ភ្នំពេញ ៖ ហេតុការណ៍ ភ្ញាក់ផ្អើល មួយបានកើតឡើង ដោយសារតែជើងខ្លាំងម្នាក់បើករថយន្តទំនើបហើយដកកាំភ្លើងបាញ់រះឡើងលើមេឃជាច្រើនគ្រាប់ ហើយបើកគេចខ្លួនបាត់ស្រមោល កាលពីវេលាម៉ោង ២ នឹង ៣០ នាទី យប់ថ្ងៃទី ១៣ ខែឧសភា ឆ្នាំ ២០១៦ ស្ថិតនៅតាម
បណ្តោយផ្លូវលេខ ២៦៥ ក្នុងសង្កាត់ទឹកល្អ៣ ខណ្ឌទួលគោក ជ្រកចូលផ្សារសំណង់ ១២ ទល់មុខផ្ទះសំណាក់ហង្សនាគ ។យោងតាមប្រភពព័ត៌មាន ពីសាក្សីដែលបានឃើញហេតុការណ៍ខាង លើនេះបានឲ្យដឹងថា មុនពេលមាន ការផ្ទុះអាវុធខាងលើនេះគឺ មានរថយន្តទំនើបម៉ាក ឡិច សីុស ពណ៌ខ្មៅ មិនចាំស្លាកលេខ បានបើកធ្វើដំណើរតាមបណ្តោយផ្លូវលេខ ២៦៥ ក្នុងទិសដៅពីត្បូងទៅជើង ខណ: មកដល់ចំណុចកើតហេតុ ក៏អ្នកបើករថយន្តនេះដកកាំភ្លើងមិនស្គាល់ម៉ាក បាន បាញ់រះឡើងលើមេឃជាច្រើនគ្រាប់ ដោយមិនដឹងមូល ។ ហើយភ្លាមៗនោះក៏អ្នកដកកាំភ្លើងបាញ់រះនោះក៏បើករថយន្តគេចចេញកន្លែងកើតហេតុបាត់ស្រមោលតែម្តង ។ ក្រោយកើតសមត្ថកិច្ចបានត្រឹមតែចុះមកត្រួតពិនិត្យនៅកន្លែកកើតហេតុប៉ុណ្ណោះ ដោយ រកឃើញសំបកគ្រាប់កាំភ្លើងចំនួន៥គ្រាប់ ហើយសមត្ថកិច្ចក៏សាកសួរសាក្សីដែរឃើញការណ៏នេះ ដើម្បីធ្វើស្រាវជ្រាវតាមចាប់ជើងខ្លាំងកណ្តាលរាត្រីដែលដកកាំភ្លើងបាញ់រះឡើងលើមេឃនេះ ។ទោះជាយ៉ាងណា ប្រជាជននៅម្ដុំនោះមានការមិនសប្បាយចិត្តជាមួយនឹងសមត្ថកិច្ចធ្វើការយឺតយ៉ាវបំផុតក្នុងការមកដល់កន្លែងកើតហេតុហើយពួកគាត់ ក៏សំណមពរដល់សមត្ថកិច្ចមូលដ្ថាន មេត្តាពង្រឹងនៃការល្បាតអោយច្រើនផង ព្រោះនៅម្ដុំសង្កាត់ទឹកល្អក់៣នេះសំបូរណាស់ បទល្មើសឆក់ប្លន់ ៕ 
