ខេត្តសៀមរាបៈ បន្ទាប់ពីមានការប្ដឹងរបស់ប្រជាពលរដ្ឋថាមានរថយន្ដដឹកដីជាច្រើនគ្រឿងបានដឹកដី បង្ហុយនិងខូចផ្លូវសាធារណៈនោះ មន្ដ្រីនៃមន្ទីរសាធារណៈការនិងដឹកជញ្ជូនខេត្តសៀមរាបសហការជាមួយ អជ្ញាធរមូលដ្ឋាន ធ្វើការស្ទាក់រថយន្ដដឹកដីចំនួន១២គ្រឿងរបស់ក្រុមហ៊ុនដឹកដីចំនួន៤ក្រុមហ៊ុនមកធ្វើកិច្ចសន្យា ដើម្បីបញ្ឈប់សកម្មភាពណាមួយដែលធ្វើឲ្យប៉ះពាល់ដល់ការរស់នៅរបស់ប្រជាពលរដ្ឋ ។
ហេតុការណ៍ចុះស្ទាក់ចាប់រថយន្ដដឹកដីនេះដែរធ្វើឡើងកាលពីថ្ងៃទី១៩ខែឧសភាឆ្នាំ២០១៤ ស្ថិតនៅផ្លូវ ក្រវ៉ាត់ក្រុង ក្នុងសង្កាត់សំបួរ ក្រុងសៀមរាប ។ អនុប្រធានមន្ទីរសាធារណៈការនិងដឹកជញ្ជូនខេត្តសៀមរាប លោកជួត ចន្ទ័តារា បានឲ្យដឹងថា ក្រុមហ៊ុន ដែលជីកនិងដឹកជញ្ជូន ដី ដែល កំពុងបំផ្លាញផ្លូវនេះ គឺមានរហូត ដល់៤ក្រុមហ៊ុន។
ពួកគេបានជីកដី នៅចំណុច ខាងលិចវត្តចេតីយ៏ហើយដឹកជញ្ជូនតាមផ្លូវលំនិងផ្លូវជាតិ ដែលតភ្ជាប់ពីផ្លូវក្រវ៉ាត់ក្រុងទៅសង្កាត់សំបួរ។ ក្នុង ប្រតិបត្តិការ នោះ គឺចាប់បាន ឡាន១២គ្រឿង យកមកធ្វើកិច្ចសន្យា ចំនួន៤ចំណុច ទី១ឲ្យក្រុមហ៊ុន ដឹកជញ្ជូន ដីខាងលើស្រោចទឺកជាប្រចាំ ទី២ ក្នុងពេលដឹកជញ្ជូនត្រូវគ្របឲ្យជិតមិនឲ្យហុយ ទី៣សំអាតកំទេច ដីដែល ធ្លាក់លើផ្លូវកៅស៊ូ និងទី៤ ជួសជុលផ្លូវ ដែលរងការខូចខាតដោយសាការដឹកជញ្ជូននោះ ទាំងស្រុងឡើងវិញ។
លោកបានបន្តថា ការចុះចាប់ឡានដឹកដីមកធ្វើកិច្ចសន្យា គឺជាបញ្ជារបស់លោកអភិបាលខេត្ត និងលោក ប្រធានមន្ទីសាធារណៈការខេត្ត។ ក្រោយធ្វើកិច្ចសន្យា ក៏បានអនុញាតិឲ្យបន្តអាជីវកម្មជាធម្មតា។ ប៉ុន្តែប្រសិនបើ ពលរដ្ឋនៅមិនយល់ព្រមនៅចំណុចណាមួយ ហើយនៅតែបន្តប្តឹងទៀតនោះ ខាងលោកត្រូវតែអនុវត្តទៅតាម ភាពជាក់ស្តែងជាបន្តទៀតដែរ។ ក្រុមប្រជាពលរដ្ឋក្នុងសង្កាត់សំបួរ បាននិយាយថា ជារៀងរាល់ថ្ងៃពួកគាត់រស់នៅរងការ ស្រូបលំអង ធូលីពីសំណាក់ក្រុមហ៊ុនជីកដីលក់ ស្ទើរទាំងយប់ទាំងថ្ងៃ។
បញ្ហានេះបានធ្វើឲ្យអ្នកភូមិ ពិសេសក្មេងតូចៗ មានជម្ងឺ ប្រចាំកាយ ។ ប្រភពបន្តថា ក្នុងពេលខាងមុខនេះ មុនរដូវវស្សាចូលមកដល់ ប្រសិនបើក្រុមហ៊ុនខាងលើ មិនជួសជុលផ្លូវឲ្យវិញទេ ពួកគាត់នឹងប្តឹងម្តងទៀត ហើយបើគ្មានដំណោះស្រាយ គឺសម្រេចបិទផ្លូវតែម្តង។ ប្រជាពលរដ្ឋបានលើកឡើងបន្ថែមទៀតថា ពលរដ្ឋបានសំដែងការរីករាយចំពោះមន្ទីរសាធារណៈការ និងដឹកជញ្ជូនព្រមទាំង អជ្ញា ធរ ពាក់ព័ន្ធដែលបានចុះណែនាំដល់រថយន្ដដឹកដីទាំងអស់ដែលបង្កការប៉ះពាល់ ដល់ការរស់នៅរបស់ពួកគាត់ ឲ្យក្រុមហ៊ុនទាំងនោះ គោរពច្បាប់ទម្លាប់ឡើងវិញ ។
គួររំលឹកផងដែរថា ការដឹកជញ្ជូនដីរបស់ក្រុមហ៊ុនខាងលើ ក្រៅពីបានបំផ្លាញផ្លូវលំ និងផ្លូវ ជាតិ ដែល តភ្ជាប់ ពីផ្លូវក្រវ៉ាត់ក្រុងទៅកាន់សង្កាត់សំបួរ គឺបានបំផ្លាញផ្លូវជាតិក្នុងក្រុងសៀមរាប ជាច្រើនខ្សែទៀត ហើយមក ទល់ ពេលនេះផ្លូវដែលរងការខូចខាតទាំងនោះ នៅមិនទាន់មានការជួសជុលឡើងវិញនៅឡើយទេ៕ 
