ភ្នំពេញៈបុរសម្នាក់ទំនងជាស្រវឹងស្រា បានបើករថយន្តកាមរីឆ្លាមក្នុងល្បឿនលឿន ហើយរេចង្កូតពេញផ្លូវជ្រុលទៅបុករបាំង្មពុះចែកទ្រូងផ្លូវរងការខូចខាត ចំណែកឯរថយន្តបង្ករងការខូចខាតខាងមុខយ៉ាងដំណំងផងដែរ។ ក្នុងហេតុការណ៍នេះបានបង្កឡើងកាលពីវេលាម៉ោង១០និង១៥នាទីយប់ ថ្ងៃទី៦ មិថុនា ឆ្នាំ២០១៦ នៅចំណុចជាប់ស្ថានីបូមទឹកបឹងត្របែក តាមបណ្ដោយផ្លូវ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
តាមសាក្សីដែលឃើញហេតុការណ៍នេះបានឲ្យដឹងថា នៅមុនពេលកើតហេតុគេសង្កែតឃើញរថយន្តបង្កម៉ាកកាមរីបាឡែន ពណ៌ទឹក
ប្រាក់ ពាក់ស្លាកលេខភ្នំពេញ2E.9589 បើកបរដោយបុរសម្នាក់ទំនងជាស្រវឹងស្រា បើកទិសដៅពីលិចទៅកើតតាមបណ្ដោយផ្លូវ២៧១ ក្នុងល្បឿនលឿនហើយបានរេចង្កូតជ្រុលទៅបុករបាំងថ្មពុះចែកទ្រូងផ្លូវរងការខូចខាតបន្តិចបន្តួច ប៉ុន្តែរថយន្តបង្ករងការខូចខាតខាងមុខយ៉ាងដំណំ ហើយម្ចាស់រថយន្តបង្កក៏រងរបួសស្រាលផងដែរ។
ក្រោយពេលកើតហេតុម្ចាស់រថយន្តបង្កបានបើកទ្វាគេចខ្លួនបាត់ ដោយបន្សល់ទុករថយន្តបង្កនៅកន្លែងកើតហេតុ បន្ទាប់មកសមត្ថកិច្ចមូលដ្ឋាននិងជំនាញបានមកដល់និងធ្វើការវាស់វែងយកថយន្តបង្កនោះទៅរក្សាទុកនៅស្នងការដ្ឋាននគរបាលជើងគោករាជធានីភ្នំពេញ រងចាំដោះស្រាយគ្នានៅពេលក្រោយ។
