> ភ្នំពេញៈនារីម្នាក់បើករថយន្តសេរីទំនើបម៉ាកឡិកសីុសRX350ឆ្វេងមិនប្រយ័ត្នក៏ជ្រុលទៅបុកម៉ូតូគៀបជាប់ក្រោមរថយន្តតែមិនបណ្ដាលអោយអ្នកបើកម៉ូតូមិនរងរបួសនោះទេ។
> ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១ៈ៣៥នាទីរំលងអធ្រាតឈានចូលថ្ងៃទី៥ខែឧសភាឆ្នាំ២០១៦ នៅចំណុចក្រោមស្ពានអាកាស ៥មករា ស្ថិតក្នុងសង្កាត់ផ្សារដេប៉ូ៣ ខណ្ឌទួលគោករាជធានីភ្នំពេញ។
> ប្រភពពត៌មានពីកន្លែងកើតហេតុបានអោយដឹងថា ៈនៅមុនពេលកើតហេតុគេឃើញរថយន្តសេរីទំនើបម៉ាកឡិកសីុសRX350 ពណ៌ស ពាក់ស្លាកលេខភ្នំពេញ2AG 5665 បើកដោយនារីម្នាក់តាមបណ្តោយផ្លូវគីមអីុលស៊ុងទិសដៅពីជើងទៅត្បូងក្នុងល្បឿនល្មមលុះមកដល់ចំណុចកើតហេតុត្រង់ចំណុចក្រោមស្ពានអាកាស៥មករា ដែលជាចំណុចហាមឃាត់មិនអោយរថយន្ដឬម៉ូតូបត់ឆ្វេង តែរថយន្តបានបត់ឆ្វេងមិនប្រយ័ត្នក៏ជ្រុលចង្កូតទៅបុកម៉ូតូហុនដាឌ្រីមពណ៌ខ្មៅពាក់ស្លាកលេខសៀមរាប1P 3572ដែលកំពុងតែបើកស្របទិសគ្នាបណ្តាលអោយម៉ូតូគៀបជាប់ក្រោមរថយន្តចំណែកអ្នកជិះម៉ូតូលូនចេញពីក្រោមរថយន្តមិនបណ្តាលអោយរងរបួសធ្ងន់ធ្ងរនោះទេ ចំណែកម៉ូតូខូចខាតផ្នែកខាងមុខ។
> ក្រោយពេលកើតហេតុភាគីខាងរថយន្ដបានសងថ្លៃខូចខាតចំនួន100$ទៅអោយម្ចាស់ម៉ូតូដើម្បីបញ្ចប់រឿងនៅកន្លែងកើតហេតុដោយមិនរំខានដល់សមត្ថកិច្ចឡើយ៕ដោយៈជីម ភារ៉ា
