ភ្នំពេញ ៖ រថយន្តមួយគ្រឿងជិះធ្វើដំណើរដោយបុរស២នាក់និងនារី៣នាក់ទើបចេញពីពិធីជប់លៀងមិត្តភ័ក្តិបានធ្វើដំណើរតាមបណ្ដោយផ្លូវ១១៨ក្នុងល្បឿនលឿន ខណៈមកដល់ផ្លូវកែងលេខ៦១ ក៏បានបុកម៉ូតូមួយគ្រឿងពីក្រោយជិះគ្នា៣នាក់ស្របទិសគ្នាបណ្ដាយរងរបួសធ្ងន់ ហើយរថយន្តបង្កបានព្យាយាមបើករត់តែត្រូវប្រជាពលរដ្ឋជិះដេញពីក្រោយតាមឃាត់ជាប់ ដែលហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ចូលថ្ងៃទី២១ខែឧសភាឆ្នាំ២០១៤ ស្ថិតក្នុងសង្កាត់ផ្សារថ្មី១ ខណ្ឌដូនពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានរថយន្តមួយគ្រឿងម៉ាកតូយ៉ូតា ព្រូស ពណ៌ខ្មៅ ពាក់ស្លាកលេខ ភ្នំពេញ 2P-9510 ជិះធ្វើដំណើរដោយបុរស២នាក់និងនារី៣នាក់ទើបតែចេញពីពិធីជប់លៀងមិត្តភ័ក្តិ តាមបណ្ដោយផ្លូវ១១៨ ទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុកែងនិងផ្លូវលេខ៦១ រថយន្តក៏បានបុកម៉ូតូមួយគ្រឿង ម៉ាក ហុងដាគ្លីក ពណ៌ឈាមជ្រូក ពាក់ស្លាកលេខ ភ្នំពេញ 1BK-2012 ចំពីក្រោយ
ពេញទំហឹងជិះគ្នា៣នាក់បណ្ដាលអោយរងរបួសធ្ងន់ ចំណែកម៉ូតូគៀបជាប់ក្រោមរថយន្តអូសជាង៥០ម៉ែត្រ ខណៈនោះនារីដែលនៅក្នុងរថយន្តក៏បានចុះមកទាញម៉ូតូចេញពីក្រោមរថយន្តចេញ ដោយមានប្រជាពលរដ្ឋចោមរោមច្រើនពេករថយន្តបង្កក៏បានព្យាយាមបើករត់ទៅមុខបាត់ ចោលនារី៣នាក់នោះកន្លែងកើតហេតុក៏ត្រូវប្រជាពលរដ្ឋនិងសមត្ថកិច្ចឃាត់ខ្លួន។
ចំណែករថយន្តបង្កព្យាយាមបើករត់ក៏មានប្រជាពលរដ្ឋជិះម៉ូតូតាមពីក្រោយរហូតមកដល់ផ្លូវ៣៣៦ប្រឡាយទឹកស្អុយ ក្នុងសង្កាត់បឹងសាឡាង ខណ្ឌទួលគោក រថយន្តបង្កក៏បានឈប់រថយន្តចតទុកចោលមុខផ្ទះប្រជាពលរដ្ឋដែលជាកន្លែងស្ងាត់ហើយរត់គេចខ្លួនបាត់ ក៏ត្រូវប្រជាពលរដ្ឋឃាត់បាននិងរាយការណ៍ទៅសមត្ថកិច្ចចុះមកត្រួតពិនិត្យ។
បន្ទាប់ពីកើតហេតុជនរងគ្រោះទាំង៣នាក់រងរបួសបាក់ជើងទាំងអស់ដោយសាររថយន្តកិនពីលើ ហើយត្រូវបានរថយន្តសាមុយរបស់មន្ទីរពេទ្យឯកជន ដឹកយកទៅសង្គ្រោះនៅមន្ទីរពេទ្យភ្លាមៗ ចំណែកម៉ូតូនិងរថយន្តត្រូវបានសមត្ថកិច្ចជំនាញចរាចរចុះត្រួតពិនិត្យយកទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់៕
