ខេត្តកំពង់ឆ្នាំង៖ មនុស្ស៣នាក់ជិះម៉ូតូ២គ្រឿងបុកគ្នាពេញទំហឹងក្នុងពេលយប់ ក្នុងទិសដៅស្របគ្នា បណ្តាលអោយរងរបួសទាំអស់គ្នាយ៉ាងធ្ងន់ធ្ងរ។ ហេតុការន៍នេះបានកើតឡើងនៅម៉ោង៧និង៥០នាទីយប់ថ្ងៃទី១៨ ខែមិថុនា ឆ្នាំ២០១៦ លើផ្លូវជាតិលេខ៥៣ ក្នុងភូមិចំការតាម៉ៅ ឃុំស្រៃថ្មី ស្រុករលាប្អៀរ។
លោក ទឹម ចន្ទី អធិការនគរបាលស្រុករលាប្អៀរបានអោយដឹងនៅព្រឹកថ្ងៃទី២០ ខែមិថុនានេះថា៖ អត្តសញ្ញាណជនរងគ្រោះទាំង៣នាក់ សមត្ថកិច្ចមូលដ្ឋានមិនដឹងឡើយ ព្រោះក្រោយពេលកើតហេតុភ្លាម ត្រូវបានក្រុមគ្រួសារដឹកបញ្ជូនទៅកាន់មន្ទីរពេទ្យខេត្ត និងដោយរបួសធ្ងន់ធ្ងរគេទាំង៣នាក់ត្រូវបានគ្រូពេទ្យខេត្ត បញ្ចូនបន្តទៅមន្ទីរពេទ្យក្រុងភ្នំពេញបន្តទៀត។ចំណែកនៅកន្លែងកើតហេតុអ្នកស្រុកបានលើម៉ូតូចេញពីកន្លែងកើតហេតុអស់ទៅហើយមិនដឹងថា ម៉ូតូ២គ្រឿងនេះបុកគ្នារបៀបម៉េចនោះទេ ដែលពេលនេះសមត្ថកិច្ចកំពុងធ្វើការស្រាវជ្រាវ រកសាក្សីដែលបានឃើញហេតុការគ្រោះថ្នាក់ខាងលើនេះ ដើម្បីកសាងសំណុំរឿងតាមផ្លូវច្បាប់។
ដោយឡែកប្រភពពីប្រជាពលរដ្ឋក្នុងពេលកើតហេតុបានអោយដឹងថា៖ ពួកគេទាំង
៣នាក់បានជិះម៉ូតូ២គ្រឿងក្នុងទិសស្របគ្នាយ៉ាងលឿន ក្នុងទិសដៅពីលិចទៅកើតហើយទំនងជាបុកគ្នាពីក្រោយដោយចាំងភ្លើងរថយន្តមកពីមុខ ទើបបង្កអោយមានគ្រោះថ្នាក់ធ្ងន់ធ្ងរទាំងអស់គ្នាតែម្តង។ នៅក្នុងចំណោមជនរងគ្រោះ៣នាក់នេះ ម្នាក់គឺគេស្គាល់ថាជាឈ្មោះ ហែម សុខុម ជាមន្ត្រីនគរបាលប្រឆាំងគ្រឿញៀនខេត្ត បានរងរបួសបែកក្បាលធ្ង ន់ធ្ងរ ឥឡូវក្រុមគ្រួសារបានបញ្ជូនទៅព្យាបាលនៅប្រទេសវៀតណាមហើយ និងក៏មានសង្ឃឹមមិនច្រើនដែរ ព្រោះក្បាលយ៉ាងរបួសធ្ងន់ធ្ងរ៕
