ភ្នំពេញៈ បុរសម្នាក់ស្រវឹងបើរថយន្ដឡិចសីុសRX300បញ្ច្រាសទិសចរាចរណ៍និងឆ្លងផ្លូវមិនប្រយ័ត្នត្រូវរថយន្ដឡិចសីុស470បុកចំពីមុខពេញទំហឹងបណ្ដាលអោយរងការខូចខាតទាំងសងខាង។ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១២និង៥០នាទីរំលងអាធ្រាត ឈានចូលថ្ងៃទី០៤ ខែឧសភា ឆ្នាំ២០១៦ នៅចំណុចស្តុបវត្តនាគ្គវ័ន្ត តាមបណ្ដោយមហាវិថីសហព័ន្ធរុស្សី ស្ថិតក្នុងសង្កាត់ ស្រះចក់ ខណ្ឌដូនពេញ ។
ប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុគេបានឃើញរថយន្ដម៉ាកឡិចសីុសRX300 ពណ៍សរ ពាក់ស្លាកលេខ ភ្នំពេញ2 O 5613 បើកបរដោយបុរសម្នាក់ស្ថិតក្នុងស្ថានភាពស្រវឹងជោកធ្វើដំណើរតាមបណ្ដោយផ្លូវលេខ221 ដែលជាផ្លូវឯកទិស ក្នុងទិសដៅពីត្បូងទៅជើង(បញ្ច្រាសទិសចរាចរណ៍)ហើយបានឆ្លងមហាវិថីសហព័ន្ធរុស្សី ក៏ត្រូវរថយន្ដមួយគ្រឿងទៀតម៉ាក ឡិចសីុស470 ពណ៍សរ ពាក់ស្លាកលេខ ភ្នំពេញ2AC 2115 ធ្វើដំណើរទិសដៅពីកើតមកលិចបុកចំក្បាលរថយន្ដចំហៀងខាងស្ដាំរងការខូចខាតទាំងសងខាង។
ក្រោយពីកើតហេតុម្ចាស់រថយន្ដឡិចសីុRX300បានទារសំណងខាងម្ចាស់រថយន្ដម្ខាងទៀតចំនួន7០០$ទាំងខ្លួនស្រវឹងជោកតែម្ចាស់រថយន្ដម្ខាងទៀតមិនព្រម។ ក្រោយមកសមត្ថកិច្ចជំនាញបានចុះធ្វើការវាស់វែងយករថយន្ដទាំងពីរទៅរក្សាទុកនៅចរាចរណ៍ជើងគោករាជធានីភ្នំពេញ ដើម្បីរងចាំដោះស្រាយនៅពេលក្រោយ។ដោយៈជីម ភារ៉ា
