( រូបភាពវីដេអូ ) ប្រទេសឥណ្ឌា បានធ្វើការអញ្ជើញជាផ្លូវការ ចំពោះលោកនាយករដ្ឋមន្ត្រី ប៉ាគីស្ថាន ណាវ៉ាហ៍ ហ្សារីហ្វ ឲ្យចូលរួមក្នុងពិធីស្បថ ឡើងកាន់តំណែង នាយករដ្ឋមន្ត្រីឥណ្ឌា ថ្មីគឺ លោក ណារិនដ្រា មូឌី ដែលទើបជាប់ឆ្នោតជាស្ថាពរ កាលពីចុងសប្តាហ៍កន្លងទៅ, នេះបើ តាមការដកស្រង់អត្ថន័យ ពីសារព័ត៌មាន ក្នុង តំបន់នៅថ្ងៃពុធ ទី២១ ខែឧសភា ឆ្នាំ ២០១៤។ ក្រៅពីនេះ ទីក្រុងញូដេលី ក៏បានអញ្ជើញផងដែរ នូវបណ្តាប្រមុខរដ្ឋនានា នៅលើសកលលោក ដែលជាមិត្តភក្តិរបស់ខ្លួន ជាពិសេសនោះ គឺបណ្តាប្រទេសនៃ សមាគមអាស៊ីខាងត្បូងសម្រាប់ កិច្ចសហប្រតិបត្តិការក្នុងតំបន់ ឲ្យចូលរួមពិធីដ៏អធិកអធមខាងលើ នាថ្ងៃទី២៦ ខែឧសភា ឆ្នាំ ២០១៤ ខាងមុខនេះ។
គ្រប់គ្នាបានដឹងថា លោក មូឌី គឺជាមិត្តស្និទ្ធស្នាល ជាមួយនឹងនាយករដ្ឋមន្ត្រីប៉ាគីស្ថាន ដូច្នេះទំនាក់ទំនងរវាងប្រទេសទាំងពីរ នឹងផ្លាស់ប្តូរប្រសើរឡើងទៅថ្ងៃមុខ។ ក្នុងន័យនេះលោក មូឌី ក៏បានអំពាវនាវថែមទៀត ឲ្យប្រទេសប៉ាគីស្ថានបញ្ឈប់នូវរាល់សកម្ម គឃ្លើនទាំងអស់ប្រឆាំងនឹងឥណ្ឌា ជាថ្នូរនឹងការកសាងទំនាក់ទំនង ឲ្យបានប្រសើរឡើងវិញ រវាងប្រទេសដែលមានសក្តានុពលខ្លាំង ក្នុងតំបន់ទាំងពីរនេះ។
ទោះបីជាបែបនេះក៏ដោយ គណកម្មការជាន់ខ្ពស់របស់ប៉ាគីស្ថាន ដែល មានមូលដ្ឋាននៅទីក្រុង ញូដេលី បានបដិសេធ នូវរាល់ភាពមិនទាន់ផ្លូវការទាំងឡាយ ដែលលើកឡើង ដើម្បីផ្សះផ្សាទំនាក់ទំនងរវាងប្រទេស ជិតខាងទាំងពីរនេះ៕
