ភ្នំពេញ ៖ ក្មេងស្ទាវ២ក្រុមដែលមានគ្នាជាច្រើនបានចូលក្នុងក្លិបដែលមានយីហោ ហាយក្លិប បន្ទាប់ពីរាំលេងផឹកស៊ីយ៉ាងសប្បាយហើយមានការទាស់ទែងគ្នានៅក្នុងក្លិបត្រូវបានសន្តិសុខដេញចេញមកខាងក្រៅក៏ធ្វើអោយពួកគេបើកឆាកប្រយុទ្ធគ្នាយ៉ាងអានាធិបតេយ្យនៅលើផ្លូវ
សាធារណៈបង្កអោយមានការភ្ញាក់ផ្អើលដល់អាជ្ញាធរមានសមត្ថកិច្ចចុះអន្តរាគមន៍ធ្វើការឃាត់ខ្លួនភ្លាមៗ កាលពីវេលាម៉ោង១២និង១០នាទីយប់ឈានចូលថ្ងៃទី២៥ខែឧសភាឆ្នាំ២០១៤ នៅក្បែរផ្សារទំនើបស៊ីធីម៉ល តាមបណ្ដោយផ្លុវមុនីរ៉េត ក្នុងសង្កាត់វាលវង់ ខណ្ឌ៧មករា។
យោងតាមសមត្ថកិច្ចដែលចុះមកអន្តរាគមន៍ដល់កន្លែងកើតហេតុបានអោយដឹងថា ហេតុការណ៍ដែលក្មេងស្ទាវបើកឆាកប្រយុទ្ធគ្នាតាមដងផ្លូវនេះផ្ដើមឡើងដោយពួកគេចូលផឹកស៊ីរាំសប្បាយក្នុងក្លិបយីហោ ហាយក្លិប ដោយទាស់ពាក្យសំដីគ្នា និងឌឺដងគ្នាទៅវិញទៅមករហូតចេញមកវិញក៏មានការផ្ទុះហិង្សាដេញវាយតប់គ្នាដូចក្នុងរឿងភាគចិន ភ្លាមៗនោះដោយសមត្ថកិច្ចទទួលបានព័ត៌មានក៏ចុះមកអន្តរាគមន៍ក៏ធ្វើការឃាត់ខ្លួនបានយុវជន២នាក់និងបក្ខពួកផ្សេងបានរត់គេចខ្លួនបាត់អស់បន្ទាប់ពីសមត្ថកិច្ចមកដល់។បច្ចុប្បន្នសមត្ថកិច្ចក៏បានឃាត់ខ្លួនក្រុមក្មេងស្ទាវទាំងអស់អោយមានការភ្ញាក់ផ្អើលដល់គេឯងទាំងយប់នេះមកធ្វើការសាកសួរអប់រំនិងហៅឪពុកម្ដាយធ្វើកិច្ចសន្យាយកទទួលយកកូនត្រឡប់ទៅផ្ទះវិញ។
តើអាជ្ញាធរមានសមត្ថកិច្ចគួរមានវិធានការយ៉ាងដូចម្ដេចចំពោះក្រុមក្មេងស្ទាវដែលតែងតែបង្កភាពអានាធិបតេយ្យចេញពីក្លឹបហាយ ផឹកស៊ីស្រវឹងបង្កជំលោះតាមដងផ្លូវ ពេលខ្លះក៏មានផ្ទុះអាវុធថែមទៀត ដែលបានកើតឡើងច្រើនលើកច្រើនសារ ប៉ុន្តែហាក់ដូចជាគ្មានសមត្ថកិច្ចអើពើចំពោះបញ្ហានេះសោះ៕
