ស៊ិនជាំង៖ មនុស្សយ៉ាងហោចណាស់ ៣១នាក់ បានស្លាប់ និង ៩៤នាក់ទៀត បានរងរបួស ដោយសារការបំផ្ទុះគ្រាប់បែកនៅក្បែរផ្សារមួយកន្លែង ពោរពេញដោយហ្វូងមនុស្សយ៉ាងកុះករនាទីក្រុង Xingjiang ប្រទេសចិន នា
ព្រឹកថ្ងៃទី២២ ខែឧសភា ឆ្នាំ២០១៤នេះ។ ប្រធានាធិបតីចិន លោក ស៊ី ជិនពីង( Xi Jinping )បានហៅការបំផ្ទុះគ្រាប់បែកនៅក្បែរផ្សារមួយកន្លែងនោះថា ជាអំពើភេរវកម្ម។ នេះបើយោងតាមការចេញផ្សាយរបស់វេបសាយបរទេសចិនឆាយណាដេលីកាលពីថ្ងៃព្រហស្បតិ៍ម្សិលមិញ។
តាមប្រភពដដែលនេះ លោកប្រធានធិបតី ស៊ី (Xi Jinping )តាមរយៈសេចក្តីថ្លែងការណ៍របស់លោក បានថ្លែងឲ្យប៉ូលិសត្រូវបង្កើនការល្បាត និងត្រួតពិនិត្យសន្តិសុខ ផ្តោតសំខាន់លើគោលដៅរបស់ភេរវករ ព្រមទាំងទប់ស្កាត់មិនឲ្យមានផលប៉ះពាល់កាន់តែធ្ងន់ធ្ងរ។ លើសពីនេះលោកក៏បានស្នើសុំអាជ្ញាធរមូលដ្ឋាន ជួយដោះស្រាយបញ្ហានេះ ឲ្យបានលឿន និងថែទាំអ្នករងរបួស ដោយការយកចិត្តទុកដាក់ និងផ្ដល់នូវសមានទុក្ខដល់គ្រួសារ នៃជនរងគ្រោះផងដែរ។
សូមរំឮកថា ហេតុការណ៍ផ្ទុះគ្រាប់បែកនេះកើតឡើងនៅម៉ោង ៧ និង៥០នាទីព្រឹកថ្ងៃទី២២ ខែឧសភា ឆ្នាំ២០១៤ (ម៉ោងក្នុងប្រទេសចិន) ដោយសាររថយន្ត ២គ្រឿង ត្រូវបានគេបើកចូលក្នុងហ្វូងមនុស្ស ហើយគប់គ្រាប់បែកចេញពីរថយន្តបណ្តាលឲ្យផ្ទុះលាន់កក្រើក និង បណ្តាលឲ្យមនុស្ស ៣១នាក់ស្លាប់ និង៩៤នាក់រងរបួស៕
