ភ្នំពេញ របើកធ្លាក់សង្កត់ ពីលើរថយន្តចំនួន ៣គ្រឿង បណ្តាលឲ្យរងការខូចខាត រួមនឹងដើមឈើចំនួន ២ ដើម ត្រូវបានរលំបាក រាជធានីភ្នំពេញ មានភ្លៀងធ្លក់មួយមេធំ លាយឡំជាមួយនឹងខ្យល់បោកបក់យ៉ាងខ្លាំង បានធ្វើឲ្យកញ្ចក់អគារគ្រឹះស្ថានមីក្រូហិរញ្ញាវត្ថុក្រេឌីត ត្រូវបានរបើកធ្លាក់សង្កត់ ពីលើរថយន្តចំនួន ៣គ្រឿង បណ្តាលឲ្យរងការខូចខាត រួមនឹងដើមឈើចំនួន ២ ដើមទៀត នៅកន្លែងផ្សេងគ្នា ត្រូវបានរលំបាក់កាត់ទទឹងផ្លូវ ហេតុការណ៏នេះបានកើតឡើងកាលពីវេលាម៉ោង ១៥ និង ១៥ នាទី ថៃ្ងទី ២២ ខែឧសភា ឆ្នាំ២០១៤ ។
អគាររបស់គ្រឹះស្ថាន មីក្រូហិរញ្ញវត្ថុក្រេងឌីត ដែលរបើកផ្ទាំងកញ្ចក់ធ្លាក់មកនេះ មានទីតាំង ស្ថិតនៅលើ ផ្លូវលេខ១៦៣ កែងផ្លូវ លេខ៣៦៨ សង្កាត់ទួលស្វាយព្រៃទី១ ក្នុងខណ្ឌចំការមន ។ ដោយឡែកដើមឈើចំនួន ២ដើមទៀត ក្នុងនោះមួយដើមដែលបានខ្យល់បោកបក់បណ្តាលឲ្យបាក់ ស្ថិតនៅតាមបណ្តោយផ្លូវព្រះនរោត្តម កែងនឹងផ្លូវ ១៦៣ សង្កាត់វាលវង់ ខណ្ឌ៧មករា និងដើមឈើមួយដើមទៀត បានរលំ កាត់ថ្នល់ នៅម្តុំផ្សារតាប៉ាង ក្នុងខណ្ឌដូនពេញ ។
ចំណែកឯរថយន្តចំនួន៣គ្រឿង ដែលកំពុងឈប់ស្ងៀមនៅខាងមុខគ្រឹះស្ថានមីក្រូហិរញ្ញាវត្ថុក្រេឌីត ត្រូវបានរងការខូចខាតនោះ ដោយសារផ្ទាំងកញ្ចក់របស់អគារគ្រឹះស្ថានមីក្រូហិរញ្ញាវត្ថុក្រេឌីត ត្រូវបានខ្យល់បោកបក់ ទើបបណ្តាលឲ្យរបើកធ្លាក់ មកចំរថយន្តទាំង៣គ្រឿងខណៈពេលដែលមានភ្លៀងនិង ខ្យល់បោកបក់យ៉ាងខ្លាំង ។
ចំណែកដើមឈើចំនួន ២ដើមទៀតដែលបានរលំបាក់ នៅលើបណ្តោយផ្លូវម្តុំផ្សារតាប៉ាង និងផ្លូវនរោត្តម មិនបណ្តាលបង្ករឲ្យមានគ្រោះថ្នាក់ ដល់ប្រជាពលរដ្ឋ ដែលធ្វើដំណើរតាមដងផ្លូវនោះឡើយ គ្រាន់តែបង្ករឲ្យមានការកកស្ទះចរាចរបន្តិចបន្តួច ដោយសារតែដើមឈើ ទាំងនេះបានរលំកាត់តាមបណ្តោយនេះតែម្តង ជាហេតុធ្វើឲ្យពួកគាត់ពិបាកក្នុងការធ្វើដំណើរ ទៅមក តែប៉ុណ្ណោះ ។ ភ្លាមៗនោះ សាលារាជធានីភ្នំពេញ បានចាត់ឲ្យកម្មក មកអារ កាត់ដើមឈើខាងលើ យកចេញពីលើបណ្តោយផ្លូវទាំង ២ ដើម្បី ជួយសម្រួលចរាចរជូនដល់បងប្អូនប្រជាពលរដ្ឋ ធ្វើចរាចរ ឆ្លងកាត់ទៅមក ជាធម្មតាឡើងវិញ ៕ 
