ស្ទឹងត្រែង៖បុរស៣នាក់ដើររកផ្សិតក្នុងព្រៃពេលរឡប់មកផ្ទះវិញ បាននាំគ្នាសែងម៉ូតូកាត់ទឹកអូរ ពេលមេឃកំពុងភ្លៀងខ្លាំង ត្រូវបានទឹកជន់លិចឆក់យកជីវិតបុរសម្នាក់ រួមនិងម៉ូតូមួយគ្រឿងទៅបាត់ បុរស២នាក់រួចផុតពីក្តីស្លាប់។
ហេតុការបណ្តាលឱ្យបុរសម្នាក់បានស្លាប់ដោយទឹកជន់លិចនេះ បានកើតឡើងកាលពីវេលាម៉ោង២២យប់ថ្ងៃទី២២ខែឧសភាឆ្នាំ២០១៦នៅត្រង់ចំណុចអូរតាណេល ស្ថិតក្នុងភូមិញ៉ាងស៊ុម ឃុំថ្មកែវ ស្រុកសៀមប៉ាងខេត្តស្ទឹងត្រែង។
លោកព្រិនបាលឯកបៃ ថងសាម៉ៃនាយប៉ុស្តិ៍បានឱ្យដឹងថាជនរងគ្រោះ ទាំង៣នាក់ មាន ១ឈ្មោះគន់ និត ភេទប្រុស អាយុ៣០ឆ្នាំ(ស្លាប់) ២ឈ្មោះខាំ ប៊ិនឡូ ភេទប្រុស អាយុ២០ឆ្នាំ(រស់) និង៣ឈ្មោះអ៊ិន លូ ភេទប្រុស អាយុ២៣ឆ្នាំ(រស់) ពួកគេមានទីលំនៅក្នុងភូមិពងគ្រៀល ឃុំព្រែកមាស ស្រុកសៀមប៉ាង ខេត្តស្ទឹងត្រែង។
លោកនាយប៉ុស្តិ៍បានបន្តឱ្យដឹងទៀតថានៅយប់កើតហេតុពួកគេទាំង៣នាក់ខាងលើបាននាំគ្នាទៅរកផ្សិតក្នុងព្រៃ ពេលធ្វើដំណើរត្រឡប់មកផ្ទះវិញ មកដល់ចំនុចអូរត្រណេល ក៏មានភ្លៀងធ្លាក់យ៉ាងខ្លាំង ធ្វើឱ្យទឹកជន់ពួកគេទាំង៣នាក់ ក៏បាននាំគ្នាសែងម៉ូតូកាត់អូរ ទឹកកំពុងជន់ ពេលមកដល់ពាក់កណ្តាលអូរ ដីបានស្រុត ធ្វើឱ្យពួកគេម្នាក់ ទឹកគួចយកទៅជាមួយម៉ូតូបាត់ មិនអាចជួយសង្គ្រោះបានឡើយ។ចំណែក២នាក់បានរួចផុតពីសេចក្តីស្លាប់។
លោកបន្តថាក្រោយកើតហេតុនៅព្រឹកថ្ងៃទី២៣ឧសភាកម្លាំងប៉ុស្តិ៍បានសហការជាមួយអាវុធ ហត្ថ សឹករងស្រុក រួមជាមួយក្រុមគ្រួសាររងគ្រោះ ចុះមកដល់កន្លែងកើតហេតុ រាវរកទើបបានប្រទះឃើញជនរងគ្រោះបានស្លាប់បាត់ជីវិទៅហើយ សមត្ថកិច្ចបានធ្វើកំណត់ហេតុ ប្រគល់សពជនរងគ្រោះទៅឱ្យក្រុមគ្រួសារជនរងគ្រោះយកទៅធ្វើបុណ្យតាមប្រពៃណី៕
