយការណ៍ជូនសមត្ថកិច្ចថា មានមនុស្សស្លាប់ នៅខាងលិចស្ថានីយ៍រថភ្លើងស្រុកកំពង់ត្រាច (ដេកស្លាប់នៅលើផ្លូវរថភ្លើង) ដែលមានចំងាយប្រហែល ១.៥០០mពីស្ថានីយ៍ ស្ថិតនៅភូមិកំពង់ត្រាចទី២ ឃំុកំពង់ត្រាចខាងលិច ។ ពេលសមត្ថកិច្ចយើងទៅដល់កន្លែងកើតហេតុ ពិតជាមានមនុស្សស្លាប់ នៅលើផ្លូវរថភ្លើងពិតប្រាកដមែន ជនរងគ្រោះមិនស្គាល់អត្តសញ្ញាណទេ ភេទប្រុស អាយុប្រហែល ៥០ឆ្នាំ សាកសពជនរងគ្រោះដាច់ប្រអប់ជើងខាងស្តាំ និងបែកក្បាល ។
តាមរបាយការណ៍ លោកមេប៉ុស្តិ៍រាយការណ៍នូវព័ត៌មានបឋមថា មានប្រជាពលរដ្ឋដែលនៅជិតកន្លែងកើតហេតុប្រាប់ថា មុនពេលកើតហេតុ ២ ទៅ ៣ថ្ងៃ គេឃើញ ជនរងគ្រោះដើរទៅ ដើរមក នៅលើផ្លូវរថភ្លើង ដូចជា់មនុស្សវិកលចរិត ហើយនៅយប់អធ្រាត្រឈានចូលថ្ងៃទី១៣ ខែមេសា ឆ្នាំ២០១៦ ម៉ោងប្រហែល ១ៈ០០នាទី មានរថភ្លើងរត់ ។
តាមរបាយការណ៍កម្លាំងជំនាញបច្ចេកទេសផ្នែកចរាចរណ៍ បានចុះដល់កន្លែងកើតហេតុបានសន្និដ្ឋាននូវព័ត៌មានបឋមថា ជនរងគ្រោះជាមនុស្សវិកលចរិត ហើយត្រូវរថភ្លើងបុកស្លាប់ពិតប្រាកដមែន ៕
