ភ្នំពេញ ៖ យុវជនម្នាក់បានស្លាប់យ៉ាងអាណោចអាធម៌ ខណះកំពុងជិះម៉ូតូម្នាក់ឯង ក៏ត្រូវរថយន្តមិនចាំម៉ាក១គ្រឿងបើកលក្នុងល្បឿនលឿនបុកពីក្រោយ និងកិនពីលើបណ្តាលឱ្យស្លាប់ភ្លាមៗ ហើយរថយន្តបង្កបានគេចខ្លួនបាត់ ដែលហេតុការណ៍នេះបានកើតឡើងកាលពីវេលាម៉ោង៣ រំលងអាធ្រាតឈានចូលថ្ងៃទី២៦ ខែឧសភា ឆ្នាំ២០១៦ នៅចំណុចមុខស្ថានីយ៍ប្រេងឥន្ឋនៈតេលា តាមបណ្តោយផ្លូវ៥៩៨ ស្ថិតក្នុងសង្កាត់បឹងកក់ទី១ ខណ្ឌទួលគោក ។
យុវជនរងគ្រោះមានឈ្មោះ ប៊ី ជីម អាយុ២៤ឆ្នាំ មានស្រុកកំណើតនៅភូមិដើមពពេល ឃុំថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង ។ 
ប្រភពពត៌មានជុំវិញកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញយុវជនម្នាក់ជិះម៉ូតូហុងដាឌ្រីម សេ១២៥ សេរីឆ្នាំ២០១៤ ពណ៍ខ្មៅ ពាក់ស្លាកលេខ ភ្នំពេញ1CJ-2379 ជិះតាមបណ្តោយផ្លូវលេខ៥៩៨ ទិសដៅពីជើងទៅត្បូង ពេលមកដល់កន្លែងកើតហេតុក៏មានរថយន្តមិនចាំម៉ាក បើកមកពីក្រោយក្នុងល្បឿនលឿនបុកម៉ូតូពីក្រោយពេញទំហឹង និងកិនពីលើជនរងគ្រោះបណ្តាលឱ្យស្លាប់ភ្លាមៗ យ៉ាងអាណោចអាធម៌នៅនឹងកន្លែងកើតហេតុ ហើយរថយន្យបង្កបានបើកគេចខ្លួនបាត់ ។
ក្រោយមកសមត្ថកិច្ចជំនាញបានមកដល់កន្លែងកើតហេតុធ្វើការវាស់វែង និងបានទំនាក់ទំនងទៅសាច់ញាតិក្តុមគ្រួសារឱ្យមកទទួលសព យកទៅធ្វើបុណ្យតាមប្រពៃណី ៕
