ភ្នំពេញ ៖ មនុស្សប្រុស៤នាក់បានរងរបួសធ្ងន់និងស្រាល ដោយសារតែរថយន្តកូរ៉េ១គ្រឿងបើកក្នុងល្បឿនយ៉ាងលឿនហើយទំនងអ្នកបើកងងុយដេក បានរេចង្កូតជ្រុលទៅបុកចូលផ្ទះប្រជាពលរដ្ឋផ្ទុះឆេះបណ្តាលឱ្យរងការខូចខាតធ្ងន់ធ្ងរ កាលពីវេលាម៉ោង២នឹង៤០រំលងអាធ្រាតឈានចូលថ្ងៃទី១៨ ខែឧសភា ឆ្នាំ២០១៦ ស្ថិតក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ ។ ប្រភពពត៌មានបានឱ្យដឹងថា នៅមុនពេលកើតហេតុគេបានឃើញរថយន្តកូរ៉េ២តោនកន្លះ ពណ៍ស ពាក់ស្លាកលេខ ភ្នំពេញ 3B-0464 បើកបរតាមបណ្តោយផ្លូវជាតិលេខ៦ ទិសដៅពីត្បូងទៅជើង ក្នុងល្បឿនយ៉ាងលឿន ហើយទំនងអ្នកបើកងងុយដេក ពេលមកដល់ចំណុចកើតហេតុបានរេចង្កូតបុកតូបកាត់សក់ និងបុកចូលផ្ទះប្រជាពលរដ្ឋចំនួន១ខ្នង ផ្ទុះឆេះទាំងរថយន្តបង្កនិងផ្ទះរងគ្រោះ និងបណ្តាលឱ្យមនុស្ស២នាក់ឆេះខ្លោចខ្លួនរងរបួសធ្ងន់ធ្ងរ និង២នាក់ទៀតរងរបួសស្រាល ជាមួយនឹងរថយន្តម្ចាស់ផ្ទះខូចខាត១គ្រឿងផងដែរ បង្កឱ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចចុះជួយអន្តរាគមន៍ យកទឹកនិងបំពង់ពន្លត់អគ្គីភ័យបានពន្លត់ឱ្យរលត់ទាន់ពេលវេលា ។ 
ប្រភពបន្តថា ជនរងគ្រោះ២នាក់ដែលរងរបួសធ្ងន់ឆេះរោលពេញខ្លួនត្រូបានដឹកយកទៅសង្គ្រោះនៅមន្ទីរពេទ្យ ចំណែក២នាក់ទៀតគេចខ្លួនបាត់ ។ ក្រោយមកសមត្ថកិច្ចជំនាញបានចុះមកធ្វើការវាស់វែង និងយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយតាមនីតិវិធី ៕ដោយៈជីម ភារ៉ា
