ខេត្តព្រះសីហនុ ៖ នៅវេលាម៉ោងជាង១០ព្រឹកថ្ងៃទី២១ខែឧសភាឆ្នាំ២០១៤នេះដែរនៅលើដងផ្លូវជាតិលេខ៤ក្នុងភូមិកំពង់សិលាឃុំកំពង់សិលាស្រុកកំពង់សិលាខេត្តព្រះសីហនុក៏មានករណីគ្រោះថ្នាក់ចរាចរណ៍មួយគួរឲ្យចង់សើច ខណះដែលរថយន្តឆ្លាមមួយគ្រឿងមិនដឹងខ្លួនស្រាប់តែទទួលរងគ្រោះដោយខ្សាច់គ្របពីលើស្ទើរបាត់ស្រមោល ។
មន្ត្រីនគរបាលប៉ុស្តិ៍ស្រុកកំពង់សិលាបានឲ្យដឹងថា ជំហានដំបូងរថយន្តដឹកខ្សាច់ធន់កូរ៉េមួយតោនកន្លះ បានបើកប៉ះគ្នាជាមួយរថយន្តលុចសីស rx300ពណ៍ស្លែមួយគ្រឿងបើកបរស្របទិសគ្នា ពីភ្នំពេញមកក្រុងព្រះសីហនុ ខណះនោះរថយន្តកូរ៉េដឹកខ្សាច់នោះក៏រេចង្កូតទៅក្រឡាប់ម្នាក់ឯងកណ្តាលផ្លូវគាប់ជួនមានរថយន្តតាក់ស៊ីឆ្លាមមួយមកដល់ទន្ទឹម ផងក៏ចាក់ខ្សាច់គ្របពីលើរថយន្តតូចឆ្លាមនោះតែម្តង ករណីនេះបានធ្វើឲ្យជនបរទេសក្នុងរថយន្តតាក់ស៊ីឆ្លាម កប់ក្នុងពំនូកខ្សាច់នោះរងគ្រោះស្ទើរដាច់ដង្ហើមម្នាក់ៗទំរាំរើចេញរួចពីរថយន្ត ។
មន្ត្រីនគរបាលស្រុកកំពង់សិលាមិនទាន់បានបញ្ជាក់អំពីអត្តសញ្ញាណម្ចាស់រថយន្តម្នាក់ៗនៅឡើយទេដោយរវល់សង្គ្រោះជនបរទេស និងអ្នករងគ្រោះផ្សេងទៀត ប៉ុន្តែនគរបាលអះអាងថាពុំមានគ្រោះថ្នាក់ដល់អាយុជីវិតមនុស្សណាម្នាក់នៅឡើយទេ ក្នុងពេលសង្គ្រោះនោះ ។ វត្ថុតាងត្រូវបាននគរបាលប្រមូលយកទៅរក្សាទុកនៅអធិការដ្ឋាននគរបាលស្រុកកំពង់សិលាដើម្បីរង់ចាំធ្វើការដោះស្រាយ ៕
