ភ្នំពេញ ៖ អគ្គីភ័យមួយបានឆាបឆេះផ្ទះជួលមួយកន្លែងយ៉ាងខ្លាំង បន្ទាប់ពីមានការឆ្លងចរន្តអគ្គីសនីពីខ្សែភ្លើងដែលនៅក្នុងបន្ទប់កើតហេតុបង្ករឲ្យមានការភ្ញាក់ផ្អើលដល់បងប្អូនប្រជាពលរដ្ឋសហការគ្នាអន្តរាគមន៏បាញ់ពន្លត់ រលត់ទៅវិញ មុនពេលរថយន្តពន្លត់អគ្គីភ័យមកដល់។ ហេតុការណ៏នេះបានកើតឡើងកាលពីវេលាម៉ោង១០និង ៣០នាទីយប់ ថៃ្ងទី ៨ ខែឧសភា ឆ្នាំ ២០១៦ ចំណុចផ្ទះល្វែងដែលមានយីហោ កាហ្វេសំណាងល្អ តាមបណ្ដោយផ្លូវ១០៣ ក្នុងសង្កាត់ទួលសង្កែ ខណ្ឌឬស្សីកែវរាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលនៅក្បែកន្លែងកើតហេតុ បានឲ្យដឹងថា មុនពេលកើតហេតុ គេបានឭសូរសម្លេងផ្ទុះ ពីចំណុចខ្សែរភ្លើងដែលនៅក្នុងបន្ទប់កើតហេតុខាងលើ ខណៈ ពេលនោះស្រាប់តែឃើញមានអណ្តាតភ្លើងឆាបឆេះឡើងយ៉ាងខ្លាំង បូករួមទាំងផ្សែងយ៉ាងក្មួរខ្មាញ់ផងដែរ ហើយខាងម្ចាស់បន្ទប់និងអ្នករស់នៅក្បែរបានស្រែកឲ្យបងប្អូនប្រជាពលរដ្ឋបានលឺ ហើយបាននាំគ្នាយកបំពង់ពន្លត់អគ្គីភ័យដែលនៅតាមផ្ទះរៀងៗខ្លួនជាច្រើនបំពង់យកមកបាញ់ និងអ្នកខ្លះយកទយោទឹកមកត និងធ្វើការបាញ់ពន្លត់ភ្លើងដែលកំពុងអគ្គីភ័យឆាបឆេះខាងលើនេះ រហូតប្រើពេលវេលាប្រហែលជិត១ម៉ោងទើបប្រជាពលរដ្ឋបានបាញ់រលត់ទៅវិញជាស្ថាពរ មុនពេលរថយន្តពន្លត់អគ្គីភ័យជាច្រើនគ្រឿងមកដល់ ។
ដោយឡែកក្នុងហេតុការណ៍នោះដែរក៏មាននារីម្នាក់បានដួលសន្លប់ ដោយមិនដឹងថាមកពីមូលហេតុអ្វីនោះទេ ហើយក៏ត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យភ្លាមៗផងដែរ។ ដោយៈជីម ភារ៉ា
